Isaiah 39

Chin (Mara Bible RV (BSI))

← Chapter 38 Jump to: Chapter 40 →

1Cha daihti liata, Bâladâ sawchapawpa Babylaw bei Merôdâ Bâladâ ta Hezekia tlâhleipa thâtih vaw thei ta. Hezekia lâta vyuhtuapazy tuah ta, châ nata kuhria zy paphao ta.

2Hezekia ta âmo cha a ly kawpa ta a vaw ly ta. A ryusôhpa sona o zydua pamosa ta. Tâkâzy, ngôhzy, ia-ôzy, sathaw sôhpazy nata a chariah chhaichhizy â kipa ta pamosapa ta, ryusôhpa sopakhyna ozy liata a ypazy pahmô khai ta. A o liata hmo a ypa nata a râh chhôh liata hmo a ypa zydua Hezekia ta âmo a pahmô leipa y vei.

3Chatawhcha hrohsopa Isai cha Bei Hezekia lâ vawh ta, a hnohta, “Kha chyhsazy kha khâpa bie ma ama reih? Khataih tawhta nâ lâ a vypa ma ama châ?” tah ta. Hezekia ta, “Râh hla ngaitapa, Babylaw râh tawhta kei lâ a vypa ama châ,” tah ta.

4Isai ta, “Na o liata khâpa ma ama hmô?” tah ta. Hezekia ta a chhy ta, “Ei o liata a ypa zydua ama hmô khai. Ei hmo sopakhyna ozy liata hmozy âmo ei pahmô leipa ei y vei,” tah ta.

5Isai ta Hezekia hnohta, “Pheisaihzy Abeipa bie nathlie teh:

6Pachâ teh, na o liata a ypa zydua nata châ pathlatuhpazy ta tanoh taihta ama vaw pachôpakhypa hmo zydua Babylaw lâ ama siekhei nawpa nohzy a vaw tlô hai. Khâpa hmah pahlôhpa châ aw vei, Abeipa ta a tah.

7Na sawchapawpa, na chhôh tawhta a pua awpa, nâ ta na sa awpazy tlai chhao siekheipa châ aw ei ta, Babylaw abei o liata hrilyupa ta ama y aw, a tah,” tah ta.

8Hezekia ta Isai hnohta, “ Abeipa bie na reipa cha a pha na,” tah ta. “Ei hro chhôh ta cha thlalôhna nata abohna a y aw,” tahpa ta a pachâpa vâta, cha bie cha a reipa a châ.

← Chapter 38 Jump to: Chapter 40 →