Deuteronomy 23

Gaelic - Comann Bhìoball na h-Alba 1992, 2017

← Chapter 22 Jump to: Chapter 24 →

1Cha tèid esan aig a bheil a chlachan air am bruthadh, no a bhall diamhair air a ghearradh dheth, a‑steach do cho-chruinneachadh an Tighearna.

2Cha tèid fear dìolain a‑steach do cho-chruinneachadh an Tighearna; eadhon gu ruig an deicheamh ginealach cha tèid e a‑steach do cho-chruinneachadh an Tighearna.

3Cha tèid Amonach no Mòabach a‑steach do cho-chruinneachadh an Tighearna; eadhon gus an deicheamh ginealach cha tèid iad a‑steach do cho-chruinneachadh an Tighearna a‑chaoidh;

4A chionn nach do choinnich iad sibh le aran agus le uisge air an t‑slighe, nuair a thàinig sibh a‑mach as an Eiphit, agus a chionn gun do thuarasdalaich iad ad aghaidh Balàam mac Bheoir, o Phetor na Mesopotamia, a‑chum do mhallachadh.

5Gidheadh, chan èisdeadh an Tighearna do Dhia ri Balàam; ach thionndaidh an Tighearna do Dhia dhut am mallachadh gu beannachadh, a chionn gum bu toigh leis an Tighearna do Dhia thu.

6Chan iarr thu an sìth no an sonas rè d’uile làithean gu bràth.

7Cha ghabh thu gràin de Edomach, oir is e do bhràthair e: cha ghabh thu gràin de Eiphiteach, a chionn gu robh thu ad choigreach na fhearann.

8Thèid a’ chlann a ghinear leòsan a‑steach do cho-chruinneachadh an Tighearna, nan treas ginealach.

9Nuair a thèid d’fheachd a‑mach an aghaidh do naimhdean, an sin glèidh thu fhèin o gach droch nì.

10Ma bhios nur measg duine sam bith nach eil glan, a‑thaobh neòghlaine a thàrlas dha anns an oidhche, an sin thèid e a‑mach as a’ champ, cha tig e a‑steach do mheadhon a’ champa:

11Ach nuair a bhios e dlùth don fheasgar, an sin nighidh e e fhèin le uisge, agus nuair a thèid a’ ghrian fodha, thig e a‑steach do mheadhon a’ champa.

12Bidh agad àite mar an ceudna an taobh a‑muigh den champ, far an tèid thu a‑mach.

13Agus bidh pleadhag agad air do chrios, agus nuair a shuidheas tu a‑muigh, cladhaichidh tu leatha, agus tionndaidhidh tu air d’ais, agus falaichidh tu an nì a thig uat.

14Oir tha an Tighearna do Dhia ag imeachd am meadhon do champa, a‑chum do shaoradh, agus a‑chum do naimhdean a thoirt thairis romhad: uime sin bidh do champ naomh, a‑chum nach faic e nì sam bith neòghlan annad, agus nach till e air falbh uat.

15Cha toir thu suas da mhaighistir an seirbhiseach a chaidh as ad ionnsaigh o a mhaighistir.

16Maille riut gabhaidh e còmhnaidh nur measg, anns an àit a thaghas e, an taobh a‑staigh aoin ded gheatachan far an taitniche leis: cha dèan thu fòirneart air.

17Cha bhi strìopach air bith de nigheanan Israeil, cha mhò a bhios Sòdomach de mhic Israeil.

18Cha toir thu tuarasdal strìopaich, no luach coin, do thaigh an Tighearna do Dhia airson bòid sam bith; oir tha iad sin eadhon le chèile nan gràinealachd don Tighearna do Dhia.

19Cha toir thu nì sam bith an coingheall dod bhràthair air riadh; riadh airgid, riadh bìdh, riadh nì sam bith a bheirear an coingheall air riadh.

20Do choigreach faodaidh tu nì a thoirt an coingheall air riadh, ach dod bhràthair cha toir thu nì sam bith an coingheall air riadh; a‑chum gum beannaich an Tighearna do Dhia thu anns gach nì ris an cuir thu do làmh anns an fhearann da bheil thu a’ dol ga shealbhachadh.

21Nuair a bheir thu bòid don Tighearna do Dhia, cha dèan thu moille na h‑ìocadh: oir gu cinnteach iarraidh an Tighearna do Dhia uat i; agus bhiodh e na pheacadh dhut.

22Ach ma dh’fhanas tu gun bhòid a thabhairt, cha bhi e na pheacadh dhut.

23An nì sin a chaidh a‑mach as do bhilean, coimheadaidh agus coileanaidh tu; a rèir mar a bhòidich thu don Tighearna do Dhia, eadhon tabhartas saor-thoile, a gheall thu led bheul.

24Nuair a thèid thu a‑steach do fhìonlios do choimhearsnaich, an sin faodaidh tu fìondhearcan ithe mar as miann leat, eadhon do shàth; ach cha chuir thu a’ bheag ad shoitheach.

25Nuair a thèid thu a‑steach do arbhar do choimhearsnaich, an sin faodaidh tu na diasan a spìonadh led làimh, ach corran cha chuir thu ann an arbhar do choimhearsnaich.

← Chapter 22 Jump to: Chapter 24 →