Isaiah 3

Chin (Mara Bible RV (BSI))

← Chapter 2 Jump to: Chapter 4 →

1Moh tua u, Pheisaihzy Abeipa Zehôvâh ta Zerusale nata Zudâh apahniehnazy a la khai ha hih; Niedo zydua la khai ha ta, Ti zydua a la khai haw.

2Pasaiphazy nata pheisaihzy, Ryureituhpazy nata hrohsopazy, Pachaothaipazy nata machâzy,

3Pheisaih sypangawh hyutuhpazy nata chyhsa molaipazy, Ryhraotuhpazy nata moliethaipazy la ta, Peihthaipazy a la khai ha ei.

4Thyudyupazy cha ama beimachâzy ta tao aw na ta, Hawtizy ta ama chô liata ryu ama reih aw.

5Chyhsazy amâ tlybai raihrie aw: Ama chyhsa châ lâhpazy tlybai aw ei ta, Ama vaihzy ama tlybai aw. Thyutliapa ta machâpa chô liata sâlâ kaw aw ta, Chyhsa nawhpa chhao zachhihpa chô liata a sâlâ kaw aw.

6Chyhsa ta a unawhpa cha a paw o liata patu aw ta, “Nâ cha chysia hnei chi ta, Chavâta eima chhituhpa ta y mah y; He raona â pathlupa he, Na ryureina ry liata a y aw,” tah aw ta,

7Châhrasala cha noh liata a unawhpa ta, “Kei la hmah chahrytuhpa châ aw va na, Ei o liata viahchhâ nata chysia y hra vei, Phopi chhituhpa ta na tao aw veih ei chi,” Tahpa ta â chhy aw.

8Ama bie nata ama hmotaopazy ta Abeipa chakhia ta, A rônahna hmia chhao thlah ama sa leipa vâta, Zerusale cha a chapia ta, Zudâh a pao haw.

9Ama hmia phao ta ama châna palâsa ta, Ama moleina Sawdawmâ hawhta ama phuah; Nyu veih ei. Ama hu a po na! Âmosasyh ta raona amâ taopa a châ.

10Mosiapazy cha ama châta a pha aw tahpa chho mah y, Ama hmotaopa theilâpa ama nie aw.

11Moleipa cha a hu a po na! Chhiena a tyh aw ta, A hmotaopazy viarithôpa a châ aw.

12Hawsaihzy ta ei phopi chhihtha ei ta, Chanôzy ta ama chô liata ryu ama reih. Hy ei phopi, châ chhituhpazy ta cha chhihtha chhei ei ta, Nama sie nawpa kyh liata noraihpa ta ama cha tao haw.

13Abeipa cha a ryureina dyuchhai liata a tyuh ta, Phopizy pachia awpa ta â vaw duah.

14Abeipa ta a phopi machâzy pachia ta, A chhituhpazy a pachia; “Kre sadô a nie khaipa cha, Nâmo tlai he châ ei chi ta; Nama ozy liata, Dyhchhiepazy hraona sôh a y.

15Kheihta ma dyhchhiepazy hmia chariehpa ta, Ei phopi cha nama chanaoh ngâ tly?” Pheisaihzy Abeipa Zehôvâh ta a tah.

16Abeipa ta hetana heta a tah: “Zaio sawchanôzy cha a khotlâh kawpa ta, Ama rao pachhuapa ta a hlaihlâ ei ta, Ama mozy ta sydie ei ta, Ama chao chamieh chamâpa ta, Ama phei lâkyuzy ama parosa laihpa vâta,

17Zaio sawchanôzy cha, Abeipa ta ama luh hmah paysa aw ta, Zehôvâh ta luh pôlôpa ta a tao aw ei.”

18Cha noh liata, Abeipa ta amâ tobina zydua, ama phei lâkyuzy, luh chazaina pohzy, thlâpâ diehpa lyupa ta taopa pachhihzy;

19rahyzy, lâkyuzy, raoao pohzy;

20luh khunazy, phei kalyzy, chaisaihnazy, ropahâhpa byhzy, chhiena a tyh lei nawpa ta a kypazy;

21kusadizy nata hnapasu rahyzy,

22kyhchhi chysiazy, ngiatlâh baipa pohzy, viahkao pasipazy, sahriazy;

23thlalâzy, poh rih dipazy, khuthozy nata hmiakhunazy a pahluhpa khai aw ei.

24Ropahâhpa vyuhpa ta hmo thupa vaw y aw ta, Chaisaihna vyuhpa ta chaori a y aw. Sâ mihpa vyuhpa ta luh pôlôna y aw ta, Poh ngiapa vyuhpa ta latho hnorâh y aw ta, Chhithaina vyuhpa ta nozana a y aw.

25Na chapawzy zaozi ta pao aw ei ta, Na pasaiphazy adyuhna liata ama pao aw.

26A thokhy chhikaozy cha, Chaphôhtupa ta mâchhiesa aw ei ta; Ziahzirohpa ta alei liata â tyuh aw.

← Chapter 2 Jump to: Chapter 4 →