Deuteronomy 1

Ilonggo (Maayong Balita nga Biblia (2012))

Jump to: Chapter 2 →

1Sa sini nga libro nasulat ang mga pulong nga ginhambal ni Moises sa mga tawo sang Israel sang didto sila sa desierto sa sidlangan sang Suba sang Jordan. Didto sila sa Kapatagan sang Jordan malapit sa Suf nga gintung-an sang banwa sang Paran sa isa ka bahin kag sang mga banwa sang Tofel, Laban, Hazerot kag Dizahab sa pihak nga bahin. (

2Halin sa Bukid sang Sinai tubtob sa Kades Barnea kon lakton nga nagaagi sa kabakuloran sang Edom nagalambot sa mga onse ka adlaw.)

3Sa nahauna nga adlaw sang ika-11 ka bulan sang ika-40 ka tuig sa tapos sila makahalin sa Ehipto, ginsugiran ni Moises ang mga tawo sang tanan nga ginsugo sang Ginoo sa iya nga ihambal sa ila.

4Nahanabo ini sa tapos malutos sang Ginoo si Haring Sihon nga Amornon nga naggahom sa banwa sang Hesbon, kag si Haring Og sang Basan nga naggahom sa mga banwa sang Astarot kag Edrei.

5Samtang ang mga tawo didto sa sidlangan sang Jordan sa kadutaan sang Moab, ginpaathag ni Moises ang mga kasugoan kag mga pagtulon-an sang Dios. Si Moises nagsiling,

6“Sang didto kita sa Bukid sang Sinai, ang Ginoo nga aton Dios nagsiling sa aton, ‘Dugay na ang inyo pagtener sa sini nga bukid.

7Himusa ninyo ang inyo mga tolda kag maglakat pakadto sa kabakuloran sang mga Amornon, kag sa tanan nga mga lugar palibot sa diin nagaestar ang ila mga kaingod—pakadto sa kapatagan sang Jordan, sa kabakuloran kag mga kapatagan, sa kadutaan sa bagatnan, kag sa baybayon sang Mediteraneo. Kadto kamo sa duta sang Canaan sa unhan sang mga kabukiran sang Libano tubtob sa daku nga Suba sang Eufrates.

8Tan-awa, yari ang duta nga ginsaad ko nga akon ihatag sa inyo mga katigulangan nga amo sanday Abraham, Isaac, kag Jacob kag sa ila mga kaliwat. Lakat kag panag-iyahi ini.’”

9Si Moises nagsiling sa mga tawo, “Sa sadto nga tion sang didto pa kita sa Bukid sang Sinai ginsingganan ko kamo nga indi ako makasarang sa pagdumala sa inyo kon ako lang.

10Ang Ginoo nga inyo Dios nagpadamo sa inyo subong sang mga bituon sa langit.

11Kabay ang Ginoo, ang Dios sang inyo mga katigulangan magpadamo pa sa inyo sing linibo ka pilo, kag pauswagon kamo suno sa iya ginsaad!

12Pero ano ang pagkasarang ko sang mabudlay nga katungdanan sa paghusay sang inyo mga kaawayon kon ako lang?

13Gikan sa tagsa ka tribo magpili kamo sing mga tawo nga maalam, mahinangpanon, kag may ikasarang kag himuon ko sila nga inyo mga pangulo.

14Kag nagpasugot man kamo nga amo ini ang maayo nga himuon.

15Gani ginkuha ko ang maalam kag may ikasarang nga mga pangulo nga inyo ginpili halin sa inyo mga tribo, kag ginhimo ko sila nga pangulo ninyo. Ang iban nagpangulo sang 1,000 ka mga tawo, ang iban sang 100, ang iban sang singkwenta kag ang iban sang napulo. Nagpili man ako sang iban nga mga opisyales sa bug-os nga mga tribo.

16“Sa sadto nga tion ginsingganan ko ini nga mga opisyales, ‘Pamatii ninyo ang tagsa ka kaso nga ginadala sang mga tawo sa inyo. Hukmi ninyo sing husto ang tagsa ka kaso, bisan ini nahanungod sang inyo mga kasimanwa lamang ukon sang mga dumoluong nga nagaestar upod sa inyo.

17Indi kamo magpasulabi sa inyo paghukom, hukmi ninyo sing palareho ang tagsatagsa bisan sin-o sia. Indi kamo magkahadlok sa bisan kay sin-o, kay ang inyo mga paghukom naghalin sa Dios. Kon may kaso nga tama kabudlay para sa inyo dalha ninyo ina sa akon, kag ako ang magahukom sina.’

18Sa amo man nga tion gintudloan ko kamo sang iban pa gid nga pagahimuon ninyo.

19“Gintuman naton ang ginsugo sang Ginoo nga aton Dios. Naghalin kita sa Bukid sang Sinai kag naglatas sa malapad kag makahaladlok nga desierto pakadto sa kabakuloran sang mga Amornon. Sang makaabot kita sa Kades Barnea,

20ginsingganan ko kamo, ‘Nakaabot na kamo sa kabakuloran sang mga Amornon, nga ginahatag sa aton sang Ginoo nga aton Dios.

21Tan-awa, yari ang duta nga ginahatag sa inyo sang Ginoo nga Dios sang inyo mga katigulangan. Lakat kamo kag panag-iyahi ini suno sa iya ginsugo. Indi kamo magpang-alang-alang ukon magkahadlok.’

22“Pero nagpalapit kamo sa akon kag nagsiling, ‘Magpadala kita anay sing mga tawo nga magauna sa aton sa pag-usisa sang duta, agod masugiran nila kita sing labing maayo nga alagyan pakadto didto kag kon ano nga sahi sang mga siudad ang aton pagakadtuan.’

23“Daw maayo man yadto nga plano, gani nagpili ako sing dose ka mga tawo, isa sa tagsa ka tribo.

24Nagkadto sila sa kabakuloran tubtob sa Kapatagan sang Escol kag gin-usisa nila ini.

25Nagkuha sila sing mga prutas didto kag gindalhan nila kita, kag nagpanugid sila nga ang duta nga ginahatag sang Ginoo nga aton Dios mapatubason gid nga duta.

26“Pero nagsupak kamo sa sugo sang Ginoo nga inyo Dios kag indi kamo magkadto didto.

27Nagkumod kamo sa isa kag isa kag nagsiling: ‘Ang Ginoo nagadumot sa aton. Gani ginpagwa niya kita sa Ehipto agod itugyan sa mga Amornon sa pagpamatay sa aton.

28Ngaa bala magkadto kita didto? Nahadlok kita. Ang mga tawo nga ginpadala naton didto nagsugid nga ang mga pumoluyo didto mas makusog kag matag-as pa sang sa aton. Siling nila nga ang ila mga siudad nalibutan sang mga pader nga nagalambot sa langit. Kag nakita nila ang mga higante didto!’

29“Pero ginsingganan ko kamo, ‘Indi kamo magkahadlok sa sini nga mga tawo.

30Ang Ginoo nga inyo Dios magauna sa inyo kag magapakig-away sia para sa inyo subong sang nakita ninyo nga ginhimo niya sa Ehipto

31kag sa desierto. Nakita ninyo kon paano ang iya pagdala sa inyo nga wala kamo maano tubtob sa sini nga lugar, pareho sang isa ka amay nga nagakugos sang iya anak.’

32Pero wala sapayan sang akon ginsiling, indi pa kamo magsalig sa Ginoo

33bisan nga nagauna sia sa gihapon sa inyo sa pagpangita sing lugar nga inyo himuan sang inyo kampo. Gintuytoyan niya kamo sang inyo pagaagyan paagi sa haligi nga kalayo kon gab-i kag sa haligi nga panganod kon adlaw.

34“Ang Ginoo nakabati sang inyo mga reklamo kag naakig sia, gani nagsumpa sia,

35‘Wala sing isa sa inyo gikan sining malaut nga kaliwatan nga makasulod sa mapatubason nga duta nga akon ginsaad nga ihatag sa inyo mga katigulangan.

36Si Caleb lamang nga anak ni Jefone amo ang makasulod sini. Wala sia magbiya sa akon kag ihatag ko sa iya kag sa iya mga kaliwatan ang duta nga iya gin-usisa.’

37Ang Ginoo naakig man sa akon tungod sa inyo, kag nagsiling sia, ‘Bisan gani ikaw, Moises, indi makasulod sa sadto nga duta,

38pero ang imo kabulig nga si Josue nga anak ni Nun, makasulod sa sadto nga duta. Paisuga si Josue. Sia magapangulo sang Israel sa pagpanag-iya sang duta.’

39“Dayon ang Ginoo nagsiling sa aton tanan, ‘Ang inyo magamay nga mga kabataan, nga wala makahibalo sang maayo ukon malain amo ang makasulod sa duta—ang mga kabataan nga suno sa inyo pagabihagon sang mga kaaway. Ihatag ko ina nga duta sa ila kag sila ang magapanag-iya sini.

40Pero kamo inyo, balik kamo sa desierto pakadto sa Mapula nga Dagat.’

41“Nagsabat kamo, ‘Moises nakasala kami batok sa Ginoo. Pero karon magasalakay kami suno sa ginmando sa amon sang Ginoo nga amon Dios.’ Dayon ang tagsatagsa sa inyo naghanda sa pagpakig-away kag naghunahuna nga mahapos lang ang pagsalakay sa mga kabakuloran.

42“Pero ang Ginoo nagsiling sa akon, ‘Paandami sila nga indi magsalakay kay indi ako mag-upod sa ila, kag ang ila mga kaaway magalutos sa ila.’

43Ginsugiran ko kamo sang ginsiling sang Ginoo, pero indi kamo magpati. Nagsupak kamo sa iya kag sa inyo pagkabugalon, nagtaklad kamo sa kabakuloran.

44Dayon ang mga Amornon nga nag-estar sa sadtong kabakuloran naggwa sa pagpakig-away sa inyo kaangay sang isa ka panong sang putyokan. Ginlagas nila kamo kag ginlutos sa Horma sa kabakuloran sang Edom.’

45Gani nagpanawag kamo sa Ginoo sa pagpangayo sang bulig, pero wala sia nagpamati sa inyo ukon nagsapak sa inyo.

46Amo ina nga nagtener kita sing madugay sa Kades.

Jump to: Chapter 2 →