Deuteronomy 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1Amo ini ang nasulat sa kasugtanan nga ginsugo sang Ginoo sa kay Moises nga himuon upod sa mga tawo sang Israel sa duta sang Moab, wala labot sa kasugtanan nga ginhimo sang Ginoo sa ila sa Bukid sang Sinai.

2Ginpatawag ni Moises sing tingob ang tanan nga mga tawo sang Israel kag ginsingganan sila, “Kamo gid nakakita sang ginhimo sang Ginoo sa hari sang Ehipto, sa iya mga opisyales, kag sa iya bug-os nga pungsod.

3Nakita ninyo ang makakulogmat nga mga kalalat-an, ang mga milagro, kag ang dalagku nga mga katingalahan nga ginhimo sang Ginoo.

4Pero tubtob karon nga adlaw wala kamo ginpahangop sang Ginoo sang inyo mga inagihan.

5Sa sulod sang kwarenta ka tuig nga pagtuytoy sa inyo sang Ginoo sa desierto, ang inyo mga bayu kag mga sandalyas wala magdaan.

6Wala kamo sing tinapay nga kalan-on, ukon wala kamo sing daan ukon bag-o nga bino nga ilimnon, pero ang Ginoo naghatag sang inyo mga kinahanglanon sa pagtudlo sa inyo nga sia amo ang inyo Dios.

7Kag sang pag-abot naton sa sini nga lugar, si Haring Sihon sang Hesbon kag si Haring Og sang Basan naggwa sa pagpakig-away sa aton. Pero ginlutos naton sila,

8gin-agaw ang ila duta, kag ginpamartida naton ini sa mga tribo ni Ruben, ni Gad, kag sa katunga nga tribo ni Manases.

9Tumana sing maayo ang nasulat sa sini nga kasugtanan, agod manginmadinalag-on kamo sa tanan ninyo nga pagahimuon.

10“Sa sini nga adlaw nagatindog kamo sa atubang sang Ginoo nga inyo Dios, tanan kamo—ang inyo mga pangulo kag mga opisyales, ang inyo mga lalaki,

11mga babayi, kag mga kabataan, kag ang mga dumoluong nga nagaestar upod sa inyo nga nagapangahoy kag nagaagwada para sa inyo.

12Sa sini nga adlaw yari kamo diri sa pagpakigbahin sa kasugtanan nga ginahimo sang Ginoo nga inyo Dios upod sa inyo kag sa pagbaton sang mga tulomanon sini,

13agod nga ang Ginoo magahimo sa inyo nga iya mga tawo kag sia mangin-inyo Dios, suno sa iya ginsaad sa inyo kag sa inyo mga katigulangan nga amo sanday Abraham, Isaac kag Jacob.

14Indi lamang kamo ang ginahimuan sang Ginoo sini nga kasugtanan kag lakip ang iya mga tulomanon.

15Ginahimo niya ini upod sa aton tanan nga nagatindog diri sa iya atubang sini nga adlaw, kag subong man sa aton mga kaliwat nga wala pa matawo.

16“Nadumdoman ninyo kon ano ang aton pangabuhi didto sa Ehipto, kag kon daw ano ang magpanglakaton sa kadutaan sang iban nga mga kapungsoran.

17Nakita ninyo ang ila mga makangilil-ad nga mga diosdios nga nahimo sa kahoy, bato, pilak kag bulawan.

18Pat-ura ninyo nga wala sing lalaki, babayi, panimalay, ukon tribo nga yari diri sini nga adlaw nga magbiya sa Ginoo nga aton Dios kag magsimba sa mga dios sang iban nga mga kapungsoran. Manginkaangay ini sa isa ka gamot nga magatubo kag manginmapait kag makahililo nga tanom.

19Pat-ura ninyo nga wala sang isa nga yari diri sini nga adlaw nga nagapamati sining paandam, kag magasiling sa iya kaugalingon nga indi man sia maano bisan magpadayon sia sa iya pagkabatinggilan kag himuon niya ang iya luyag. Ini magalaglag sa inyo tanan, ang maayo kag malaut.

20Ang Ginoo indi magpatawad sini nga sahi sang tawo. Sa baylo, ang nagabalingaso nga kaakig sang Ginoo magadabdab batok sa iya, kag ang mga kalalat-an nga nasulat sa sini nga libro matupa sa iya, tubtob nga malaglag sia sang Ginoo sa ibabaw sang duta.

21Ang Ginoo magahimo sa iya nga halimbawa sa atubang sang tanan nga mga tribo sang Israel, kag magadala sing kalaglagan sa iya suno sa tanan nga mga pagpakamalaut sini nga kasugtanan nga nasulat sa sini nga libro sang mga pagtulon-an sang Ginoo.

22“Sa ulihi ang mga kaliwatan sang inyo mga kaliwat kag ang mga dumoluong halin sa malayo nga mga kadutaan makakita sang mga kalaglagan kag mga pag-antos nga gindala sang Ginoo sa inyo duta.

23Ang mga kaumhan mangin-isa ka desierto, natabunan sing asupre kag asin, wala sing tanom nga mabuhi sa sini kag bisan ang mga hilamon indi magtubo. Ang inyo duta manginkaangay sang mga siudad sang Sodoma kag Gomorra, sang Adma kag Zeboim, nga ginlaglag sang Ginoo sa iya nagabalingaso nga kaakig.

24Dayon ang bug-os nga kalibutan magapamangkot, ‘Ngaa ginhimo ini sang Ginoo sa ila duta? Ano ang kabangdanan sang iya nagabalingaso nga kaakig?’

25Ang sabat amo ini, ‘Tungod kay ginlapas sang mga tawo sang Ginoo ang kasugtanan nga ginhimo nila upod sa iya, ang Dios sang ila mga katigulangan, sang pagpagwa niya sa ila halin sa Ehipto.

26Nag-alagad sila sa iban nga mga dios nga wala gid nila ginsimba sang una, ang mga dios nga gindumilian sang Ginoo nga ila simbahon.

27Gani ang Ginoo naakig sa iya mga tawo kag nagdala sa ila duta sang tanan nga mga kalalat-an nga nasulat sa sini nga libro.

28Ang Ginoo nagbalingaso sa kaakig, kag sa iya daku nga kaakig ginpahalin niya sila sa ila duta kag gintabog sila pakadto sa duta sang mga dumoluong, kag yadto sila didto tubtob sini nga adlaw.’

29“May mga sekrito nga wala ginpahayag sang Ginoo nga aton Dios. Pero ginpahayag niya ang iya Kasugoan, kag kita kag ang aton mga kaliwat dapat magtuman sini sa walay katapusan.

← Chapter 28 Jump to: Chapter 30 →