Deuteronomy 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1“Sa tapos malaglag sang Ginoo nga inyo Dios ang mga pumoluyo sa duta nga iya ginhatag sa inyo, kag naagaw na ninyo ang ila mga siudad kag mga balay kag nagaestar na kamo didto,

2partiha sa tatlo ka distrito ang duta nga may isa ka siudad sa tagsa ka distrito, nga ang tagsa ka siudad madali kadtuan agod ang tawo nga makapatay makadangop sa isa sining mga siudad agod indi sia maano.

4Kon ang isa ka tawo makapatay sang indi hungod sang bisan sin-o nga indi niya kaaway, makadangop sia sa isa sining mga siudad kag indi sia maano.

5Abi kon may duha ka tawo nga magkadto sa kagulangan sa pagtapas sang kahoy, kag samtang ang isa sa ila nagatapas sang kahoy, ang ulo sang wasay napalos kag naigo ang isa kag napatay, sarang sia makadangop sa isa sining mga siudad kag indi sia maano.

6Kon isa lamang ang siudad nga dalangpan, ayhan malayo kaayo ang iya kadtuan kag malambot sia sang pariente sang tawo nga nagatimalos kag sa iya kaakig mapatay niya ang tawo nga wala sing sala. Sa bagay, napatay niya sa indi hungod ang isa ka tawo nga indi niya kaaway.

7Gani ginasugo ko kamo sa pagpain sang tatlo ka mga siudad.

8“Kon ang Ginoo nga inyo Dios magpasangkad sang inyo kadutaan, suno sa iya ginsaad sa inyo mga katigulangan, kag mahatag sa inyo ang tanan nga duta nga iya ginsaad,

9dayon magpili kamo sing tatlo pa gid ka mga siudad. Ihatag niya ini nga duta, kon tumanon ninyo ang tanan nga akon ginasugo sa inyo karon kag kon inyo higugmaon ang Ginoo nga inyo Dios kag magkabuhi suno sa iya mga ginatudlo.

10Himua ninyo ini agod ang wala sala nga mga tawo indi mapatay kag indi kamo makasala sa pagpatay sang tawo nga wala sing sala sa duta nga ginahatag sa inyo sang Ginoo.

11“Pero abi kon ang isa ka tawo magpatay sing hungod sang iya kaaway kag dayon magpalagyo sia sa isa sining mga siudad nga dalangpan,

12ang mga pangulo sang iya kaugalingon nga banwa magapakuha sa iya kag itugyan sia sa pariente nga nagatimalos tungod sang iya pagpatay agod nga ipapatay sia.

13Indi sia pagkaluoyi. Kuhaa ninyo ini nga manugpatay sa Israel, agod ang tanan manginmaayo para sa inyo.

14“Indi paghalina ang muhon sang inyo kaingod, nga dugay na nga ginbutang sa duta nga ginahatag sa inyo sang Ginoo nga inyo Dios.

15“Ang isa ka saksi indi tuman sa pagpamatuod nga ang isa ka tawo nakasala. Kinahanglan may duha ka mga saksi sa pagpamatuod nga nakasala ang isa ka tawo.

16Kon ang isa ka tawo nagatinguha sa paghalit sang isa ka tawo paagi sa pagbutangbutang sa iya sing isa ka sala,

17sila nga duha magatindog sa lugar nga ginasimbahan kag hukman sila sang mga pari kag mga hukom nga nagaalagad sadto nga tion.

18Ang mga hukom magausisa sing maid-id sini nga kaso, kag kon ang tawo masapwan nga nagabutangbutang sia batok sa iya kapareho nga Israelinhon,

19pamatbatan sia sing silot nga amo kuntani ang silot sa iya ginasumbong. Sa sini nga paagi makuha ninyo ini nga kalautan sa tunga ninyo.

20Dayon ang tagsatagsa nga makabati sini magakahadlok kag wala na sing may magahimo liwat sining malaut nga butang.

21Sa kaangay nga mga kaso, indi kamo magkaluoy. Ang silot amo ang kabuhi para sa kabuhi, mata para sa mata, ngipon para sa ngipon, kamot para sa kamot, kag tiil para sa tiil.

← Chapter 18 Jump to: Chapter 20 →