1 Kings 8 — Gussi (EBIBILIA ENCHENU) 2020

1Sulemani agasangereria amo abagaaka b’Abaisraeli, na abatang’ani bonsi b’ebisaku biabo, na baria qarenge abaraai be chiamate chi’Abaisraeli, bache ase obosio bwaye agwo Yerusalemu, erinde bagende Sayoni, Omochie o Daudi, kwoyia Esanduku ere ne chibao chirikire okobwatana kw’Omonene.

5Omoruoti Sulemani amo nomoganda bwonsi bw’Abaisraeli, baria basangererekanete amo nere bagatenena bosio bw’Esanduku eria, bakaruera aroro ebing’wanso bie ching’ondi ne chiombe chinyinge mono chitaare konyara kobareka.

6Erio abakuani bakarenta Esanduku eria y’Okobwatana kw’Omonene, bakayesoyia aase aye ase akanyomba ka ime, agwo Aase Aachenu Mono, bakayebeka inse ye chimbaba chi’abakerubi.

7Abakerubi abwo nigo baramborete chimbaba chiabo igoro y’aase aria Esanduku eria yarenge, bagatuba Esanduku eria amo nemiaro yaye yare kobogorerigwa.

8Emiaro eria nigo yarenge emetambe, ne chinsinyo chiabo chikarorekana korwa Aase Aachenu ase oyo oteneine bosio bw’Aase Aachenu Mono, korende tiyarenge kororekana korwa isiko; nero nao ere agwo goika rero iga.

9Egento kende ekeao tikiarenge ime ase Esanduku eria, otatiga chibao chiria ibere chi’amagena, chiria Musa abegete imeo, agwo Horebu ase Omonene akorete okobwatana kw’ogotianania n’Abaisraeli ekero barwete ase ense ya Misiri.

10Ekero abakuani barenge gosoka korwa ase Aase Aachenu, riire rigaichora enyomba y’Omonene,

11na igo abakuani tibarenge konyara kogenderera nobokoreri bwabo ase engencho ye riire riria, ekiagera obonene bw’Omonene bwaichorete ase enyomba y’Omonene.

12Erio Sulemani akabora, “Omonene obekire erioba igoro, korende otebire ng’a narigetie komenya ase omosunte ekerima.

13Bono nakoagacheire enyomba ebe obomenyo bwao, aase oramenye kogenderera botambe.”

14Erio omoruoti akeonchora akarigereria abanto, agasesenia omosangererekano bwonsi bw’Abaisraeli ekero oteneine,

15agateba, “Atogigwe Omonene, Nyasae bw’Abaisraeli, ere oyoikeranirie nokoboko kwaye aya arierete Daudi tata eira nomonwa oye, ogoteba:

16Korwa rituko riria nang’anyetie abanto baane Abaisraeli korwa Misiri, tinachorete omochie onde bwonsi ase egati y’ebisaku bionsi bi’Abaisraeli agwo ase nare koagacha enyomba, erinde erieta riane ribe aroro, korende nachorete Daudi agambere abanto baane Abaisraeli.”

17Naende Sulemani agateba, “Igo kwarenge okogania gwa Daudi tata koagachera erieta ri’Omonene, Nyasae bw’Abaisraeli, enyomba.

18Korende Omonene akamotebia: Buna kwarengereretie koagachera erieta riane enyomba, nigo gwakorete buya, okabeka amang’ana ayio ime ase enkoro yao.

19Korende nonya naboigo, aye tokonyara koagacha enyomba eyio, otatiga omwana oo omomura oria oraiborwe korwa ase enda yao, nere oraagachere erieta riane enyomba.

20“Bono Omonene oikeranirie eira eria ariete, ekiagera inche natenenire ribaga ria Daudi tata, na ngoikaransa ase ekerogo ki’oboruoti bw’Abaisraeli, buna Omonene ariete eira, naende naagacheire erieta ri’Omonene, Nyasae bw’Abaisraeli, enyomba.

21Naende aroro agwo naroisirie aase Esanduku ere ne chibao chirikire okobwatana kw’Omonene ekobeera. Okobwatana koria Omonene akorete ne chisokoro chiaito, ekero aching’anyetie korwa ase ense ya Misiri.”

22Erio Sulemani agatenena bosio bw’egesasimero ki’Omonene ase obosio bw’omosangererekano bwonsi bw’Abaisraeli, akarambora amaboko aye gochia igoro,

23agakwana, “Aye Omonene, Nyasae bw’Abaisraeli, Nyasae ande tari akogwekaine, igoro nonya ninse aa ase ense, aye bweka nigo okorenda okobwatana kw’ogotianania, naende nigo okoorokia obwanchani botari koera ase abasomba bao baria bare abegenwa asore ne chinkoro chiabo chionsi.

24Aye gwaikeranirie eira eria kwarierete omosomba oo Daudi tata. Aria gwakwanete nomonwa oo kwayaikeranirie nokoboko kwao rituko ria rero.

25Ase ayio aye Omonene, Nyasae bw’Abaisraeli, ikerania bono aya kwarierete omosomba oo Daudi tata eira, ogateba; Takobora nonya ng’ake omonto korwa ase ororeria rwao oraikaranse ase obosio bwane ase ekerogo ki’oboruoti ki’Abaisraeli, onye abana bao bagochia korenda chinchera chiabo, erinde babwatie chinchera chiane, buna aye gwachibwatetie.

26Ase ayio, Nyasae bw’Abaisraeli, tiga ring’ana riao riria gwatebetie omosomba oo Daudi tata riikeranigwe.

27“Inee! Nekeene ng’a aye Nyasae nonyare komenya aa ase ense eye? Rora, igoro na igoro aare mono tekogoisana omenye, naki rende enyomba eye inche nakoagacheire eragoisane?

28Korende aye Omonene, Nyasae one, koranche oigwe ogosaba kwane inche omosomba oo, na okoboria kwane kw’oboitongo, na oigwe ekerero na ogosaba oko inche omosomba oo nkogosaba bono iga.

29Tiga amaiso ao arigererie enyomba eye obotuko na omobaso aase aiga aye gwatebete igoro yaye: Erieta riane naribeere aroro. Ase ayio oigwe ogosaba oko inche, omosomba oo, ngosaba ndigereretie aase aiga.

30Naende aye oigwe okoboria kwane kw’oboitongo inche, omosomba oo, na okw’abanto bao Abaisraeli ekero bagosaba barigereretie aase aiga. Ee, oigwe aye korwa igoro ase obomenyo bwao bore, na ekero okoigwa bwabere.

31“Omonto karakorere omonto onde bobe na aborigwe koria emuma, erio achiche arie emuma eria bosio bw’egesasimero kiao ase enyomba eye,

32aye oigwe korwa agwo igoro, okore ogokora kwao, onachere abasomba bao ekina kia boronge. Tiga oria ore omomochi abogorie egesusuro gi’okomocha kwaye, na oria ore omoronge aegwe oboronge bwaye.

33“Ekero abanto bao Abaisraeli barabe babuirwe nababisa babo, ekiagera bakorire ebibe asore korende bagokoiranera naende na gotogia erieta riao, na ase enyomba eye bakogosaba na gokoboria ase oboitongo,

34rirorio oigwe korwa agwo igoro. Bwabere ebibe bi’abanto bao Abaisraeli, naende obarente gocha ase ense eye kwaete chisokoro chiabo.

35“Ekero igoro erabe esiekire na embura tetwa, ekiagera bakorire ebibe asore, kobarasabe barigereretie aase aiga, naende batogie erieta riao na baonchoke batige ebibe biabo, ekero aye orabae egesusuro,

36rirorio aye oigwe korwa agwo igoro. Bwabere ebibe bi’abasomba bao Abaisraeli, okoborokereria enchera engiya bagwenerete kobwatia. Naende otwerie ense yao embura, ense eria kwaeire abanto bao ekaba omwando obo.

37“Kerabe enchara erache ase ense, gose oborwaire obobe bogoita, gose oborwaire bw’enyagetabo ase chindagera, gose obw’ogochirigisia, gose chingige, gose amakonde, gose ababisa bakoboera ase omochie onde bwonsi ase emechie yabo, gose obobe bonde bwonsi, gose oborwaire bonde bwonsi,

38oigwe ogosaba kwabo. Omonto onde bwensi, gose abanto bao bonsi Abaisraeli kobaragosabe na gokoboria ase oboitongo, kera oyomo omanyete emechando ere ase enkoro yaye, naende barambore amaboko abo gochia ase enyomba eye,

39obaigwe korwa agwo igoro ase obomenyo bwao bore. Bwabere, okore ogokora kwao, okorere kera oyomo koreng’ana nogokora kwaye, (ekiagera naye bweka omanyete chinkoro chia mwanyabanto bonsi,)

40erinde banyare gokoiroka amatuko onsi bamenyete ase ense eria kwaete chisokoro chiaito.

41“Boigo onye omogeni korwa ase ense y’aare, oria otari bw’abanto bao Abaisraeli, okoigwa chinkuma chi’erieta riao rinene,

42(ekiagera abanto inabaigwe igoro y’erieta riao rinene, naende baigwe igoro y’okoboko kwao kore ne chinguru koramboire,) onye omogeni oyio ogocha aa kogosaba origereretie enyomba eye,

43oigwe korwa igoro agwo aase obomenyo bwao bore. Okorere omogeni oria amang’ana onsi akoboria, erinde abanto bonsi b’ense bamanye erieta riao, naende bakoiroke buna abanto bao Abaisraeli bakomanyete na bakoirogete, naende bamanye ng’a enyomba eye naagachire nigo ekorokwa ase erieta riao.

44“Abanto bao kobaragende ase esegi korwania ababisa babo ase enchera ende yonsi aye orabatome gochia, na kobaragosabe aye Omonene barigereretie omochie oyio gwachorire, na enyomba eye naagacheire erieta riao,

45rirorio oigwe korwa agwo igoro ogosaba kwabo, na okoboria kwabo kw’oboitongo, na obae oboronge bwabo.

46“Omonto tari otagokora ebibe. Ase ayio baise kogokorera ebibe, na aye korabe nendamwamu asebare na kobabeka ase amaboko ’ababisa babo, na abwo baboose na kobaira ase ense y’ababisa ere aare gose ang’e, obaigwe.

47Kobararore okomocha kwabo ekero bare ase ense eria boosirwe gochia, beitie na koonchoka, naende bakogosaba ase oboitongo na koorokia ng’a bakorire ebibe na obokayayu, obaigwe.

48Onye bagweitia na koonchoka ase ebirengererio biabo bionsi na ase chinkoro chiabo chionsi, ekero bare ase ense eria y’ababisa babo, baria baboosete, na aroro bagosabe barigereretie gochia ase ense yabo, eria kwaete chisokoro chiabo, na barigererie omochie oyo gwachorire na enyomba eye naagachire ase ogosasima erieta riao,

49rirorio oigwe korwa agwo igoro ase obomenyo bwao bore ogosaba kwabo na okoboria kwabo kw’oboitongo, obae oboronge bwabo.

50Bwabere abanto bao bakorire ebibe asore. Bwabere ogosaria kwabo gwonsi bakorire asore; okore ababisa babo, abwo baboosire babarorere amabeebe.

51Abanto aba nabanto bao, na omwando oo, oria kwarusetie korwa Misiri, ense eria yarenge buna eriko ri’ekebemberi ki’omorero.

52“Tiga amaiso ao abe atorigereretie namabera, inche omosomba oo amo nabanto bao Abaisraeli, otoigwe ekero kende gionsi togokorangeria ase oboitongo.

53Aye Omonene Nyasae, nigo kwabaatananete korwa ase egati y’abanto bonsi b’ense babe omwando oo, buna gwatebete goetera ase Musa, omosomba oo, ekero keria kwarusetie chisokoro chiaito korwa Misiri.”

54Bono ekero Sulemani akoorete ogosaba oko gwonsi na okoboria Omonene ase oboitongo, akaimoka korwa ase egesasimero ki’Omonene aase atung’amete namaru aye inse oramborete amaboko aye gochia igoro,

55agatenena agasesenia omosangererekano bwonsi bw’Abaisraeli, agakwana neriogi rinene, akabora,

56“Atogigwe Omonene oria oeire abanto baye Abaisraeli obotoereru buna abarierete eira! Nonya ne ring’ana erimo tiriri ritaikeranetigwe ase eira yaye yonsi engiya ariete goetera ase Musa, omosomba oye.

57Omonene, Nyasae oito, abe naintwe buna abete ne chisokoro chiaito; tabaisa gototiga gose gotwanga,

58korende aonchore chinkoro chiaito gochia asare, tonyare kobwatia chinchera chiaye, na kobwata amachiko aye na emeroberio yaye echikire, na onsi aya achigete chisokoro chiaito.

59Amang’ana aya aane nasabire ase oboitongo, tiga Omonene, Nyasae oito, abe okoyainyora omobaso na obotuko, naende ae abanto baye Abaisraeli oboronge bwabo koreng’ana buna okogania gwa kera rituko kore.

60Erio abanto b’ense yonsi banyare komanya ng’a Omonene nere Nyasae, naende enyasae ende teri.

61Ase ayio, tiga chinkoro chiaino chionsi chibe echi’ekeene ase Omonene, Nyasae oito, mobwatie emeroberio yaye echikire na mobwate amachiko aye buna mwakorire ase rituko ria rero.”

62Erio omoruoti na abanto bonsi amo nere bakarua ekeng’wanso ase obosio bw’Omonene.

63Sulemani akarua ebing’wanso bi’omorembe ase Omonene, chiombe chilifu emerongo ebere na ibere, ne chingondi chilifu rigana erimo na emerongo ebere. Naboigo omoruoti amo nabanto bonsi bagaatanana enyomba y’Omonene.

64Ase rituko riria omoruoti agaatanana na gochena obogati‐gati bw’eraaro eria yarenge bosio bw’enyomba y’Omonene. Agwo nao aruerete ebing’wanso bi’ogosambwa, na okoruegwa kw’endagera, na ebitinya bi’ebing’wanso bi’omorembe, ekiagera egesasimero gi’etaai ekiarenge ase obosio bw’Omonene nigo kiarenge egeke mono, tikiare goisana koira ebing’wanso bi’ogosambwa, na okoruegwa kw’endagera, na ebitinya bi’ebing’wanso bi’omorembe.

65Ase ayio Sulemani amo n’Abaisraeli bonsi mbabwate Amatuko Amanene ase engaki y’amatuko atano na abere, naende ase amatuko ande atano na abere, amatuko onsi nikomi na ane. Omosangererekano omonene nigo orenge gosangerereka korwa egesoero kia Hamati goika akarooche ka Misiri.

66Ase rituko ria gatano na gatato agatiga abanto bakagenda, na barabwo bagasesenia omoruoti, bakagenda chinka chiabo bare nomogoko na omosasoko ase chinkoro chiabo ase engencho y’obuya bwonsi boria Omonene akorerete Daudi, omosomba oye, na Abaisraeli, abanto baye.