Deuteronomy 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Dayon si Moises nagsiling sa mga tawo, “Tumana ninyo ang tanan nga mga kasugoan nga akon ginatudlo sa inyo kag magakabuhi kamo kag mapanag-iyahan ninyo ang duta nga ginhatag sa inyo sang Ginoo nga Dios sang inyo mga katigulangan.

2Indi ninyo pagdugangi ukon pagbuhini ang akon sugo sa inyo. Tumana ninyo ang ginhatag ko sa inyo nga mga sugo nga iya sang Ginoo nga inyo Dios.

3Nakita gid ninyo ang ginhimo sang Ginoo sa Bukid sang Peor. Ginpamatay niya ang tagsatagsa nga nagsimba kay Baal didto,

4pero ang iban sa inyo nga nagmatutom sa Ginoo nga inyo Dios buhi pa tubtob karon nga adlaw.

5“Gintudloan ko kamo sang tanan nga mga kasugoan suno sa sugo sang Ginoo nga akon Dios. Tumana ini didto sa duta nga inyo pagagubaton kag panag-iyahan.

6Tumana ini sing maayo, kag paagi sini mapakita ninyo ang inyo kaalam kag ihibalo sa mga tawo sang iban nga mga kapungsoran. Kon mabatian nila ini nga mga kasugoan magasiling sila, ‘Daw ano ang kaalam kag ihibalo sining gamhanan nga pungsod!’

7“Wala na sing iban nga pungsod, bisan daw ano ka gamhanan, nga may dios nga malapit sa ila kon magpanawag sila, pareho sang Ginoo nga aton Dios. Nagasabat sia kon kita magpangayo sing bulig sa iya.

8Wala sing iban nga pungsod bisan daw ano ka gamhanan nga may kaangay nga mga kasugoan nga matarong, nga pareho sang akon gintudlo sa inyo subong nga adlaw.

9Mag-andam kamo! Samtang buhi pa kamo indi ninyo pagkalimti ang inyo nakita. Sugiri ninyo ang inyo mga kabataan kag ang inyo mga kaapuhan

10nahanungod sang adlaw nga nagtindog kamo sa atubang sang Ginoo nga inyo Dios sa Bukid sang Sinai, sang sia magsiling sa akon, ‘Tipuna ang mga tawo. Luyag ko mabatian nila ang akon isiling, agod magtahod sila sa akon samtang buhi pa sila, kag tudloan nila ang ila mga kabataan sa pagtahod sa akon.’

11“Sugiri ang inyo mga kabataan sang inyo pagpalapit kag pagtindog sa kunsaran sang bukid nga natabunan sang madamol nga gal-om nga halin sa maitom nga aso kag kalayo nga nagaibwal tubtob sa langit.

12Sugiri sila kon daw ano nga ang Ginoo naghambal sa inyo gikan sa kalayo, kag nabatian ninyo sia nga nagahambal, pero wala ninyo makita ang iya dagway.

13Ginsingganan niya kamo kon ano ang inyo dapat himuon sa pagtuman sang kasugtanan nga ginhimo niya sa inyo—sa pagtuman sang Napulo ka Sugo, nga iya ginsulat sa duha ka mga lapida nga bato.

14Ang Ginoo nagsugo sa akon nga tudloan ko kamo sang tanan nga mga kasugoan nga inyo dapat tumanon sa duta nga inyo pagasudlon kag panag-iyahan.

15“Sang paghambal sang Ginoo sa inyo gikan sa kalayo sa Bukid sang Sinai, wala kamo sing nakita nga dagway. Gani, para sa inyo kaayuhan mag-andam kamo

16nga indi kamo magpakasala paagi sa paghimo sang mga diosdios para sa inyo kaugalingon sa bisan ano nga dagway—tawo nga lalaki ukon babayi,

17sapat ukon pispis,

18sapat nga nagasaog ukon isda.

19Indi kamo magpadaladala sa pagsimba ukon sa pag-alagad sang mga butang nga inyo makita sa langit—ang adlaw, ang bulan, kag mga bituon. Ang Ginoo nga inyo Dios naghatag sini sa iban nga mga tawo nga ila pagsimbahon.

20Pero kamo ang mga tawo nga ginpagwa niya sa Ehipto, inang nagadabadaba nga hornohan. Ginpagwa niya kamo agod mangin-iya kaugalingon nga mga tawo, subong nga sini nga adlaw iya kamo.

21Ang Ginoo nga inyo Dios naakig sa akon tungod sa inyo, kag nagsumpa sia nga indi ako makatabok sa Suba sang Jordan sa pagsulod sa maayo nga duta nga iya ginahatag sa inyo.

22Mapatay ako sa sini nga duta nga indi gid makatabok sa suba, pero kamo inyo manugtabok na kag makapanag-iya sang mapatubason nga duta.

23Mag-andam kamo nga indi ninyo malimtan ang kasugtanan nga ginhimo sa inyo sang Ginoo nga inyo Dios. Tumana ang iya mga sugo, kag indi kamo maghimo sang diosdios para sa inyo kaugalingon,

24tungod kay ang Ginoo nga inyo Dios isa ka Dios nga maimon, nga kaangay sang nagadabdab nga kalayo.

25“Bisan dugay na ang inyo pag-estar sa duta kag magpamata ukon magpangapo kamo, indi kamo magpakasala paagi sa paghimo sang diosdios para sa inyo kaugalingon sa bisan ano nga dagway. Malaut ini sa panulok sang Ginoo, kag magapaakig ini sa iya.

26Kon himuon ninyo ini, ginatawag ko ang langit kag ang duta sa pagpanaksi batok sa inyo karon nga adlaw kag sa ulihi madula kamo sa duta. Indi kamo makaestar sing malawig sa duta sa tabok sang Jordan nga inyo madali na lang panag-iyahan. Malaglag kamo tanan.

27Ang Ginoo magapaalaplaag sa inyo sa mga kapungsoran sa diin pila lamang sa inyo ang mabilin.

28Kag magaalagad kamo didto sa mga dios nga nahimo sang tawo, mga dios nga nahimo sa kahoy kag bato, mga dios nga indi makakita ukon makabati, indi makakaon ukon makapanimaho.

29Didto magapangita kamo sa Ginoo nga inyo Dios, kag kon pangitaon ninyo sia sa inyo bug-os nga tagipusoon kag kalag makita ninyo sia.

30Pero kon yara kamo sa kalisdanan, kag kon tanan ini nga mga butang matabo sa inyo, dayon magabalik kamo sa Ginoo kag magatuman sa iya.

31Maluloy-on sia nga Dios. Indi sia magbiya ukon maglaglag sa inyo, kag indi niya pagkalimtan ang kasugtanan nga iya ginhimo sa inyo mga katigulangan.

32“Usisaa ang nagligad, sadtong panahon nga wala pa kamo matawo, halin sang pagtuga sang Dios sang tawo sa duta. Usisaa ang bug-os nga duta. May natabo bala halin sang una nga pareho sini ka daku? May nakabati bala sang isa ka butang nga pareho sini?

33May yara bala nga mga tawo nga nabuhi pa sa tapos nila mabatian ang Dios nga naghambal gikan sa kalayo pareho sang nabatian ninyo?

34May isa bala ka dios nga nangahas sa pagkuha sang isa ka grupo sang mga tawo halin sa isa ka pungsod kag himuon niya nga iya kaugalingon nga mga tawo subong sang ginhimo sa inyo sang Ginoo nga inyo Dios didto sa Ehipto? Sa inyo gid atubang gingamit niya ang iya daku nga gahom kag kusog kag nagdala sing mga kalalat-an kag inaway, naghimo sang mga milagro kag mga kalatingalahan, kag naghimo sing makahaladlok nga mga butang.

35Ang Ginoo nagpakita sa inyo sini, agod mahibaluan ninyo nga sia amo lamang ang Dios kag wala na sing iban.

36Ginpabati niya kamo sang iya tingog halin sa langit agod matudloan niya kamo, kag diri sa duta ginpakita niya kamo sang iya balaan nga kalayo, kag halin sa sini naghambal sia sa inyo.

37Tungod kay ginhigugma niya ang inyo mga katigulangan, ginpili niya kamo, kag paagi sa iya daku nga gahom sia gid ang nagpagwa sa inyo sa Ehipto.

38Samtang nagapadulong kamo gintabog niya ang mga kapungsoran nga mas daku kag gamhanan pa sang sa inyo, agod iya kamo mapasulod kag mahatag sa inyo ang ila duta, ang duta nga tubtob karon inyo.

39Gani dumdoma ninyo subong nga adlaw kag indi pagkalimti nga ang Ginoo, Dios sa langit kag sa duta. Wala na sing iban nga Dios.

40Tumana ninyo ang tanan niya nga mga kasugoan nga akon ginahatag sa inyo karon nga adlaw, dayon ang tanan magmanginmaayo para sa inyo kag sa inyo mga kaliwat. Magapadayon kamo sa pag-estar sa duta nga ginhatag sa inyo sang Ginoo nga inyo Dios nga mangin-inyo sa wala sing katapusan.”

41Dayon si Moises nagpain sing tatlo ka mga siudad sa sidlangan sang Suba sang Jordan,

42nga sarang madangpan sang isa ka tawo kag maluwas kon makapatay sia sang indi hungod sang isa ka tawo nga indi niya kaaway. Makadangop sia sa isa sini nga mga siudad kag indi sia pagpatyon.

43Para sa tribo ni Ruben yara ang siudad nga Beser sa desierto sa kabakuloran, para sa tribo ni Gad yara ang Ramot sa kadutaan sang Galaad, kag para sa tribo ni Manases yara ang Golan sa kadutaan sang Basan.

44Si Moises naghatag sang mga kasugoan kag mga pagtulon-an sang Dios sa mga tawo sang Israel.

45Ginhatag niya ini nga mga kasugoan sa ila sa tapos sila makagwa sa Ehipto

46kag yara sila sa sidlangan sang Suba sang Jordan sa kapatagan, sa atubangan sang banwa sang Bet-peor. Ini sa kadutaan ni Haring Sihon sang mga Amornon nga naggahom sa banwa sang Hesbon. Si Moises kag ang mga tawo sa Israel naglutos sa iya sang makagwa sila sa Ehipto.

47Gin-agaw nila ang iya duta kag ang duta ni Og nga hari sang Basan, ang isa pa gid ka hari nga Amornon nga nag-estar sa sidlangan sang Suba sang Jordan.

48Ang duta nga ila ginpanag-iyahan magasugod sa banwa sang Aroer sa pangpang sang Suba sang Arnon tubtob sa aminhan sa Bukid sang Sirion nga ginatawag man Bukid sang Hermon,

49kag nagalakip man ini sang tanan nga kadutaan sa sidlangan sang Suba sang Jordan tubtob sa bagatnan sa Patay nga Dagat kag sa sidlangan pakadto sa kunsaran sang Bukid sang Pisga.

← Chapter 3 Jump to: Chapter 5 →