Isaiah 24

Chin (Mara Bible RV (BSI))

← Chapter 23 Jump to: Chapter 25 →

1Pachâ teh u, Abeipa ta alei he parua aw ta, Roryhrapa ta a tao aw; Alei hmia he palie patheih aw ta, Alei chô liata a pahrâpazy a hiepatla khai aw ei.

2Vâtlâh chô liata hmo a tlôpa hawhta, Theihthaipa chô liata chhao tlô aw ta, Seichapaw chô liata hmo a tlôpa hawhta, A zibeipa chô liata chhao a tlô aw. Seichanô chô liata hmo a tlôpa hawhta, A zibeinô chô liata chhao a tlô aw. A chaleituhpa chô liata hmo a tlôpa hawhta, A zuahtuhpa chô liata chhao a tlô aw. Dyu a pacheisatuhpa chô liata hmo a tlôpa hawhta, Dyu a cheituhpa chô liata chhao a tlô aw. A pôhna a chadaipa ta dyu a pacheisatuhpa chô liata hmo a tlôpa hawhta, A pôhna a pietuhpa chô liata chhao a tlô aw.

3Alei he tlokhuh parua khaipa châ aw ta, Tlokhuh parao khaipa a châ aw; Cha bie cha Abeipa ta a reih haw.

4Alei he mâchhiesapa ta uah ta, Khizaw he thazeipa ta a uah; Lei chyhsa chônôchaipazy chhao ama uah.

5Alei chô liata a pahrâpazy ta ryhpazy parao ei ta, Bieraopazy pananopa ta, Tlyzaw biehrai ama phiepa vâta, Alei cha âmo ry liata papuapaleipa ta a y.

6Chavâta alei cha chhiesana ta charua ta, A chô liata a pahrâpazy thailei pachâsapa ama châ. Chavâta lei chyhsazy maluh a sy laih ta, Chyhsa chyhta dei ama y bâ.

7Kresawhti thiehpa cha mâchhiesapa ta y ta, Kre zôh uah ta, Palôh a ly thei kaw tyhpazy chhao amâ hrô.

8Paotlâ tôpa ta alynazy dia ta, Haosai phana pyuzy a chalih ta, Totâ tôpa ta alynazy a chhâ haw.

9Hlasana chôta kresawhti doh khao leipa aw ei ta, Sahma chhao a dohtuhpazy châta ti khapa a châ aw.

10Khihpi a tymâpa cha paraopa châ ta, Ahy hmahta amâ ngia thei lei nawpa ta, O zydua khawpa a châ.

11Kresawhti y leipa vâta lâlaizy liata awhsâh ei ta, Palôh thaphana zydua zoh ta, Lei lyna a lei haw.

12Khihpi liata roryhrana siesaipa châ ta, Thokhy chhikaozy paraopa a châ.

13Alei liah liata phopizy hry liata, Hetana heta a vaw tlô aw; Ôli kô a thei chakhyh khaipa hawhta châ aw ei ta, Kre thei lyu khai tawhta kâmo thohpa hawhta ama châ aw.

14A paropa ta ao papuapa ta, Abeipa rônahna cha hla ta sa aw ei ta, Tilaipi tawhta thata ama awh aw.

15Chavâta Abeipa cha nochhi lâta palyupalih u la, Abeipa, Izarei Khazohpa moh cha, Tilaipi kiah râhzy liata palyupalih teh u.

16Kaokih tawhta reithaina hlazy thei pi ta, Mo Siapa palyupalihna hla eima thei. Châhrasala kei ta hetana heta ei tah: “Ei chaoh haw, ei chaoh haw, Ei hu a po na! Ngâchhih leipazy ta ngâchhih leipa ta tao ei ta, Ngâchhih leipazy ta ngâchhihna ama pahlei haw.”

17Hy lei chyhsa y, Chichhihna ta cha y khâh ta, Khaohtlô nata khoheih zy ta ama cha y khâh hih!

18Chichhihna pyu tawhta a râpa cha, Khaohtlô liata tla aw ta; Khaohtlô tawhta a puapa cha, Khoheih liata â ao aw. Avâ opyzy pahypa châ ta, Alei abônazy â chalyu.

19Alei cha kai ta, Alei cha zao ta, Alei cha thata â chalyu.

20Alei cha a paripa hawhta paochheichhâpa ta y ta, Byureih hawhta â chanei; A paraona ta thata vi ta, Pao ta, thyu heih khao aw vei.

21Cha noh liata, vâmo a palaipazy cha, Abeipa ta avâ liata hrie aw ta; Lei beizy chhao, Lei liata a hrie aw ei.

22Atâhpazy hawhta khaohtlô liata pahmaohpa ta, Patâhna o liata khôpa châ aw ei ta, Noh hluhpi a sie tawhta hriepa ama châ aw.

23Pheisaihzy Abeipa ta Zaio Tlâh nata Zerusale liata ryureih ta, A machâzy hmiakô liata A rônahna chaluahpa a châ tita; Thlâpâ khi hmiachhiepa ta y aw ta, Noh chhao nohzaopa ta a y aw.

← Chapter 23 Jump to: Chapter 25 →