Isaiah 63

Chin (Mara Bible RV (BSI))

← Chapter 62 Jump to: Chapter 64 →

1Chysia saihdôhpa ta a tobi ta, Edômâ râh Bôzrâ khihpi tawhta a vypa hao Ahy ma a châ tly? Poh rônahpa a bu ta, Thatlô ngaitapa ta hrâ a vaw siepa hao Ahy ma a châ tly? “Keima na ei châ; Siana ta bie reih na ta, Pachha awpa ta thatlôna a hneipa ei châ,” Abeipa ta a tah.

2Khazia ma na poh kha saih ta, Na chysia kha kre saohna khaoh liata Kre thei tlytuhpa chysia a lyu tly i?

3“Keima dei ta kre saohna khaoh liata kre thei tly na ta, Phopizy hry tawhta pakha hmah ei hnohta y veih ei. Hiehâhpa ta tly ei na ta, Pathi iapa ta ei tlychheih ha ei. Chavâta ama hrona thisaih ei chysia liata a pie ta, Ei poh zydua a kia khai haw.

4Viarithôna noh ei palôh liata y ta, Ei chatlaina kô a vaw tlô haw.

5Mohmia pasaih na ta, Châhrasala nâ bao awpa y veih ei; Chi ngaita na ta, Châhrasala nâ duakhei awpa y veih ei. Chavâta pachhana cha, Keima bâh tlai ta na vaw tlôkheipa ta; Keima pathiiana tlai ta einâ duakhei.

6Ei hiehâhpa ta phopizy ei tlysao ha ei; Ei pathiiana ti padosa ei na ta, Ama hrona thisaih alei liata ei leihthapa ha ei,” Abeipa ta a tah.

7Abeipa cha ato miah pietuhpa châ ta, A zawngiahna nata a ngâchhihna lymâ hawhta, Izarei chô liata a pha ngaitapa a châ; Chavâta Abeipa ngâchhihna cha, Khâ a thei aw na ta; Abeipa reithainazy cha, Khâ ei thei thlâh ha aw.

8Abeipa ta Izarei kyh liata, “Izarei cha ei phopi châ tlai ei ta, Adoleipa ta hmo a tao lei awpa sawzy ama châ,” tah ta, Âmo Pachhatuhpa ta a y hapa a châ.

9Ama pasataona liata pasa tao hrapa ta, Ama hnohta a ypa vâlyuhchâpa ta âmo cha pachha ta, A kyhpachâna nata a ngiachhiena ta a chatlai ha ei; Kha hlâ tawhna khata âmo cha chalo ta, A pi laih tyh ei.

10Châhrasala Abeipa cha a dyuh ei ta, A Thlahpa Pathaihpa pachâ thata ama parôhsapa vâta, Abeipa cha ama chariahpa lâta a lie ha ta, Ano tlai ta â dyuh ha ei.

11Hlâno daihtizy a thei heih ei ta, Mawsi ta Abeipa phopi a chhihthana daihtizy kha amâ thei heih. Chatanachata hetana heta ama tah: “Tilaipi tawhta a phopi a chhi papuatuhpa Abeipa kha, Khataih liata a y haw? A mietaku zaw vaituhpazy chhaota Âmo a chhi papuatuhpa kha, Khataih liata a y haw? Ama hry liata a Thlahpa Pathaihpa a sohtuhpa kha, Khataih liata a y haw?

12A bâh rônahpa Mawsi ku chachâh lâta pasiesa ta, Anosasyh ta chhâzaw moh a tao awpa ta, Ama hmiakô liata tizy a pachhaihtuhpa kha, Khataih liata a y haw?

13Amâ chapia lei nawpa ta, Arâ hawhta râhchawhpa liata âmo chhihtha ta, Ti a thupazy liata âmo a chhituhpa kha, Khataih liata a y haw?

14Saikao lâ a pangaipa sahrohzy hawhta, Abeipa Thlahpa ta a phopi cha apahâna pie ta; Nâmasasyh ta moh rônahpa a tao awpa ta, Na phopi na chhihthapa kha.

15Vârâh tawhta za sai la, moh tua, Na pathaihna su tawhta za sai la, Na rônahna su tawhta za sai tua. Na phahnai ngiahna kha khataih liata y ta, Na thatlôna khataih liata a y haw? Na palôh pathyuna nata na thapasana zy kha, Eima châta pakhâpa a châ ha he zaw.

16Abarahâ ta miah pahno vei hra sala, Izarei ta miah pachâ vei hra sala, Nâ cha eima Paw mah na châ tâh. Hy Abeipa, nâ cha eima Paw châ chi ta, Na moh cha hlâno tawhta miah Chatlaituhpa a châ.

17Hy Abeipa, khazia na lâpizy tawhta miah paviasa chi ta, Eima cha chi lei nawpa ta, Eima palôh kuh na pachhasa tly? Châ chakaotuhpazy vâna heta vaw kua heih la, Na ryuto na chiphozy vâna heta vaw kua heih mah y.

18Na supathaihpa cha, Bohpi leipa chhôh deita na phopi ta hnei pi ta, Tahmâ cha eima chariahpazy ta ama tlypâ ha hih.

19Ama chô liata ryu na rei beih leipazy hawhta châ ha pi ta, Na moh a phaoh leipazy hawhta eima châ ha hih.”

← Chapter 62 Jump to: Chapter 64 →