Deuteronomy 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1“Sang ulihi nagbalik kita sa desierto, pakadto sa Mapula nga Dagat, suno sa ginsugo sang Ginoo. Kag naglibutlibot kita sa kabakuloran sang Edom sing malawig nga mga tinion.

2“Dayon ang Ginoo nagsiling sa akon,

3nga madugay na ang aton paglibutlibot sa mga kabakuloran kag dapat kita magpadayon sa aminhan.

4Ginsingganan niya ako nga amo ini ang isiling sa inyo: ‘Manugsulod na kamo sa kabakuloran sang Edom, ang kadutaan sang inyo mga pariente, ang mga kaliwat ni Esau. Magakahadlok sila sa inyo,

5pero indi kamo magpakig-away sa ila tungod kay indi ko kamo paghatagan sang ila duta bisan isa lang ka tapak. Ginhatag ko ang Edom sa mga kaliwat ni Esau.

6Sarang kamo makabakal sing kalan-on kag tubig sa ila.’

7“Dumdoma nga ang Ginoo nga inyo Dios nagbendisyon sa inyo sa tanan nga butang nga inyo ginhimo. Gintatap niya kamo samtang nagpanglakaton kamo sa sining malapad nga desierto. Nag-upod sia sa inyo sa sulod sang kwarenta ka tuig, kag ginhatagan niya kamo sang tanan ninyo nga mga kinahanglanon.

8“Gani nagpadayon kita sa paglakat kag naghalin kita sa mga banwa sang Elat kag Eziongeber pakadto sa Patay nga Dagat kag nagliko kita pa naaminhan-nasidlangan padulong sa Moab.

9Kag ang Ginoo nagsiling sa akon, ‘Indi pag-anha ang mga pumoluyo sang Moab, ang mga kaliwat ni Lot, ukon indi magpakig-away sa ila. Ginhatag ko sa ila ang siudad sang Ar kag indi ko pag-ihatag sa imo ang bisan ano nga bahin sang ila duta.’” (

10Ang gamhanan nga kaliwat sang mga higante nga ginatawag Emim nagaestar anay didto sa Ar. Pareho sila katag-as sang mga Anakim, isa man ka kaliwat sang mga higante.

11Kaangay sang mga Anakim, ginatawag man sila nga mga Refaim, pero ang mga Moabnon nagatawag sa ila nga Emim.

12Ang mga Horhanon nag-estar anay sa Edom, pero ang mga kaliwat ni Esau nagtabog kag nagpapas sa ila. Dayon ang mga kaliwat ni Esau amo ang nag-estar didto, subong nga ang mga Israelinhon sang ulihi nagtabog man sang ila mga kaaway halin sa duta nga ginhatag sang Ginoo sa ila.)

13“Dayon nagtabok kita sa Suba sang Zered suno sa mando sang Ginoo sa aton.

14Mga trayntay otso na ka tuig ang nakaligad sang kita naghalin sa Kades Barnea tubtob sang aton pagtabok sa Zered. Ang tanan nga mga hangaway sadto nga kaliwatan nagkalamatay, suno sa ginsiling sang Ginoo.

15Ang Ginoo nagpadayon nga nagsumpong sa ila tubtob nga nagkalamatay sila tanan.

16“Sang magkalamatay ang tanan nga mga hangaway,

17ang Ginoo nagsiling sa aton,

18‘Karon nga adlaw maagi kamo sa kadutaan sang Moab paagi sa Ar.

19Dayon malapit na lang kamo sa duta sang mga Amonhon, ang mga kaliwat ni Lot. Indi sila pag-anha ukon magpakig-away sa ila, tungod kay indi ko pag-ihatag sa inyo ang bisan ano nga bahin sang ila duta nga ginhatag ko sa ila.’” (

20Ini nga kadutaan ginatawag man nga duta sang Refaim, ang ngalan sang mga tawo nga nag-estar anay didto. Ang mga Amonhon nagtawag sa ila nga Zamzumim.

21Pareho sila katag-as sang mga Anakim. Madamo kag gamhanan sila nga mga kaliwatan. Pero ang Ginoo nagpapas sa ila, gani ang mga Amonhon nag-agaw sang ila duta kag nag-estar didto.

22Amo man ini ang ginhimo sang Ginoo sa mga Edomnon, ang mga kaliwat ni Esau nga nag-estar sa kabakuloran sang Edom. Ginpapas niya ang mga Horhanon, gani ang mga Edomnon nag-agaw sang ila duta kag nag-estar didto tubtob karon.

23Ang mga pumoluyo sa isla sang Creta nagpapas sang mga Avim nga nag-estar sa mga kabarangayan tubtob sa bagatnan sang Gaza. Gin-agaw nila ang ila duta kag nag-estar sila didto.)

24“Ang Ginoo nagsiling, ‘Karon lakat kamo kag magtabok sa suba sang Arnon. Ginatugyan ko sa inyo gahom si Sihon nga Amornon nga hari sang Hesbon lakip ang iya duta. Salakaya sia kag agawa ang iya duta.

25Sugod subong nga adlaw bisan diin pahadlukon ko ang tanan nga mga tawo sa inyo. Ang tanan magakurog sa kahadlok kon mitlangon ang inyo ngalan.’

26“Dayon halin sa desierto sang Kedemot nagpadala ako sang mga mensahero kay Sihon nga hari sang Hesbon nga may mensahe sang paghidait nga nagasiling:

27‘Tugoti kami sa pag-agi sa imo duta. Maderetso lang kami kag indi na magpanghapithapit.

28Bayaran namon ang kalan-on nga amon makaon kag ang tubig nga amon mainom. Maagi lang kami sa imo duta,

29tubtob makatabok kami sa Suba sang Jordan pakadto sa duta nga ginahatag sa amon sang Ginoo nga amon Dios. Ang mga kaliwat ni Esau nga nagaestar sa Edom, kag ang mga Moabnon nga nagaestar sa Ar, nagtugot sa amon sa pag-agi sa ila duta.’

30“Pero si Haring Sihon indi magtugot sa aton sa pag-agi sa iya duta. Ang Ginoo nga inyo Dios nagpatig-a sang iya tagipusoon kag indi niya kita pagpaagyon, agod aton sia malutos kag maagaw ang duta nga aton karon ginapanag-iyahan.

31“Dayon ang Ginoo nagsiling sa akon, ‘Tan-awa, ginatugyan ko si Haring Sihon kag ang iya duta sa imo. Kuhaa ini kag panag-iyahi.’

32Si Sihon kag ang iya bug-os nga hangaway naggwa sa pagpakig-away sa aton malapit sa banwa sang Jahaz,

33pero ang Ginoo nga aton Dios nagtugyan sa iya sa aton gahom kag ginpatay naton sia, ang iya mga anak nga lalaki kag ang tanan niya nga mga tinawo.

34Sa amo man nga tion gin-agaw naton kag ginlaglag ang tagsa ka banwa kag ginpamatay ang tagsa ka lalaki, babayi kag tanan nga mga kabataan. Wala gid kita sang ginbilin nga buhi.

35Ginkuha naton ang mga kasapatan kag gin-agaw ang mga pagkabutang sa mga banwa.

36Ang Ginoo nga aton Dios nagtugot sa aton sa pag-agaw sang tanan nga mga banwa halin sa Aroer sa higad sang Kapatagan sang Arnon tubtob sa alagyan pakadto sa Galaad lakip ang siudad nga yara sa tunga sang kapatagan. Wala sing banwa nga may mataas nga pader para sa aton.

37Pero wala kita magpalapit sa kadutaan sang mga Amonhon, ukon sa pangpang sang Suba sang Jaboc, ukon sa mga banwa sang kabakuloran, ukon sa bisan diin nga lugar nga ginmando sang Ginoo nga aton Dios nga indi pagkadtuan.

← Chapter 1 Jump to: Chapter 3 →