bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
1 Kings 3
1 Kings 3
Gussi (EBIBILIA ENCHENU) 2020
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 4 →
1
Sulemani agakora oboamate na Farao, omoruoti o Misiri. Akanyuoma omoiseke o Farao, akamorenta ase Omochie o Daudi akamenya aroro goika ekero akoorete koagacha enyomba yaye omonyene amo nenyomba y’Omonene ne chindwaki chiaetanaine Yerusalemu.
2
Abanto nigo barenge koruera ebing’wanso ase ebisasimero biarenge aase aimokererete igoro, ekiagera nyomba ende yonsi konya teraagachwa ase baranyare gosasima erieta ri’Omonene.
3
Sulemani nigo anchete Omonene, akabwatia emeroberio Daudi achigete, korende nigo aruete ebing’wanso na gosamba ubani agwo aase aimokererete igoro.
4
Omoruoti akagenda Gibeoni gochia korua ekeng’wanso aroro, ekiagera nao arenge aase aimokererete igoro mono; akarua aroro ebing’wanso bi’ogosambwa elifu eyemo.
5
Agwo Gibeoni Omonene akaorokera Sulemani ase chindoto botuko, Nyasae akamotebia, “Boria egento oganetie nkoe.”
6
Sulemani agateba, “Aye kworokirie obwanchani obonene botari koera ase omosomba oo Daudi tata, ekiagera igo ataarete ase obosio bwao ase obwegenwa, na oboronge, na ekeene gi’enkoro yaye. Naye kwagendereire komworokia obwanchani obonene botari koera, kwamoeire omwana omomura aikaranse ase ekerogo ki’oboruoti, buna ere rero iga.
7
Na bono, Omonene, Nyasae one, aye gwankorire inche, omosomba oo, nabeire omoruoti ribaga ria Daudi tata, nonya inde omwana omoke. Timanyeti buna nkogamba na koraa.
8
Inche omosomba oo nigo inde ase egati y’abanto bao, aba gwachorire, abanto abange batanyare kobareka ase engencho y’obonge bwabo.
9
Ase ayio, ing’a inche, omosomba oo, okomanya kw’obong’aini gw’okogambera abanto bao, erio nario ndamanye gwatanana amaya na amabe. Naki ning’o oranyare kogambera abanto aba bao abange?”
10
Omonene akagokigwa namang’ana ayio Sulemani aboretie.
11
Nyasae akamotebia, “Ekiagera kwaboririe ring’ana eri, na tibweborereti aye omonyene oegwe obogima obotambe, gose obonda obonge, gose ogosirigwa kw’obogima bw’ababisa bao, korende kwaboririe ng’a oegwe okomanya kw’obong’aini ase okomanyereria ayare amaronge,
12
rora, ninkore koreng’ana buna kwamboria. Ninkoe enkoro y’okomanya okonene kw’obong’aini, okwo monto onde atana koba nakwo, gose oyorache nyuma yao takoba nakwo.
13
Naende ninkoe boigo ebinto binde otaboria; ninkoe obotenenku obonge na obonene bw’ogosikwa, na omoruoti onde tari orareng’anigwe naye ase amatuko ao onsi.
14
Na korarende chinchera chiane, na emeroberio yane echikire, na amachiko aane amachenu, buna Daudi iso akorete, erio ningokore obe moyo amatuko amange.”
15
Sulemani akaboka, akamanya ng’a omaanoreirwe ayio goetera ase chindoto. Erio akagenda Yerusalemu, agatenena bosio bw’Esanduku ere ne chibao chirikire okobwatana kw’Omonene, akaruera Omonene ekeng’wanso ki’ogosambwa na eki’omorembe. Nyuma y’ayio agakorera abasomba baye bonsi omoyega.
16
Erio abakungu abatayayi babere bagacha ase obosio bw’omoruoti, bagatenena aroro.
17
Omokungu oyomo agakwana, agateba, “Aye omonene one, inche amo nomokungu oyo nigo tomenyete ase enyomba eyemo; nkaibora omwana ekero ere arenge ase enyomba eria.
18
Erio rituko ria gatato nyuma inche konaiboire, omokungu oyo nere akaibora; nintwe tweka babere twarengeo, monto onde omoao tarenge ase enyomba eria.
19
Na omwana bw’omokungu oyo agakwa botuko, ekiagera igo amorarerete.
20
Erio akaboka botuko gati, akabogoria omwana one omoisia korwa ase rikere riane ensemo, ekero inche, omosomba oo, naraire chitoro, erio akaareria omwana one ase rikere riaye, na akarenta omwana oria oye okwete, akamwareria ase rikere riane.
21
Ekero nabogete mambia ngonkie omwana one, nkanyora ng’a okure, korende ekero narigereretie omwana oria buya ase emambia eyio, nkarora ng’a oyo tari omwana oria naiborete.”
22
Korende omokungu oria o kabere agakana, “Yaya taibo, omwana oyo ore moyo, nere oyone, na omwana oria okwete nere oyoo.” Omokungu oria omotang’ani akabora, “Yaya, omwana oria okwete, nere oyoo, na omwana oyo ore moyo, nere oyone.” Naboigo bakwanete, bakoamererania ase obosio bw’omoruoti.
23
Erio omoruoti agateba, “Oyomo nigo agoteba: Omwana oyo ore moyo, nere oyone, na omwana oria okwete, nere oyoo; na oyonde igo agokana: Yaya, omwana oo, nere okwete, na omwana one, nere ore moyo.”
24
Ase igo akaboria aegwe omoro. Na ekero arenteirwe omoro,
25
agateba, “Butorane omwana oyo ore moyo ebing’ese bibere, ekeng’ese ekemo keegwe omokungu oyomo, na ekende keegwe oyonde.”
26
Erio omokungu oria omwana oye arenge moyo, ekiagera anchete omwana oye mono, agatebia omoruoti, “Aye omoruoti, tobaisa goita omwana, kae omokungu oyo omwana oyo ore moyo.” Korende oria onde agateba, “Omwana takoba oyone, gose oyoo; tiga anachanwe.”
27
Omoruoti akairaneria, agateba, “Omwana oyo ore moyo, kae omokungu oyo bwe ritang’ani, timobaisa konachana omwana oyo; omokungu oyo nere ng’ina.”
28
Abaisraeli bonsi bakaigwa chinkuma chi’ekina ekio omoruoti agambete; erio bakairoka omoruoti, ekiagera nigo baroche ng’a obong’aini bwa Nyasae nigo bwarenge ime yaye ase okogamba kw’oboronge.
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 4 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22