Acts 26

Guarani 1970 (Ñandeyara Ñe'ẽ)

← Chapter 25 Jump to: Chapter 27 →

1Upérõ Agripa he'i Páblope: --Ikatu reñe'ẽ nde jehe. Ha Pablo ohupi ipo ha oñepyrũ oñe'ẽ kóicha:

2--Avy'a eterei ikatuha rehe añe'ẽ ne renondépe, rey Agripa, aipe'a haguã che jenegui opa umi Israelita kuéra he'i va'ekue che rehe,

3hi'arieteve nde reikuaaha rehe opa umi jepokuaaha Israelita kuéra roguerekóva ha umi mba'e roñoñe'ẽjoapiha. Upéva rehe ajerure ndéve che rendumi haguã rejahéi'ỹ rehe che rehe.

4‘Opavave umi Israelita aikuaa porã mba'éichapa aiko raka'e ijapytépe kuéra che retãme ha Jerusalénpe che mitã guive.

5Ha'e kuéra oikuaa avei, ha ikatu he'i he'ise ramo, che mitãrusu guive fariseo hague che, pe ipohyivéva ore religiónpe.

6Ha ko'ãga che reru hikuái mburuvicha kuéra renondépe pe arovia haguete rehe Tupã Ñandejára omoingove jevytaha omano va'ekuépe, ome'ẽ haguéicha iñe'ẽ ore ru kuéra ypykuépe.

7Umi doce tribu Israel pegua oha'arõva ohecha haguã oiko ramo hekoitépe upe ñe'ẽ, ha upéva rehe omomba'eguasúva ha ojejokuaiukáva Tupã Ñandejárape ára ha pyharépe. Ko jerovia kovaete rehe niko che moĩ vai hikuái ko'ãga umi Israelita, nde rey Agripa.

8¿Mba'e, ndaperoviái piko peẽ Tupã Ñandejára omoingove jevyha omanóvape?

9‘Che voi yma aimo'ã va'ekue ajapo va'erãha heta mba'e vai Jesús Nazareno réra rehe,

10ha upéicha ajapo va'ekue Jerusalénpe. Pa'i ruvicha kuéra rupi che amoinge va'ekue cárcelpe heta umi ojeroviávape Jesús rehe; ha ojejuka ramo, che aime va'ekue peteĩ ñe'ẽme upévape.

11Heta jevy che ainupã va'ekue ichupe kuéra ambojevy haguã pe ijerovia kuéragui. Upéva ajapo opa umi sinagogaha rupi, ha che pochy etereígui hese kuéra apersegui umi ciudad tetã ambuegua kuéra peve.

12‘Upevarã aha che pe ciudad Damasco héravape, pa'i ruvicha kuéra ome'ẽ chéve autoridad ha che mondo.

13Pe tapére katu nde rey, ára mbyte jave ahecha yvágagui che resape imbaretevéva kuarahy resapégui, omimbipáva che ha umi chendive ohóva jerekuévo.

14Upévo ro'apa yvýpe, ha ahendu peteĩ ñe'ẽ he'íva chéve hebreo ñe'ẽme: “Saulo, Saulo, ¿mba'érepa che persegui? Rejekutupa niko reína ndejupe ndete voi, ku guéi opyvoírõ guáicha ikutuha apỹi rehe.”

15Upérõ ha'e: “¿Máva piko nde, Karai?” Ha Ñandejára he'i chéve: “Che ha'e Jesús, upe nde reperseguíva reína.

16Upéicharamo jepe epu'ã ha eñembo'y, ajechauka ndéve reiko haguã che rembiguái ramo ha remombe'u haguã ko rehecha va'ekue ko'ãga ha umi rehecha vaerã upéi.

17Roipe'áta umi Israelita ha tetã ambuegua kuéra pógui avei, ha hendápe kuéra ko'ãga romondo.

18Romondo hendápe kuéra rehesape'a haguã ichupe kuéra, anive haguã oguata pytũnguy rupi tesapeha rupínte, ha anive haguã oiko Satanás poguýpe, Tupã Ñandejára poguýpente, ha ojerovia haguã che rehe ha ohupity haguã upéicha rupi perdón ipecádo kuéragui ha imba'erã kuérava imarangatúva apytépe.”

19‘Upéva rehe, nde rey Agripa, che ñe'ẽrendu pe yvága pegua ahecha va'ekuépe,

20ha aikuaauka uvei pe ñe'ẽ umi oĩ va'ekue Damáscope raẽvetépe, upéi katu Jerusalén pegua kuérape ha opárupi Judéape ha umi Israelita'ỹvape avei, ha'évo ichupe kuéra oñearrepenti ha ojevy haguã Tupã Ñandejára rendápe, ha hembiapo kuéra rupi tohechauka oñearrepenti hague.

21Upéva rehe umi Israelita che japyhy pe tupaópe ha che jukase mo'ã hikuái.

22Opáichavo, Tupã Ñandejára che pytyvõ rupi aime hatã ko'ãga peve, ha aikuaauka pe iñe'ẽ opavavépe, michĩva ha tuichávape. Araka'eve nda'évai ichupe kuéra mba'eve umi ñemoñe'ẽhára ha Moisés he'i'ỹ va'ekue ojehu va'erãha.

23Pe Cristo ohasa asy vaerã hague, omano rire katu ha'e raẽvete oikove jevy vaerã hague omanóva apytégui, ha oikuaauka vaerã hague pe ñe'ẽ oporohesapéva ñane retãyguape ha tetã ambueguápe upéichante avei.

24He'ívo Pablo ko'ã mba'e ojehe, Festo osapukái: --¡Nde tarova niko Pablo! Ne arandu etereígui nde tarova.

25Pablo katu he'i: --Nda che tarovái niko nde Festo karai guasuete; añetegua uvei pe ha'éva.

26Kóina ápe rey Agripa, oikuaa porãva ko'ã mba'e, ha upéva rehe añe'ẽ kyhyje'ỹete reheve hovake; aikuaa porãgui ha'e avei oikuaapaha ko'ã mba'e, ndaha'éigui mba'e ojejapo va'ekue ñemiháme.

27¿Reroviápa rey Agripa, umi ñemoñe'ẽhára he'i va'ekue? Che aikuaa reroviaha.

28Agripa he'i ichupe: --Háime háime rejapo che hegui cristiano.

29Upérõ Pablo he'i ichupe: --Ta michĩ terã ta tuicha rehe, Tupã Ñandejára tamo ojapo, ha ani nde hegui añó, opa che rendúva hína ko árapegui uvei toiko chéicha, anínte ko'ã cadena reheve.

30Pablo he'ipa rire ko'ã mba'e, opu'ã pe rey ha pe mburuvicha ambue Berenice ndive ha opa umi oguapy va'ekue hína upépe,

31ha oñemoha'eño hikuái oñomongeta haguã upe mba'e rehe. Ha he'i ojupe: --Ko kuimba'e niko ndojapói mba'evete ikatu vaerã rehe omano terã oĩ cárcelpe.

32Ha Agripa he'i Féstope: --Ikatu vaerã mo'ã ojepoi ko kuimba'égui ha'ete voi ojerure'ỹ rire mburuvicha guasu emperador ombojovake haguã ichupe.

← Chapter 25 Jump to: Chapter 27 →