Isaiah 62

Chin (Mara Bible RV (BSI))

← Chapter 61 Jump to: Chapter 63 →

1A siana cha khaihna hawhta pua sala, A pachhana meiôh khaihpa hawhta a papua hlâlei cha, Zaio vâta a thlih thlâh ha leipa aw na ta, Zerusale vâta a chalih aw va na.

2Râhzy ta na siana hmô aw ei ta, Bei zydua ta na rônahna ama hmô aw. Moh thiehpa ta cha aw aw ei ta, Cha cha Abeipa pakah ta a bipa moh a châ aw.

3Abeipa ku liata beilakho a ngiapa châ aw chi ta, Na Khazohpa ku liata rônahna beilakho na châ aw.

4Azubâ cha tah khao leipa aw ei ta, Na râh chhao Semâmâ tah khao aw veih ei. Hephazibâ tlao cha tah aw ei ta, Na râh cha Beulâ râh ama tah aw. Na chô liata Abeipa a ly ta, Na râh cha dyh a châ aw.

5Satlia ta laihsa kôpa a hneipa hawhta, Na sawchapawzy ta cha hnei aw ei ta; Myuhneituhpa ta myuh â lypa hawhta, Na Khazohpa ta a châ ly aw.

6Hy Zerusale y, Na thokhy chô liata riahvaituhpazy soh ha na ta, Chhô nah zâ ta ama vaih aw; A chalih beih aw veih ei. Nâmo, Abeipa a padotuhpazy saih u, Y molo khuh vy.

7Zerusale paduapathi sala, Alei chô liata reithai tlâhpa ta a tao hlâlei cha, Abeipa cha pay molosa khuh vy.

8Abeipa ta a ku chachâh lâta bie a taih ha ta, A bâh thatlôpa ta hetana heta bie â taih haw: “Na sâh cha na chariahpazy nie awpa ta Pie khao leipa aw na ta, Na hriapasana kresawhti cha, Chihropazy ta doh khao aw veih ei.

9Sâh hriatuhpazy ta nie aw ei ta, Abeipa ama reithai aw; Kre thei lyutuhpazy ta doh aw ei ta, Ei supathaihpa dôhpachhôh tlyhmia lia tlai ta ama doh aw.”

10Pua teh u, Thokhy chhikaozy tawhta pua u la, Izarei phopi châta lâpi a chhuahdy teh u. Lâlai pasâh u la, pasâh teh u; Lâlai liata alôzy thy u la, Phopizy châta ngiana poh chaluah teh u.

11Pachâ teh u, Abeipa ta phuah ha ta, Khizaw kaokih taihta a phuah haw. “Zaio sawchanô hnohta hetana heta tah teh u: ‘Moh teh, na pachhana cha a vaw tlô haw, Lymâ a pie awpa ano liata y ta, Pahleipa a thô nawpa a hmiakô liata a y.

12Chatanachata Izarei sawzy cha, Phopi Pathaihpa tah aw ei ta, Abeipa Chatlaipa ama tah aw. Nâ, Zerusale khihpi chhao, Tluapapuapa Khihpi cha tah aw ei ta; Pathlua Leipa Khihpi ama cha tah aw.’”

← Chapter 61 Jump to: Chapter 63 →