1 Kings 16

Gussi (EBIBILIA ENCHENU) 2020

← Chapter 15 Jump to: Chapter 17 →

1Ring’ana ri’Omonene rigacha ase Yehu, mosinto o Hanani, rigakwana mamincha ya Baasa, rigateba,

2“Nigo nakoimokereretie igoro korwa ase orotu, ngakobeka okaba omoraai bw’abanto baane Abaisraeli, na bono aye kwabwatirie chinchera chia Yeroboamu, naende kwagerire abanto baane Abaisraeli bakorire ebibe na bangechirie goika nabeire nendamwamu ase engencho y’ebibe biabo.

3Ase ayio ningosirie kegima, aye Baasa amo nabanto b’enyomba yao ebe buna enyomba ya Yeroboamu, mosinto o Nebati.

4Omonto onde bwensi ore bw’enyomba ya Baasa orakwere ase omochie ime, chisese nachimorie, na onde bwensi orakwere isiko aarabu, chinyoni chia igoro nachimorie.”

5Bono amang’ana ande onsi igoro ya Baasa, na aya onsi akorete, na okobua kwaye, nigo arikire ase Ebuku y’ogokora kw’Abaruoti b’Abaisraeli.

6Baasa akarara ase chisokoro chiaye chiararete agatindekwa agwo Tirisa, na Ela omwana oye omomura akaba okogamba ase ribaga riaye.

7Naboigo ring’ana ri’Omonene rikarentwa nomobani Yehu, mosinto o Hanani, igoro ya Baasa na abanto b’enyomba yaye, ase engencho y’amabe onsi akorete ase amaiso ’Omonene. Omonene akagechigwa goika akaba nendamwamu ase engencho y’ayio onsi Baasa akorete ase okoba buna abanto b’enyomba ya Yeroboamu; boigo ekiagera asiretie abanto abwo.

8Ase omwaka bw’emerongo ebere na etano nomo bw’okogamba gw’Asa, omoruoti bw’Abayuda, Ela, mosinto o Baasa, agachaka kogambera Abaisraeli agwo Tirisa, akagamba emiaka ebere.

9Korende omosomba oye Simuri, omochiki bw’ekeng’ese gie chigari chiaye, agakora omoroberio bw’okomoita. Ekero Ela arenge agwo Tirisa okonywa na gotinda ase enyomba y’Arisa, oria otenenerete enyomba y’oboruoti aroro,

10Simuri agasoa nyomba, akamoaka, akamoiyeria inse na komoita. Ayio igo akorete ase omwaka bw’emerongo ebere, na etano na ebere, bw’okogamba gw’Asa, omoruoti bw’Abayuda. Nyuma y’ayio Simuri akaba okogamba ase ribaga riaye.

11Ekero achagete kogamba, ase obwango boria ere ebegete omonyene goikaransa ase ekerogo ki’oboruoti, agaita abanto bonsi b’enyomba ya Baasa, tatigaretie omonto omosacha nonya noyomo ase eamate yaye gose ase abasani baye.

12Ase ayio Simuri agasiria kegima enyomba yonsi ya Baasa, koreng’ana buna ring’ana riria Omonene akwanete mamincha ya Baasa goetera ase Yehu omobani.

13Ayio nigo akoregete ase engencho y’ebibe bionsi bia Baasa, na ebia Ela, omwana oye. Barabwo bakagera Abaisraeli bagakora ebibe bikagechia Omonene bw’Abaisraeli, erinde akaba nendamwamu ase engencho y’emegwekano yabo bagosasima.

14Bono amang’ana ande onsi igoro ya Ela, na aya onsi akorete, nigo arikire ime ase Ebuku y’ogokora kw’Abaruoti b’Abaisraeli.

15Ase omwaka bw’emerongo ebere, na etano na ebere, bw’okogamba gw’Asa, omoruoti bw’Abayuda, Simuri akagamba ase engaki y’amatuko atano na abere agwo Tirisa. Emeganda y’esegi egatoora korwania Gibetoni, omochie bw’Abafilisti.

16Abanto baria batoorete aria bakaigwa ng’a Simuri okorire omoroberio bw’ogoita omoruoti. Ase ayio, ekero Abaisraeli bonsi barenge ase egetwori ase rituko riria bakabeka Omuri, omochiki bw’emeganda y’esegi, akaba omoruoti obo.

17Bono Omuri akaimoka korwa Gibetoni amo n’Abaisraeli bonsi, bakagenda koboera Tirisa.

18Ekero Simuri aroche ng’a omochie obwatirwe, agasoa ase eburi y’enyomba y’omoruoti, agasamba enyomba y’omoruoti, na Simuri omonyene agesamberao.

19Ayio igo akoregete ase engencho y’ebibe akorete ase obosio bw’Omonene, ase okobwatia chinchera chia Yeroboamu, na ase ebibe akorete akagera Abaisraeli bagakora ebibe.

20Bono amang’ana ande onsi igoro ya Simuri, na omoroberio bw’ogoita akorete, nigo arikire ase Ebuku y’ogokora kw’Abaruoti b’Abaisraeli.

21Bono Abaisraeli bagaatananeka chinsemo ibere, ekeng’ese ki’abanto bagatunyana Tibuni, mosinto o Ginati, baganetie komobeka abe omoruoti, na ekeng’ese kende bagatunyana Omuri.

22Abanto abatunyanete Omuri bakabua abanto batunyanete Tibuni, mosinto o Ginati; na ekero Tibuni akure, Omuri akaba omoruoti.

23Ase omwaka bw’emerongo etato nomo bw’okogamba gw’Asa, omoruoti bw’Abayuda, Omuri agachaka kogambera Abaisraeli, akagamba emiaka ikomi na ebere; akagamba agwo Tirisa ase engaki y’emiaka etano nomo.

24Akagora egetunwa gia Samaria korwa ase Semeri ase rigori rie chitalanta ibere chie chifeta, akaagacha omochie igoro yaye, akayogitera chindwaki, akaroka omochie oria aagachete Samaria, erieta ria Semeri, oyio orenge omonyene egetunwa keria.

25Omuri agakora amabe ase obosio bw’Omonene, agakora amabe goetania baria barengeo ritang’ani riaye.

26Ere nigo abwatetie chinchera chia Yeroboamu, mosinto o Nebati, agakora ebibe buna ebiaye, boigo akagera Abaisraeli bakabikora. Omonene, Nyasae bw’Abaisraeli, akagechigwa, akaba nendamwamu ase engencho y’emegwekano yabo bagosasima.

27Bono amang’ana ande onsi Omuri akorete, na okobua okwo aorogetie, nigo arikire ase Ebuku y’ogokora kw’Abaruoti b’Abaisraeli.

28Omuri akarara ase chisokoro chiaye chiararete agatindekwa agwo Samaria, na Ahabu, omwana oye omomura, akaba okogamba ase ribaga riaye.

29Ase omwaka bw’emerongo etato, na gatano na gatato bw’okogamba gw’Asa, omoruoti bw’Abayuda, Ahabu, mosinto bw’Omuri, agachaka kogambera Abaisraeli, agwo Samaria; ere akagamba emiaka emerongo ebere na ebere.

30Ahabu, mosinto bw’Omuri, agakora amabe ase obosio bw’Omonene goetania bonsi abamotang’anerete.

31Ere akarora ng’a namang’ana amagusu kobwatia chingencho chia Yeroboamu, mosinto o Nebati, na agakora ebibe buna ebiaye; amo nayio akanyuoma Yesebeli, omoiseke bw’Etabali, omoruoti bw’Abasidoni. Boigo agakorera enyasae Baali na koyesasima.

32Agatenenia egesasimero kia Baali ime ase enyomba ya Baali, eria aagachete agwo Samaria.

33Ahabu akaroisia omote bw’Asera, enyasae enkungu; agakora bobe mono goetania abaruoti bonsi baria bamotang’anerete, akagechia Omonene, Nyasae bw’Abaisraeli, goika akaba nendamwamu.

34Ase amatuko ’okogamba kwaye, Hieli o Beteli akaagacha Yeriko. Ekero abegete oboroso bw’omochie oyio, Abiiramu omwana oye omomura omotangi, agakwa; naende ekero atenenetie ebiita, Segubu, omwana oye omomura omokogoti, agakwa. Ayio igo akoregete koreng’ana ne ring’ana ri’Omonene, riria riakwanetwe na Yoshua, mosinto o Nuni.

← Chapter 15 Jump to: Chapter 17 →