1 Kings 7 — Gussi (EBIBILIA ENCHENU) 2020

1Sulemani akaira emiaka ikomi na etato ase okoagacha enyomba yaye omonyene na koyekoora.

2Akaagacha enyomba ekorokwa Enyomba ye Rinani ria Lebanoni. Obotambe bwaye nigo bwarenge obw’amaboko rigana erimo, na obogare bwaye amaboko emerongo etano, na obotambe bwaye gochia igoro amaboko emerongo etato. Ero nigo yaagachetwe amo ne chisiiro chi’emecharake chindwaro inye. Igoro ase chisiiro echio emiamba y’emecharake yabaachetwe ekabekwa.

3Enyomba nigo yarenge nekerama ki’emecharake igoro y’emiamba yabegetwe ase chisiiro chiria emerongo ene na isano, ikomi na isano ase kera orwaro.

4Enyomba eyio nigo yarenge nebibao bire ase chindwaro isato, kera ekebao kerigereretie ekende.

5Ebisoero bionsi na ebibao nigo biarenge ne chikoona inye, na ebibao nigo biarigerereranetie bire ase chindwaro isato.

6Boigo akaagacha omwaraache bwe chisiiro. Obotambe bwaye nobw’amaboko emerongo etano, na obogare bwaye amaboko emerongo etato. Bosio bw’enyomba eyio akaagacha egesona, na bosio aroro chisiiro chire nekerama.

7Naende akaagacha Enyomba y’Ekerogo ki’Oboruoti, eye ekarokwa naende Enyomba y’Ekegambero aase arenge kogambera ebina. Eye nigo yatubetwe ne chibao chi’emecharake korwa inse goika igoro.

8Naboigo enyomba yaye y’okomenya yaagachetwe magega y’enyomba eria y’ebina, egwekaine neyio. Naende Sulemani akaagachera mokaye, mosubati o Farao, enyomba egwekaine eria yaye.

9Echio chionsi nigo chiagachetwe namagena amaya e rigori rinene, abaachetwe koreng’ana nekerengo, akanachwa nemesumeno chinsemo chionsi korwa oboroso goika rigasio ri’enyasi. Amagena onsi nigo aroisetigwe bo, nonya naya e risiko amo nay’orwaki rw’eraaro y’enyomba y’Omonene.

10Amagena ’oboroso nigo arenge aye rigori rinene, amagena amanene na amarito, ayande ay’obotambe bw’amaboko ikomi, na ayande ay’amaboko atano na atato.

11Igoro y’oboroso narengeo amagena ande e rigori rinene, abaachetwe koreng’ana nekerengo, amo nemeriibo y’emecharake.

12Orwaki rw’eraaro enene igo rwaagachetwe namagena abaachire, abekire chindwaro isato gochia igoro, ne chibao chi’emecharake orwaro oromo. Naboigo norwaki rw’eraaro ya ime y’enyomba y’Omonene amo nenyomba yarenge bosio bw’aroro.

13Omoruoti Sulemani akarangeria Hiramu achiche korwa Turo.

14Hiramu nigo arenge omwana bw’omokungu omoboraka bw’egesaku kia Nafutali, na ise nigo arenge omonto o Turo, omoturi bwe chitaai. Hiramu omonyene nigo arenge nobong’aini obonge amo ne chisemi, omanyete gotura ebinto binde bionsi bie chitaai. Ere agacha ase Sulemani, akamokorera emeremo yaye yonsi.

15Hiramu akaroisia chisiiro ibere chi’etaai; obotambe bwa kera esiiro eyemo nigo bwarenge obw’amaboko ikomi na atato, na engori y’obotambe bw’amaboko ikomi na abere egaetanana kera esiiro.

16Naende akaroisia ebisure bibere bi’etaai enyititoire na kobombwa, akabibeka igoro ye chisiiro; obotambe gochia igoro bwa kera egesure nigo bwarenge obw’amaboko atano.

17Kera egesure igoro ye chisiiro nigo giachabeire nebichanga bitano na bibere biasisire goetanana.

18Akarosia emegwekano y’amakomomanga, akayebeka ase chindwaro ibere igoro y’ebichanga biarenge ase ebisure biria.

19Ebisure igoro ye chisiiro chiarenge ime y’enyomba ya bosio, nigo biabombire bigwekaine ebisicha; obotambe bwabo nobw’amaboko ane.

20Ebisure ebio nigo biarenge igoro ase chisiiro chiria ibere na igoro ye chinsemo chiatambeete gochia isiko. Emegwekano y’amakomomanga amagana abere yarenge ase chindwaro ibere ase kera egesure.

21Hiramu akabeka chisiiro chiria ase enyomba bosio bwe Hekalu; esiiro yabegetwe ensemo ya borio akayeroka Yakini, na eyabegetwe ensemo ya bomosi akayeroka Boasi.

22Ebisure nigo biabombire buna ebisicha nigo biarenge igoro ase chisiiro. Na igo emeremo ye chisiiro ekaera.

23Hiramu akaroisia egetuba ekenene korwa ase etaai enyititoire na kobombwa, ekaba egesingo. Ekerengo korwa ensemo eyemo goika eyende nigo kiarenge eki’amaboko ikomi. Obotambe gochia igoro nigo bwarenge bw’ekerengo ki’amaboko atano. Engori y’obotambe bw’amaboko emerongo etato ekanyara goetanana egetuba ekio.

24Ang’e nomogo emegwekano y’amasosa iyarengeo, ikomi ase kera ekerengo gi’okoboko okomo, yarandete ekeringero ekegima. Emegwekano eyio nigo yarenge chindwaro ibere, yabombire ase egento ekemo negetuba keria.

25Egetuba keria giaterekereretwe igoro y’emegwekano ye chiombe ikomi na ibere. Chiombe isato chikarigereria gochia sugusu, na isato gochia bosongo, na isato gochia irianyi, na isato gochia moocha; chinsemo chiabo chia nyuma chikarigereria gochia gati‐gati inse y’egetuba keria.

26Obonetu bw’etaai yaroiseretigwe egetubwa keria, nigo bwarenge obw’obogare bw’egesanyi gi’okoboko, na omogo okaroisigwa buna oyo bw’egekombe, gose obw’egesicha. Egetuba keria nigo kiarenge kobekwa amache aisaine ang’e chilita chilifu emerongo etano (50,000).

27Naende Hiramu akaroisia ebibekerero ikomi bi’ebituba korwa ase chitaai. Obotambe bwa kera ekebekerero nigo bwarenge obw’amaboko ane, na obogare bwaye amaboko ane, na obotambe bwaye gochia igoro amaboko atato.

28Ebibekerero biria nigo biakoretwe iga: Chinsingo nchiarenge ase chinsemo chiabo ase egati ye chinsingo chie chikoona.

29Ase chinsingo echio yarengeo emegwekano ye chindo, na eye chieri, na ey’abakerubi; naboigo nase chinsingo chie chikoona igoro. Igoro na inse y’emegwekano eyio nigo yarenge emegwekano y’ebisicha biaroisirie chingata.

30Kera ekebekerero nigo kiarenge namagoro ane aroisetigwe korwa ase etaai. Ase chikoona chi’ekebekerero ebisiirero mbiarengeo. Ebisiirero ebio nigo biabombire nemegwekano y’ebisicha biaroisetigwe chingata ase kera ekemo.

31Omonwa bw’ekebekerero nigo orenge igoro ime y’orosingo rw’obotambe gochia igoro okoboko okomo. Omonwa oyio orenge egesingo otambeete gochia inse, obotambe bw’okoboko okomo na ekeng’ese, nao ebiechabero biarenge. Emetobwa yaye nigo yarenge ne chikoona, tiyarenge egesingo.

32Amagoro aye ane nigo abegetwe inse ye chinsingo chiaye, ne rinyongo riaye nigo ribwateranirie nekebekerero. Obotambe bwa kera okogoro nigo bwarenge obw’okoboko okomo na ekeng’ese.

33Amagoro ayio nigo aroisetigwe buna aye chigari. Amagoro amagima nigo aroisetigwe korwa ase etaai yanyititoire na kobombwa. Boigo amanyongo, ne chingata, na ebitingiro biaroisetigwe.

34Ebisiirero bine mbiarenge ase kera ekebekerero ase chikoona chiaye; biaroisetigwe bikaba egento ekemo nekebekerero.

35Igoro kegima ase kera ekebekerero nigo kiarenge orosingo rw’obogare bw’ekeng’ese gi’okoboko okomo; na igoro ase orosingo orwo nigo biarenge ebisiirero amo ne chinsingo chie chinsemo. Bionsi nigo biaroisetigwe bikaba egento ekemo nebisiirero.

36Ase ebisiirero na ase chinsingo emegwekano y’abakerubi, na eye chindo, na ey’emekendo, amo ney’ebisicha, ekamang’wa, buna ribaga riarenge ase kera ensemo.

37Naboigo akaroisia ebibekerero bionsi ikomi. Bionsi nigo biaroisetigwe korwa ase etaai enyititoire na kobombwa; nigo biareng’aine na nigo biagwekaine.

38Hiramu akaroisia na ebituba ikomi bie chitaai. Obogare bwa kera egetuba nigo bwarenge obw’ekerengo ki’amaboko ane, na nigo kiare koira amache aisaine ang’e ne chilita amagana kianda. Naboigo aroisetie ebituba ikomi, ekemo ase kera ekebekerero.

39Akabeka ebibekerero bitano ensemo ya irianyi ye Hekalu, na bitano ensemo ya sugusu, na egetuba keria ekenene agakebeka ensemo ya irianyi ya moocha.

40Hiramu akaroisia ebituba, na ebichiko, na ebitaabo. Naboigo agakoora emeremo yonsi eyaetwe na Sulemani ng’a akore ase enyomba y’Omonene.

41Akaroisia chisiiro ibere, na ebisure bibere biabegetwe igoro ye chisiiro, na ebichanga bisisire biaetanaine, bigatuba chinsemo chi’ebisure echiatambeete gochia isiko,

42na emegwekano y’amakomomanga amagana ane eyabegetwe igoro y’ebichanga ebio, chindwaro ibere ase kera egesure kiarenge igoro ye chisiiro, erinde ensemo y’ebisure biria yatambeete etubwe.

43Naende akaroisia ebibekerero bi’ebituba amo nebituba ikomi biaterekereireo,

44na egetuba ekenene ekemo amo nemegwekano ye chiombe ikomi na ibere ekabekwa inse y’egetuba keria,

45ne chindogio, na ebichiko, na ebitaabo. Ebinto ebio bionsi biaatoire nigo biare ebibekerero bi’enyomba y’Omonene, Hiramu aroisereretie omoruoti Sulemani. Bionsi nigo biaroisetigwe korwa ase chitaai chisibirie buya.

46Ebinto ebio omoruoti akabibomba korwa ase etaai enyititoire, ime ase esike ebombire agwo egati ya Sukoti na Saretani ase Riranya ria Yorodan.

47Sulemani agatiga korenga ebinto ebi bionsi, ekiagera biarenge ebinge mono. Oborito bw’etaai eria tibwamanyekanete buna bwang’ana.

48Boigo Sulemani akaroisia ebinto binde bionsi biare kobekwa ase enyomba y’Omonene; egesasimero gi’etahabu, na emesa y’etahabu ase emegati yare koruegwa ase Nyasae yare kobekwa.

49Ebibekerero bie chitaya bitano biare kobekwa ensemo y’okorio, na bitano ensemo y’okobee, bosio bw’Aase Aachenu Mono; na emegwekano y’ebisicha, ne chitaya, amo nebinachi biakorire korwa ase chitahabu.

50Naende akaroisia chisani ne chigami, na ebitaabo bi’ogosambera ubani, ne chindogio chi’okorenta omorero, ne chimbata chi’ebisieri bi’akanyomba ka ime, Aase Aachenu Mono, na echi’ebisieri bie Hekalu enyene. Ebinto ebio bionsi nigo biaroisetigwe korwa ase chitahabu chichenire.

51Naboigo emeremo eye yonsi omoruoti Sulemani akorete ase enyomba y’Omonene ekaera. Na Sulemani agasoyia aroro ebinto ebi Daudi ise aatananete koba ebichenu: chifeta, ne chitahabu, na ebikorero; akabigacha ase chikungo chi’enyomba y’Omonene.