Deuteronomy 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1“Kon mapanag-iyahan na ninyo ang duta nga ginahatag sa inyo sang Ginoo nga inyo Dios kag didto na kamo nagaestar,

2ang tagsatagsa sa inyo magbutang sa alat sang nahauna nga bahin sang inyo patubas nga inyo naani kag dalhon ninyo ini sa lugar nga ginasimbahan.

3Kadto kamo sa pari nga nagaalagad sa sina nga tion kag magsiling sa iya, ‘Ginapasalamatan namon karon nga adlaw ang Ginoo nga amon Dios nga nakasulod kami sa duta nga ginsaad niya sa amon mga katigulangan nga iya ihatag sa amon.’

4“Ang pari magakuha sang alat sa inyo, kag ibutang ini sa atubangan sang altar sang Ginoo nga imo Dios.

5Dayon amo ini ang imo isiling sa atubang sang Ginoo: ‘Ang amon mga katigulangan nga Aramnon wala sing permanente nga ilistaran sang pagdala niya sang iya panimalay sa pag-estar sa Ehipto. Diutay pa lang sila sang pagkadto nila didto, pero nagdamo sila kag nangingamhanan nga pungsod.

6Ang mga Ehiptohanon nagpintas sa amon kag nagpilit sa amon sa pag-obra subong mga ulipon.

7Dayon nagpanawag kami sa pagpangayo sing bulig sa Ginoo nga Dios sang amon mga katigulangan. Nagpamati ka sa amon, kag nakita mo ang amon pag-antos, kabudlayan, kag kalisod.

8Sa imo daku nga gahom kag kusog ginluwas nimo kami halin sa Ehipto. Naghimo ikaw sing mga milagro kag mga kalatingalahan, kag makakulogmat nga mga butang.

9Gindala nimo kami diri kag ginhatag ining maayo kag mapatubason nga duta.

10Gani karon, ginadala namon sa Ginoo ang nahauna nga bahin sang patubas nga imo ginhatag sa amon.’ “Dayon ibutang ang alat sa atubang sang Ginoo kag magsimba didto.

11Magkalipay kamo tungod sang maayo nga mga butang nga ginhatag sa inyo sang Ginoo nga inyo Dios kag sa inyo panimalay, kag pabuyloga ang mga Levita kag ang mga dumoluong nga nagaestar upod sa inyo sa inyo pagkinasadya.

12“Sa tagsa ka ikatlo nga tuig ihatag ang ikapulo—ang ikapulo sang inyo patubas—sa mga Levita, mga dumoluong, mga ilo, kag mga balo, agod nga sa tagsa ka katilingban indi sila mawad-an sang ila kalan-on. Kon mahimo na ninyo ini,

13magsiling kamo sa Ginoo, ‘Wala na sing balaan nga ikapulo nga nabilin sa amon balay. Ginhatag na namon ini sa mga Levita, sa mga dumoluong, sa mga ilo, kag sa mga balo, suno sa imo ginsugo sa amon. Wala kami maglapas ukon magkalimot sang bisan isa sang imo mga sugo nahanungod sa ikapulo.

14Wala kami magkaon sini sang nagalalaw kami. Wala kami magdala sini sa gwa sang amon balay sang kami di-matinlo, kag wala kami maghatag sini subong dulot sa patay. O Ginoo namon, gintuman namon ikaw, ginhimo namon ang tanan nga ginsugo mo nahanungod sa ikapulo.

15Tamda kami gikan sa imo balaan nga puloy-an sa langit kag bendisyuni ang imo mga tawo nga Israelinhon. Bendisyuni man ang maayo kag mapatubason nga duta nga imo ginhatag sa amon, suno sa imo ginsaad sa amon mga katigulangan.’

16“Sa sini nga adlaw ang Ginoo nga inyo Dios nagamando sa inyo sa pagtuman sang tanan niya nga mga kasugoan. Gani tumana ini sing matutom sa inyo bug-os nga tagipusoon kag kalag.

17Sa sini nga adlaw ginkilala ninyo ang Ginoo nga inyo Dios. Nagsaad kamo sa pagtuman sa iya, sa pagbantay sang iya mga kasugoan kag sa paghimo sang tanan niya nga mga ginasugo.

18Sa sini nga adlaw ang Ginoo nagbaton sa inyo subong iya kaugalingon nga mga tawo, suno sa iya ginsaad sa inyo. Ginsugo niya kamo sa pagtuman sang tanan niya nga mga kasugoan.

19Himuon niya kamo nga mas labi pa ka gamhanan sang sa iban nga pungsod nga iya gintuga, kag kamo magahatag sing pagdayaw kag kadungganan sa iya ngalan. Mangin-iya kamo balaan nga mga tawo suno sa iya ginsaad.”

← Chapter 25 Jump to: Chapter 27 →