1 Kings 15

Gussi (EBIBILIA ENCHENU) 2020

← Chapter 14 Jump to: Chapter 16 →

1Ase omwaka o ikomi na gatano na gatato bw’okogamba kw’omoruoti Yeroboamu, mosinto o Nebati, Abiyamu agachaka kogambera Abayuda,

2akaba okogamba ase engaki y’emiaka etato agwo Yerusalemu. Ng’ina nigo arenge korokwa Maaka, omosubati bw’Abisalomu.

3Abiyamu akabwatia chingencho chia ise ase ogokora ebibe, na tarenge nobwegenwa bw’enkoro ase Omonene, Nyasae oye, buna Daudi, sokororia yaye arenge.

4Korende nonya naboigo, ase engencho ya Daudi Omonene, Nyasae oye, akamoa etaya agwo Yerusalemu ase ogotenenia omwana oye agambe, naende agakong’ia Yerusalemu.

5Aya igo akoregete, ekiagera Daudi nigo akorete ayare amaronge ase obosio bw’Omonene, na ase obogima bwaye bwonsi, tamochete gokora kende gionsi Omonene amochigete, otatiga ase amang’ana a Uria Omohiti oka amochete.

6Esegi nigo yagendererete koba egati ya Rehoboamu na Yeroboamu ase obogima bwonsi bwa Rehoboamu.

7Amang’ana ande onsi igoro y’Abiyamu, na aya onsi akorete, nigo arikire ase Ebuku y’ogokora kw’Abaruoti b’Abayuda. Na esegi nigo yarenge ase egati y’Abiyamu na Yeroboamu.

8Abiyamu akarara ase chisokoro chiaye chiararete agatindekwa ase Omochie o Daudi, na Asa, omwana oye omomura, akaba okogamba ase ribaga riaye.

9Ase omwaka bw’emerongo ebere bw’okogamba kwa Yeroboamu, omoruoti bw’Abaisraeli, Asa agachaka kogambera Abayuda.

10Ere akaba okogamba ase engaki y’emiaka emerongo ene, nomo, agwo Yerusalemu. Ng’ina Asa nigo are korokwa Maaka, mosubati bw’Abisalomu.

11Asa agakora ayare amaronge ase amaiso ’Omonene, buna Daudi, sokororia yaye, akorete.

12Agasiria korwa ase ense eria abasacha baria abanyaka barenge korigania ase obosooku, naende akarusia aroro emegwekano y’ogosasimwa, eria chisokoro chiaye chiaroisetie.

13Boigo Asa akarusia Maaka ng’ina taba eting’ana, ekiagera nabwate omogwekano orenge okogechia oroiseretigwe Asera, enyasae eria enkungu, akabutora na akaiyeria inse omogwekano oria ng’ina abwate, akayosambera agwo ase akarooche ga Kidironi.

14Korende aase aimokererete igoro tarusetigweo. Nonya naboigo, ase obogima bwaye bwonsi Asa nigo arenge nenkoro y’obwegenwa ase Omonene.

15Akarenta ase enyomba y’Omonene ebiegwa ebi ise na ere omonyene baatananete bikaba ebichenu, chifeta, ne chitahabu, na ebikorero.

16Esegi nigo yagendererete koba egati y’Asa na Baasa, omoruoti bw’Abaisraeli, ase amatuko abo onsi.

17Baasa, omoruoti bw’Abaisraeli, akagenda korwania Abayuda, akagitera omochie o Rama chindwaki, ng’a nario ribaga ritabaisa gotoka ase omonto onde bwensi gosoka gose gosoa kogenda ase Asa, omoruoti bw’Abayuda.

18Erio Asa akarusia chifeta chionsi, ne chitahabu chionsi, echio chiatigarete ase chikungo chi’enyomba y’Omonene, na echi’enyomba y’omoruoti, agachibeka ase amaboko ’abasomba baye. Erio agatoma ebinto ebio gochia ase Damesiki ase Beni‐Hadadi, mosinto o Tabirimoni, o Hesioni, omoruoti o Siiria, amenyete, agateba,

19“Tiga okobwatana kw’ogotianania kobe ase egati yane naye, buna kwarenge ase egati ya tata na iso. Rora nagotomeire ekeegwa gie chifeta ne chitahabu. Genda osarie okobwatana okwo kwao gwakorete na Baasa, omoruoti bw’Abaisraeli, erinde arue ase ense yane antigane.”

20Beni‐Hadadi akaigwera Asa omoruoti, agatoma abatang’ani b’abarwani baye, bakagenda bakarwania emechie y’Abaisraeli, bakabua Iyoni na Dani, na Abeli‐Beti‐Maaka, na Kinereti, yonsi, amo nense yonsi ya Nafutali.

21Na ekero Baasa aigwete amang’ana ayio, agatiga kogitera omochie o Rama, akagenda komenya agwo Tirisa.

22Erio omoruoti Asa akarua okoraria ase Abayuda bonsi, nonya nomonnto oyomo tatigetwe otakonye koira amagena a Rama, amo ne chibao chiarengeo, ebinto ebio bionsi Baasa arenge kogitera omochie oria; na ase ebinto ebio omoruoti Asa akagitera Geba ase orogongo rwa Benjamin amo na Misipa.

23Bono amang’ana ande onsi igoro y’Asa, okobua kwaye na onsi aya akorete na emechie aagachete, nigo arikire ase Ebuku y’ogokora kw’Abaruoti b’Abayuda. Korende ekero ki’obogotu bwaye akarwara amagoro.

24Asa akarara, ase chisokoro chiaye chiararete, agatindekwa ase omochie o Daudi, sokororia yaye, na Yehosafati, omwana oye omomura, akaba okogamba ase ribaga riaye.

25Nadabu, mosinto o Yeroboamu, agachaka kogambera Abaisraeli ase omwaka o kabere bw’okogamba gw’Asa, omoruoti bw’Abayuda, akagamba ase engaki y’emiaka ebere.

26Ere agakora ayare amabe ase obosio bw’Omonene, akabwatia chinchera chia ise ase ogokora ebibe ebio bikagera Abaisraeli bagakora ebibe.

27Baasa, mosinto bw’Ahiya, omonto bw’enyomba ya Isakaru, agakora omoroberio bw’ogoita Nadabu, akamoaka, akamoitera agwo Gibetoni, omochie bw’Abafilisti. Nadabu na Abaisraeli bonsi nigo bebisete baboerete Gibetoni.

28Ase omwaka o gatato bw’okogamba gw’Asa, omoruoti bw’Abayuda, noro Baasa, akamoita, naende akaba okogamba ribaga riaye.

29Na obwango boria abete omoruoti, agaita abanto bonsi b’enyomba ya Yeroboamu, tatigaretie nonya nomonto oyomo ore moyo ase abanto baye, korende akabasiria kegima, koreng’ana ne ring’ana riria Omonene akwanete goetera ase omosomba oye Ahiya, omonto korwa Silo.

30Aya nigo akoregete ase engencho y’ebibe bia Yeroboamu biria akorete, naende akagera Abaisraeli bagakora ebibe, na ase engencho y’ayio Omonene, Nyasae bw’Abaisraeli, akaba nendamwamu.

31Bono amang’ana ande onsi igoro ya Nadabu, na aya onsi akorete, nigo arikire ase Ebuku y’ogokora kw’Abaruoti b’Abaisraeli.

32Esegi nigo yagendererete koba egati y’Asa na Baasa, omoruoti bw’Abaisraeli, ase obogima bwabo bwonsi.

33Ase omwaka o gatato bw’okogamba gw’Asa, omoruoti bw’Abayuda, Baasa, mosinto bw’Ahiya, agachaka kogambera Abaisraeli bonsi agwo Tirisa, na akagamba ase engaki y’emiaka emerongo ebere na ene.

34Agakora ayare amabe ase obosio bw’Omonene, akabwatia chinchera chia Yeroboamu ase ogokora ebibe ebio bikagera Abaisraeli bagakora ebibe.

← Chapter 14 Jump to: Chapter 16 →