Isaiah 2

Chin (Mara Bible RV (BSI))

← Chapter 1 Jump to: Chapter 3 →

1He he Amôza sawchapawpa Isai ta Zudâh nata Zerusale kyh a hmôpa bie a châ.

2Noh hnôhlâzy liata cha, Hetana heta a vaw châ aw: Abeipa o tlâh cha, Tlâhpi a sâh chaipazy liata paduapa a châ aw; Tlâhthlôhzy chô lâta chaluahpa châ aw ta, Râh to ta ama by aw.

3Zaio tawhta ryhpa bie pua aw ta, Zerusale tawhta Abeipa bie a pua awpa vâta, Phopi hluhpi a vy aw ei ta, “A vy teh u, Abeipa Tlâh lâ khy sih la, Zakaw Khazohpa o lâ khy suh u; A lâthlôhzy miah pachu sala, A lâpizy eimâ chhih theina hâh ta,” Ama tah aw.

4Abeipa ta râhzy likah pachia aw ta, Phopizy likah aeinazy a pathlâ aw; Ama zaozizy cha leipaliena chhaichhi lâta palie aw ei ta, Ama aseizy chhao thochiah taina chaihrai lâta ama palie aw; Phopi nata phopi ta zaozi a hy thlu khao leipa aw ei ta, A dyuhzie chhao a chu khao aw veih ei.

5Hy Zakaw pathlazy saih u, a vy u la, Abeipa khaihna liata charei ei suh u.

6Na phopi hry liata nochhi chyhsa ziehchhôhpa hmozy ta bie ta, Philistinâ mo hawhta pachaopadâhpazy tao ei ta, Chihropazy nata azaona ama taopa vâta, Na phopi cha siesai chi ta, Zakaw pathlazy cha na siesai ha ei.

7Ama râh cha tâkâ nata ngôh ta bie ta, Ama sôh nata thihzy chhâ tiah vei; Ama râh cha arâzy ta bie ta, Ama talailihzy chhâ tiah vei.

8Ama râh cha khazoh nothlahpazy ta bie ta, Ama ku ta ama taopazy hmia liata a bôh ei ta, Âmo kuparo ta a taopazy hmia liata amâ bôh tyh.

9Chavâta chyhsapa cha panawhpa châ ta, Chyhsa to pahnaipa ama châ. Âmo cha a ngiahthai kha y!

10Abeipa chichhihna nata â beina rônahna tawhta a râ u la, Lôpanô liata a ngia u la, Dohlei liata a nyu teh u.

11Chyhsa mo apasâhsana cha pahnaipa châ aw ta, Chyhsa apalaina chhao panawhpa châ aw ta, Cha noh liata cha Abeipa deita cheihchalopa a châ aw.

12A palaipa nata a khotlâhpa nata a pasâhsapa zy cha, Ama chô liata chhiena a patlôsa nawpa noh Pheisaihzy Abeipa ta hnei ta, Panawhpa ama châ aw.

13A khotlâhpa nata a pasâhsapa Lebanaw sidy thozy chô liata zy, Bâsanâ ôkâ tho zydua chô liata zy,

14Tlâhpi a sâhpa nata tlâhthlôh a chaluahpa zydua chô liata zy,

15O sâhpa nata thokhy to chô liata zy,

16Tâsi balyh zydua nata balyh angiapa zydua chô liata Chhiena a patlôsana noh a vaw tlô aw.

17Chyhsa apalaina cha panawhpa châ aw ta, Chyhsa apasâhsana chhao pahnaipa a châ aw; Cha noh liata cha Abeipa deita cheihchalopa châ aw ta,

18Khazoh nothlahpazy cha ama leidia khai aw.

19Abeipa ta alei chalyu awpa ta a thyu tita, Chyhsazy cha Abeipa chichhihna tawhta a râ aw ei ta, Â beina rônahna tawhta amâ râ aw; Lôpanô lôpuzy liata a ngia aw ei ta, Alei khaohzy liata amâ ngia aw.

20Cha noh liata cha chyhsazy ta, A chhy awpa ta âmo ta amâ taopa, Tâkâ nata ngôh nothlahpazy thy aw ei ta, Zabihzy nata pazu tâbalâpazy pahrâ nawpa ta ama siesai aw.

21Abeipa ta alei chalyu awpa ta a thyu tita, Chyhsazy cha Abeipa chichhihna tawhta a râ aw ei ta, Â beina rônahna tawhta amâ râ aw; Lôpanô lôpuzy liata a ngia aw ei ta, Alei khaohzy liata amâ ngia aw.

22Chyhsapa he ngâ khao khah y, A hnapasu liata husona a hneipa deita a châ hih; Pasâhsa kaw nawpa khâpa a hnei tly?

← Chapter 1 Jump to: Chapter 3 →