1 Kings 20 — Gussi (EBIBILIA ENCHENU) 2020

1Beni‐Hadadi, omoruoti bw’Abasiiria, agasangereria abarwani baye b’esegi amo. Abaruoti emerongo etato na babere boigo barenge amo nere, ne chibarasi ne chigari. Barabwo bakagenda bakaboera omochie o Samaria, bakayorwania esegi.

5Abanto baria batometwe bakairana naende, bagateba, “Aya naro Beni‐Hadadi agoteba: Natoma amang’ana asore ng’a ong’e chifeta chiao, ne chitahabu chiao, na abakungu bao, na abana bao.

6Nonya naboigo, nintome abasomba baane ankio, ase engaki buna eye, bariga‐rigie nyomba mwao, ne chinyomba chi’abasomba bao, erio baire kera egento ekerabagokie.”

7Omoruoti bw’Abaisraeli akarangeria abagaaka bonsi b’ense yaye, akabatebia, “Rora bono buna omonto oyo akorigia korenta emechando, igo atoma abanto, akagania imoe abakungu baane, na abana baane, ne chifeta, ne chitahabu, nainche timorineti.”

8Erio abagaaka na abanto bonsi bakamotebia, “Tobaisa koigwa amang’ana ayio gose koyancha.”

9Ase igo Ahabu agatebia abanto baria Beni‐Hadadi atomete, “Motebie omonene one omoruoti ng’a ayio onsi aganetie ase engaki entang’ani ninyakore, korende aya a nyuma tinkoyakora.” Abanto baria Beni‐Hadadi atomete bakairana, bakamoirera amang’ana ayio.

10Beni‐Hadadi agatoma amang’ana asare naende agateba, “Chinyasae ching’e egesusuro ekenene, na goetania, onye orotu rwa Samaria ndogoisana chinsanyi chi’abanto bonsi bagontunyana.”

11Omoruoti bw’Abaisraeli akairaneria, akabora, “Momotebie ng’a oyo okweboyia ebirwanero biaye tabaisa gwetogia buna oyo okobirusia.”

12Ekero Beni‐Hadadi aigwete ring’ana erio, ekero arenge konywa amo nabaruoti bande ase chiema, agatebia abanto baye, “Eroberie!” Barabwo bakeroberia gochia korwania omochie oria.

13Na rora, omobani agacha ase Ahabu, omoruoti bw’Abaisraeli, akamotebia, “Aya naro Omonene agoteba: Inee! Kwarorire omoganda oyo omonene bw’esegi? Rora, ninyobeke ase okoboko kwao ase rituko ria rero; naye nomanye ng’a inche ninche Omonene.”

14Ahabu akaboria, “Ngoetera ase ng’o?” Omobani oria akamoiraneria, agateba, “Aya naro Omonene agoteba: Ngoetera ase abasomba abamura b’abagambi be chingongo chiabo.” Naende Ahabu akaboria, “Ning’o orachake esegi?” Omobani oria akairaneria, “Naye.”

15Erio Ahabu akaroberia abasomba baria abamura b’abagambi be chingongo, amagana abere, na emerongo etato, na babere (232); naende nyuma y’ayio akaroberia Abaisraeli bonsi, na barabwo nigo barenge chilifu isano na ibere (7,000).

16Mobaso gati, ekero Beni‐Hadadi amo nabaruoti baria emerongo etato na babere barenge komokonya banyure na gotinda agwo ase chiema, Abaisraeli bagachaka esegi.

17Abasomba baria abamura b’abagambi be chingongo bakagenda ritang’ani, na Beni‐Hadadi agatoma abatuki b’amang’ana; barabwo bakarenta amang’ana, bakamotebia, “Abanto ngocha bare korwa Samaria.”

18Nere akabatebia, “Onye igo bachire nomorembe, mobabwate, mobatige babe moyo; gose onye igo bachire korwana esegi, mobabwate, mobatige babe moyo.”

19Korende abasomba baria abamura b’abagambi be chingongo amo nomoganda bw’esegi okobabwatia bakarua ase omochie, bakagenda,

20na kera oyomo orenge goita omobisa oye. Abasiiria bagatama, na Abaisraeli bakababwatia, korende Beni‐Hadadi, omoruoti bw’Abasiiria, akariina ebarasi, agatama amo nabanto bande abariini be chibarasi.

21Omoruoti bw’Abaisraeli akagenda agaita chibarasi agasaria chigari, agaita n’Abasiiria ase ogoita okonene.

22Naende omobani oria agacha ase omoruoti bw’Abaisraeli, akamotebia, “Inchuo otimoke onyore chinguru, rengereria mono egento ogwenerete gokora, ekiagera ekero ebimeri bigochaka gosomoria, omoruoti bw’Abasiiria nagochere gokorwania.”

23Abasomba b’omoruoti bw’Abasiiria bakamotebia, “Chinyasae chiabo nigo chire chinyasae chi’ebitunwa, na ase ayio nigo chiaba ne chinguru gotobua; korende togende torwane nabanto abwo ase ense omweya, ekeene, goika tobe ne chinguru kobabua.

24Kora iga: Rusia abaruoti, kera oyomo ase emeremo yaye, na ase amabaga abo obeke abatang’ani b’abarwani esegi.

25Naende roberia abarwani b’esegi bang’ana buna abwo baitwa, ne chibarasi ne chigari ching’ana buna echio chiasirigwa, erio tobarwanie ase ense omweya; ekeene, goika tobe ne chinguru kobabua.” Omoruoti agancha amang’ana abo, naende agakora buna bamotebetie.

26Ekero ebimeri bigochaka gosomoria, Beni‐Hadadi akaroberia Abasiiria, akagenda Afeki korwania Abaisraeli.

27Abaisraeli bakaroberigwa na koariganerigwa chindagera, bakagenda korwania Abasiiria. Abaisraeli bagatoora korigererania n’Abasiiria, bakarorekana buna amaicho abere amake e chimbori, korende Abasiiria bagaichora aase aria.

28Omonto oria o Nyasae agacha ase omoruoti bw’Abaisraeli, akamotebia, “Aya naro Omonene atebire: Abasiiria batebire ng’a Omonene nigo are enyasae y’ebitunwa, korende tari enyasae y’ense omweya. Ase ayio, nimbeke omoganda oyo omonene bwonsi ase okoboko kwao, naye nomanye ng’a inche ninche Omonene.”

29Ase igo abarwani bonsi bagatoora bakarigererania ase engaki y’amatuko atano na abere. Erio ase rituko riria ria gatano na kabere bagachakana esegi, na ase rituko erimo Abaisraeli bagaita abarwani b’Abasiiria abaare gotaara namagoro, chilifu rigana erimo (100,000).

30Abatigari b’Abasiiria bagatama gochia ase omochie o Afeki. Chindwaki chi’omochie oria chikagwera abanto abwo batigarete, chilifu emerongo ebere na isano na ibere (27,000). Beni‐Hadadi boigo agatama, agasoa ase akanyomba ka ime ase omochie.

31Abasomba baye bakamotebia, “Bono twaigure ng’a abaruoti b’enyomba y’Abaisraeli nigo bare namabera, tiga tweboyie chianga chie chigunia, na tonaarie chingori ase amagoti aito, erio tosoke, togende ase omoruoti bw’Abaisraeli; ande nabo arabaise gototiga tobe moyo.”

32Ase ayio bakeboyia chigunia, naende bakanaara chingori ase amagoti abo, erio bakagenda ase omoruoti bw’Abaisraeli, bagateba, “Omosomba oo Beni‐Hadadi nigo agosaba ng’a omotige abe moyo.” Ahabu akabora, “Inee! Nonya mbono moyo are? Ere momura ominto.”

33Abanto baria nigo barenge barigereretie banyore ekemanyererio, na ekero baigwete ring’ana “Oyominto” bakairaneria bwango, “Ee, momura omino Beni‐Hadadi.” Erio omoruoti akabatebia, “Genda momorente!” Beni‐Hadadi agacha ase omoruoti, na omoruoti akamochika ariine egari yaye.

34Beni‐Hadadi akamotebia, “Emechie tata airete korwa ase iso ninkoyeiranerie; naye bweroiserie chinchera chi’oboonchoreria agwo Damesiki, buna tata akorete agwo Samaria.” Ahabu akamoiraneria, “Ase amang’ana ayio ningotige ogende.” Erio Ahabu agakora okobwatana kw’ogotianania nere, akamotiga agende.

35Omonto oyomo bw’aborokigwa b’ababani agatebia omogisangio oye ase ogochikwa kw’Omonene, “Nagosabire, ing’ake ong’ite!” Korende omonto oria akaanga komoaka.

36Erio omobani oria akamotebia, “Ekiagera kwangire koigwera eriogi ri’Omonene, rora, ase obwango obo okorua aa asende, endo negoite.” Erio kegima, ekero omonto oria aruete asare, akaumerana nendo ekamoita.

37Naende omobani oria akanyora omonto onde, akamotebia, “Nagosabire, ing’ake ong’ite?” Omonto oria akamoaka bokong’u, akamoniarora omobere.

38Omobani oria akagenda, akaganya omoruoti agwo ase enchera, agetuba negetambaa ase amaiso aye.

39Ekero omoruoti arenge goeta ase enchera eria, omobani oria akarera asare, akamotebia, “Inche omosomba oo nagendete ase esegi, na rora, omorwani bw’esegi agacha akarentana omonto asende, agantebia: Renda omonto oyo, aise gosira ase enchera ende yonsi, obogima bwao nabobe ribaga ri’obwaye, gose oakane rigori ri’etalanta eyemo y’efeta.

40Na buna inche omosomba oo nabwate emeremo emenge narenge gokora aa na aaria, omonto oria akagenda.” Omoruoti bw’Abaisraeli akamotebia, “Naboigo okonachwa gw’ekina kiao kerabe; aye omonyene gwakenachire.”

41Erio bwango akarusia egetambaa ase amaiso aye, na omoruoti bw’Abaisraeli akamanya ng’a ere noyomo bw’ababani.

42Omobani oria agatebia omoruoti, “Aya naro Omonene agoteba: Ekiagera gwatigire omonto orure ase okoboko kwao, oria naruete ase ogosirigwa, bono obogima bwao nabobe ribaga ri’obwaye, na abanto bao nababe ribaga ri’abanto baye.”

43Omoruoti bw’Abaisraeli akagenda bwoye ore nomoichano na obororo bw’endamwamu, agaika Samaria.