Deuteronomy 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Gintipon ni Moises ang tanan nga mga katawhan sang Israel kag ginsingganan sila, “Mga tawo sang Israel, pamatii ninyo ang tanan nga mga kasugoan nga akon ihatag sa inyo subong nga adlaw. Tun-i ninyo ini kag tumanon gid.

2Ang Ginoo nga aton Dios naghimo sing kasugtanan sa aton didto sa Bukid sang Sinai,

3indi lamang sa aton mga katigulangan kundi sa aton man tanan nga nagakabuhi tubtob sini nga adlaw.

4Ang Ginoo naghambal sa inyo sing tampad gikan sa kalayo didto sa bukid.

5Sadto nga tion nagpatunga ako sa inyo kag sa Ginoo sa pagsugid sa inyo sang iya ginsiling tungod kay nahadlok kamo sang kalayo kag indi kamo magtaklad sa bukid. “Ang Ginoo nagsiling,

6‘Ako amo ang Ginoo nga imo Dios nga nagpagwa sa imo sa Ehipto, sa diin gin-ulipon ikaw.

7“‘Indi ka magsimba sa iban nga dios kundi sa akon lamang.

8“‘Indi ka maghimo para sa imo kaugalingon sing mga imahen sang bisan ano nga butang nga yara sa langit, ukon sa duta, ukon sa tubig sa idalom sang duta.

9Indi ka magluhod ukon magsimba sa atubangan sini, kay ako amo ang Ginoo nga imo Dios, maimon nga Dios. Silutan ko ang mga nagadumot sa akon kag ang ila mga kaliwat tubtob sa ikatlo kag ikap-at nga kaliwatan.

10Pero ipakita ko ang akon paghigugma sa linibo nga mga kaliwatan nga nagahigugma sa akon kag nagatuman sang akon mga kasugoan.

11“‘Indi mo paggamiton ang akon ngalan para sa malaut nga mga tinutuyo, kay ako, ang Ginoo nga imo Dios magasilot sa kay bisan sin-o nga nagagamit sang akon ngalan sing indi husto.

12“‘Tumana ang Adlaw nga Inugpahuway, kag gamita ini para sa akon, subong nga ako, ang Ginoo nga imo Dios nagsugo sa imo.

13Mag-obra ka sa sulod sang anom ka adlaw,

14pero ang ikapito nga adlaw amo ang Adlaw nga Inugpahuway nga gamiton para sa akon. Sa sina nga adlaw wala sing may mag-obra—bisan ikaw, ang imo mga kabataan, ang imo mga suloguon, ang imo mga kasapatan, ukon ang mga dumoluong nga nagaestar sa imo pungsod. Ang imo mga ulipon dapat magpahuway pareho sa imo.

15Dumdoma nga ikaw nangin-ulipon man sa duta sang Ehipto, kag ako, ang Ginoo nga imo Dios nagluwas sa imo paagi sa akon daku nga gahom kag kusog. Gani ginasugo ko ikaw sa pagtuman sang Adlaw nga Inugpahuway.

16“‘Tahura ang imo amay kag iloy subong nga ako, ang Ginoo nga imo Dios nagasugo sa imo, agod nga ang tanan manginmaayo para sa imo kag magakabuhi ka sing malawig sa duta nga akon ginahatag sa imo.

17“‘Indi ka magpatay.

18“‘Indi ka magpanginbabayi ukon magpanginlalaki.

19“‘Indi ka magpangawat.

20“‘Indi ka magsaksi sing binutig sa imo isigkatawo.

21“‘Indi ka magkaibog sa asawa sang imo isigkatawo. Indi ka magkahisa sang iya balay, sang iya duta, sang iya mga ulipon, sang iya mga baka, sang iya mga asno, ukon sang bisan ano niya nga pagkabutang.’

22“Ang Ginoo naghatag sini nga mga sugo sa inyo tanan nga mga tawo nga nagtipon didto sa bukid. Amo lang ini ang iya ginhatag kag wala na sia sing gindugang sang paghambal niya sa mabaskog nga tingog halin sa kalayo kag halin sa madamol nga panganod. Dayon ginsulat niya ang mga sugo sa duha ka mga lapida nga bato kag ginhatag niya ini sa akon.

23“Sang nagadabadaba ang bug-os nga bukid, kag nabatian ninyo ang tingog halin sa kadudulman, ang inyo mga katigulangan kag mga pangulo sang inyo mga tribo nagkadto sa akon

24kag nagsiling, ‘Ang Ginoo nga amon Dios nagpakita sa amon sang iya gahom kag sang iya pagkahalangdon, sang mabatian namon sia nga naghambal gikan sa kalayo! Karon nga adlaw nakita naton nga sarang pa mabuhi ang isa ka tawo bisan mabatian niya ang Dios nga naghambal sa iya.

25Pero ngaa nga ibutang namon liwat sa katalagman ang amon kabuhi? Ang makahaladlok nga kalayo magasunog sa amon. Mapatay gid kami, kon mabatian namon ang Ginoo nga amon Dios kon sia maghambal liwat.

26May yara bala nga tawo nga nabuhi sa tapos niya mabatian ang buhi nga Dios nga naghambal gikan sa kalayo?

27Balik ka, Moises, kag pamatii ang tanan nga ginasiling sang Ginoo nga aton Dios. Dayon balik ka diri sa amon, kag sugiri kami sang iya ginsiling sa imo. Mamati kami kag magatuman.’

28“Sang mabatian ini sang Ginoo, nagsiling sia sa akon, ‘Nabatian ko ang ginsiling sang mga tawo kag husto sila.

29Kuntani amo ini pirme ang ila balatyagon! Kuntani tahuron nila ako sa gihapon kag tumanon nila ang tanan ko nga mga sugo, agod ang tanan manginmaayo para sa ila kag sa ila mga kaliwatan sa wala sing katapusan.

30Lakat ka, kag singgana sila nga magbalik sa ila mga tolda.

31Pero ikaw, Moises, magpabilin ka diri upod sa akon kag ihatag ko sa imo ang tanan ko nga mga kasugoan kag mga sugo. Itudlo ini sa mga tawo agod tumanon nila ini sa duta nga akon ginahatag sa ila.’

32“Pumoluyo sang Israel, tumana gid ninyo ang tanan nga ginsugo sa inyo sang Ginoo nga inyo Dios. Indi ninyo paglapasa ang bisan ano nga bahin sang iya mga kasugoan.

33Tumana ninyo ini tanan agod ang tanan manginmaayo para sa inyo kag magapadayon kamo sa pag-estar sa duta nga inyo pagapanag-iyahan.

← Chapter 4 Jump to: Chapter 6 →