1 Kings 14

Gussi (EBIBILIA ENCHENU) 2020

← Chapter 13 Jump to: Chapter 15 →

1Ase engaki eria Abiya, omomura o Yeroboamu akarwara.

2Ase ayio Yeroboamu agatebia mokaye, “Imoka, bwekone ase ogwetuba, erinde tomanyekana ng’a aye moka Yeroboamu; ogende Silo. Ahiya omobani nao akare, oria ontebetie ng’a nimbe omoruoti igoro ase abanto aba.

3Oire amo naye emegati ikomi, na amaandasi, na obooke egetono ekemo, ogende asare; ere nagotebie egento kegochia gokororekana ase omwana.”

4Moka Yeroboamu akaimoka akagenda Silo, agacha ase enyomba y’Ahiya. Bono Ahiya tarenge korora, ekiagera amaiso aye konya oukoire ase engencho y’obogotu.

5Omonene agakwana n’Ahiya, akamotebia, “Rora, moka Yeroboamu ngocha are gokoboria amanye igoro y’omwana oye ore omorwaire. Aya na aya naro oramotebie.” Ekero omokungu oria achete asare agekora buna omokungu omoao.

6Korende ekero Ahiya aigwete eriogi ri’amagoro aye agotitiria, na ekero omokungu oria arenge gocha ase egesieri, Ahiya akamotebia, “Inchuo soa nyomba, aye moka Yeroboamu! Nase ki ogwekora koba buna omokungu omoao? Nachikirwe kogotebia amang’ana amakong’u.

7Genda otebie Yeroboamu: Aya naro Omonene, Nyasae bw’Abaisraeli, agoteba: Nakoimokereretie igoro korwa ase egati y’abanto, naende ngakobeka okaba omoraai bw’abanto baane Abaisraeli.

8Naende ngatandorana oboruoti, nkaborusia korwa ase enyomba ya Daudi, ngakoboa aye, korende aye tobeti buna Daudi, omosomba one arenge, oria orendete amachiko aane, na agantunyana nenkoro yaye yonsi. Ere agakora onsi ayare amaronge ase amaiso aane.

9Korende aye gwakorire ayare amabe goetania baria bonsi bagotang’anerete. Naende gwekoreire chinyasae ching’ao, na kweroiseirie emegwekano enyititoire na kobombwa, na igo kwangechirie goika nabeire nendamwamu kwangire na konyeba.

10Ase ayio, rora, nindete obobe igoro ase enyomba yao aye Yeroboamu, ninsirie kegima kera omonto omosacha korwa ase enyomba yao, abasomba amo nabatari abasomba, ase egati y’Abaisraeli. Ninsirie kegima enyomba yao aye Yeroboamu, buna omonto akwabusa obonyira bwarua, kegima.

11Omonto onde bwensi bw’enyomba ya Yeroboamu orakwere ase omochie ime, chisese nachimorie, na onde bwensi orakwere isiko aarabu, chinyoni chia igoro nachimorie, ekiagera Omonene nere okwanire ring’ana eri.

12“Ase ayio, genda nka bwoo. Ekero amagoro ao agosoa ase omochie omwana oria nakwe.

13Abaisraeli bonsi mbamoreere na komotindeka. Omwana oria bweka ase eamate ya Yeroboamu, nere oratindekwe ase embeera ime, ekiagera asere oyio Omonene, Nyasae bw’Abaisraeli, ororire egento kiamogokirie korwa ase enyomba ya Yeroboamu.

14Korende Omonene nechorere omoruoti oragambere Abaisraeli, na omoruoti oyio nasirie kegima enyomba ya Yeroboamu, na ayio nakoreke korwa bono.

15Omonene naake Abaisraeli abanyegerie buna egetonto gekonyegerigwa ime ase amache, nabasimore barue ase ense eye engiya aete chisokoro chiabo, abasiarere gochia ng’umbu y’Eufarati, ekiagera barabwo bakorire emete y’Asera, enyasae yabo enkungu, na igo bagechirie Omonene obeire nendamwamu.

16Ere natige Abaisraeli ase engencho y’ebibe ebi Yeroboamu akorete, akagera Abaisraeli bagakora ebibe.”

17Erio moka Yeroboamu akaimoka, akagenda Tirisa, na ekero agotamboka omoriibo o inse bw’egesieri ki’enyomba omwana oria agakwa.

18Na Abaisraeli bonsi bakamotindeka na komoreera, koreng’ana buna ring’ana riria Omonene akwanete goetera ase omobani Ahiya, omosomba oye.

19Bono amang’ana ande onsi Yeroboamu akorete, buna arwanete chisegi, na buna agambete, nigo arikire ase Ebuku y’ogokora kw’Abaruoti b’Abaisraeli.

20Yeroboamu akaba okogamba ase engaki y’emiaka emerongo ebere, na ebere. Erio akarara ase chisokoro chiaye chiararete, na Nadabu, omwana oye omomura, akaba okogamba ase ribaga riaye.

21Bono Rehoboamu, mosinto o Sulemani, akagambera Abayuda. Ekero achagete kogamba konya okoorire emiaka emerongo ene nomo, akaba okogamba ase engaki y’emiaka ikomi, na etano na ebere, agwo Yerusalemu, omochie oria Omonene achorete korwa ase egati y’ebisaku bionsi bi’Abaisraeli, erinde abeke erieta riaye aroro. Ng’ina Rehoboamu nigo arenge korokwa Naama, omosubati bw’Abaamoni.

22Abayuda bagakora ayare amabe ase obosio bw’Omonene, bakagera akaba nendamwamu ase engencho y’ebibe biabo bakorete ebinge goetania ebi bionsi chisokoro chiabo chiakorete.

23Barabwo bakeagachera aase aimokererete igoro agosasimerwa, ne chisiiro, na emete y’Asera, enyasae yabo enkungu, igoro ase ebigoro bionsi na inse ya kera omote omobese.

24Mbarenge aroro ase ense eria abasacha abanyaka bakarigania ase obosooku. Abanto abwo bagakora okogechia konde gwonsi okwo abanto b’ebisaku biria Omonene aseretie korwa ase Abaisraeli barenge gokora.

25Ase omwaka o gatano bw’okogamba kwa Rehoboamu, Sisaki, omoruoti o Misiri, agacha, akarwania Yerusalemu.

26Akaira chikungo chionsi chi’enyomba y’Omonene na echi’enyomba y’omoruoti, akaira kera egento. Boigo akaira chinguba chionsi chi’etahabu, chiria Sulemani aroisetie.

27Erio Rehoboamu omoruoti akagoncha chinguba chi’etaai ribaga rie chinguba chiria chi’etahabu, agachibeka ase amaboko ’abanene b’oborendi, baria barenge korenda egesieri ki’enyomba y’omoruoti.

28Botambe ekero omoruoti arenge gosoa ase enyomba y’Omonene, abarendi nigo barenge gochibogoria, naende bachiirania ase enyomba y’oborendi.

29Na bono amang’ana ande onsi igoro ya Rehoboamu, na aya onsi akorete, nigo arikire ase Ebuku y’ogokora kw’Abaruoti b’Abaisraeli.

30Esegi nigo yagendererete botambe ase egati ya Rehoboamu na Yeroboamu.

31Rehoboamu akarara ase chisokoro chiaye chiararete, agatindekwa aase chiatindegetwe, ase omochie o Daudi. Ng’ina Rehoboamu nigo arenge korokwa Naama, omosubati bw’Abaamoni. Abiyamu, omwana oye omomura, akaba okogamba ase ribaga riaye.

← Chapter 13 Jump to: Chapter 15 →