Isaiah 34

Chin (Mara Bible RV (BSI))

← Chapter 33 Jump to: Chapter 35 →

1Hy râhzy saih u, thei awpa ta a vaw hnia u la, Phopizy saih u, nathlie teh u! Alei ta thei sala, A chhôh liata a ypa zydua ta thei mawh ei sy; Khizaw ta thei sala, A chhôh tawhta a puapa zydua ta thei mawh ei sy.

2Abeipa cha râh zydua chô liata a ru thata chhô ta, Ama pheisaih zydua chô liata a hie a hâh ngaita; Chavâta âmo cha, Tlokhuh pahleipadia awpa ta hlâ ha ta, Thie awpa ta a hlâ ha ei.

3Thiepazy cha pabu leipa ta thy aw ei ta, Ama ri roh chhiepa pua aw ta, Tlâhzy liata ama thisaih palosapa a châ aw.

4Avâ liata a ypa zydua thuzao khai aw ei ta, Avâ khi châbu chatypa hawhta chatypa a châ aw; Kre zôh tawhta kre hna zôpa hawhta, Avâ liata a ypa zydua khi tla aw ei ta; Theiku kô tawhta theiku hna zôpa hawhta, Avâ liata a ypa zydua ama tla aw.

5Dâhphi paina taihta, Ei zaozi ta avâ liata doh ha ta; Moh teh u, Edômâ pachia awpa ta za chô ta, Pahleipadia awpa ta ei raopa phopi chô liata a za chô.

6Abeipa ta Bôzrâ khihpi liata atheihna hlâ awpa hnei ta, Edômâ râh liata thietuna rarôh ypa tao awpa a hneipa vâta, Abeipa zaozi cha thisaih ta bie ta, Thaw ta a khu; Mietakutawzy nata miezy thisaih ta bie ta, Mietaku tôhpazy lôpo thaw ta a khu.

7Chaoliah tôhpazy Môabâ mo hnohta pao aw ei ta, Viahchaotaw chapawpazy chhao, Viahchao tôhpa thatlôpazy chhaota ama pao aw. Ama râh cha thisaih liata pachiepa châ aw ta, Ama dohlei cha thaw ta a khu aw.

8Abeipa ta phuh lana noh hnei ta, Zaio kyh liata viarithôna kô a hnei.

9Edômâ chavah tizy cha chathli lâta paliepa châ aw ta, A dohlei kaih lâta paliepa a châ aw; A râh chhao chathli kâ ngâpa lâta â lie aw.

10Chhô nah zâ ta pachhaipa châ leipa aw ta, A meikhuh chhâzaw ta a khu aw. Chhâ zydua ta roryhrapa ta y aw ta, Chhâzaw nata tlyzaw ta ahy hmahta chapia khao aw veih ei.

11Râh cha vawpô nata sawku ta hnei aw ei ta, Cha liata vaku nata raawh ama pahrâ aw. Abeipa ta Môabâ chô liata tymâna ri parai aw ta, Ruana ri a parai thlu aw.

12Bei a châ awpa abei sawzy y leipa aw ei ta, A beimachâzy chhao khâpa hmah châ aw veih ei.

13A abei ozy liata ahlohzy pyu aw ta, A thokhyzy chhôh liata thlahbei nata diahsaizy a pyuh aw. Savaizy tlaihna châ aw ta, Vakuzy pahrâna a châ aw.

14Râhchawhpa sazy nata changiezy a tyh aw ei ta, Sathawh ta a viasa pado aw ta, Zâ sazy cha liata pahrâ aw ei ta, Apahâna su ama hmô aw.

15Cha liata vaku ta a bu tu aw ta, A tih a thla aw; A tih cha kei aw ta, A nohdi ry liata a tawzy a pahmaoh aw. Cha liata hmôchhihzy chhao, Kaolâh hnei chyupa ta ama ypakhy aw.

16Abeipa châbu liata tlua u la, reih teh u: Chazy hry liata pô kha hmahta a ki leipa y leipa aw ta, Kaolâh a hnei leipa pô kha hmah y aw vei. Abeipa pakah ta biepie ha ta, A Thlahpa ta a pahmaoh ha ei.

17Âmo châta nuby a dao ha ta, A ku ta chaori thlie ta, Ama tovyuh râh a pie chyu ei; Chhâzaw ta hnei aw ei ta, Chhâ zydua ta cha liata ama pahrâ aw.

← Chapter 33 Jump to: Chapter 35 →