Deuteronomy 6

Gaelic - Comann Bhìoball na h-Alba 1992, 2017

← Chapter 5 Jump to: Chapter 7 →

1A‑nis is iad seo na h‑àitheantan, na reachdan, agus na breitheanais, a dh’àithn an Tighearna ur Dia a theagasg dhuibh, a‑chum gun dèanadh sibh iad anns an fhearann da bheil sibh a’ dol ga shealbhachadh:

2A‑chum gum biodh eagal an Tighearna do Dhia ort, gun gleidheadh tu a reachdan uile, agus a àitheantan, a tha mise ag àithneadh dhut, thu fhèin, agus do mhac, agus mac do mhic, uile làithean do bheatha, agus a‑chum gum buanaichear do làithean.

3Eisd uime sin, O Israeil, agus thoir an aire gun dèan thu seo, a‑chum gun èirich gu math dhut, agus gum fàs sibh ro‑lìonmhor, mar a gheall an Tighearna Dia d’athraichean dhut, ann am fearann a tha a’ sruthadh le bainne agus mil.

4Eisd, O Israeil: An Tighearna ar Dia-ne, is aon Tighearna e.

5Agus gràdhaichidh tu an Tighearna do Dhia led uile chridhe, agus led uile anam, agus led uile neart.

6Agus bidh na briathran seo, a tha mi ag àithneadh dhut an‑diugh, ann ad chridhe;

7Agus teagaisgidh tu iad dod chloinn, agus labhraidh tu orra nuair a shuidheas tu ad thaigh, agus nuair a dh’imicheas tu air an t‑slighe, agus nuair a laigheas tu sìos, agus nuair a dh’èireas tu suas.

8Agus ceanglaidh tu iad mar chomharradh air do làimh, agus bidh iad mar aodannain eadar do shùilean.

9Agus sgrìobhaidh tu iad air ursainnean do thaighe, agus air do gheatachan.

10Agus nuair a bheir an Tighearna do Dhia thu don fhearann a mhionnaich e dod athraichean, do Abrahàm, do Isaac, agus do Iàcob, gun tugadh e dhut bailtean mòra agus matha, nach do thog thu fhèin,

11Agus taighean làn de gach nì math nach do lìon thu, agus tobraichean cladhaichte nach do chladhaich thu, fìonliosan agus liosan-ola nach do shuidhich thu, nuair a dh’itheas tu agus a bhios tu air do shàsachadh;

12An sin thoir an aire air eagal gun dìochuimhnich thu an Tighearna, a thug a‑mach thu à tìr na h‑Eiphit, à taigh na daorsa.

13Bidh eagal an Tighearna do Dhia ort, agus nì thu seirbhis dha, agus mionnaichidh tu air a ainm.

14Cha tèid sibh an dèidh dhiathan eile de dhiathan an t‑sluaigh a tha mun cuairt oirbh;

15(Oir tha an Tighearna do Dhia na Dhia eudmhor nur measg;) air eagal gun las fearg an Tighearna do Dhia ad aghaidh, agus gun sgrios e thu o aghaidh na talmhainn.

16Cha bhrosnaich sibh an Tighearna ur Dia, mar a bhrosnaich sibh e ann am Masah.

17Gleidhidh sibh gu dìcheallach àitheantan an Tighearna ur Dia, agus a theisteis, agus a reachdan, a dh’àithn e dhut.

18Agus nì thu an nì sin a tha ceart agus math ann an sealladh an Tighearna; a‑chum is gun èirich gu math dhut, agus gun tèid thu a‑steach, agus gun sealbhaich thu am fearann math a mhionnaich an Tighearna dod athraichean;

19A thilgeadh a‑mach do naimhdean uile romhad, mar a labhair an Tighearna.

20Nuair a dh’fhiosraicheas do mhac dhìot anns an aimsir ri teachd, ag ràdh, Ciod as ciall do na teisteis, agus do na reachdan, agus do na breitheanais a dh’àithn an Tighearna ar Dia dhuibh?

21An sin their thu rid mhac, Bha sinn nar tràillean aig Phàraoh anns an Eiphit, agus thug an Tighearna a‑mach sinn as an Eiphit le làimh chumhachdaich.

22Agus nochd an Tighearna comharraidhean agus iongantasan mòra agus doilgheasach anns an Eiphit, air Phàraoh, agus air a theaghlach uile, fa chomhair ar sùl;

23Agus thug e a‑mach sinn as a sin, a‑chum gun tugadh e sinn a‑steach, a thoirt dhuinn an fhearainn a mhionnaich e dar n‑athraichean.

24Agus dh’àithn an Tighearna dhuinn na reachdan sin uile a dhèanamh, eagal an Tighearna ar Dia a bhith oirnn a‑chum ar maith a‑ghnàth, a‑chum gun gleidheadh e beò sinn, mar air an là‑an‑diugh.

25Agus bidh e na fhìreantachd dhuinn, ma bheir sinn fa‑near na h‑àitheantan seo uile a dhèanamh, an làthair an Tighearna ar Dia, mar a dh’àithn e dhuinn.

← Chapter 5 Jump to: Chapter 7 →