Deuteronomy 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1“Pamati kamo, mga tawo sang Israel! Manugtabok na kamo sa Suba sang Jordan sini nga adlaw kag inyo panag-iyahan ang duta sang mga kapungsoran nga mas daku kag mas gamhanan pa sang sa inyo. Ang ila mga siudad dalagku nga ang ila mga pader palibot nagalambot sa langit.

2Ang mga tawo mismo matag-as kag makusog, mga higante sila kag inyo nabatian ang sugid nga wala sing may makabato sa ila.

3Pero karon makita gid ninyo nga ang Ginoo nga inyo Dios magauna sa inyo kaangay sang isa ka nagadabdab nga kalayo. Lutoson niya sila samtang nagaabanse kamo, agod matabog ninyo sila kag malaglag gilayon suno sa iya ginsaad.

4“Sa tapos sila matabog para sa inyo sang Ginoo nga inyo Dios, indi kamo magsiling sa inyo kaugalingon nga gindala niya kamo diri sa pagpanag-iya sang duta tungod kay takos kamo. Indi amo ina, ang Ginoo magatabog sini nga mga tawo tungod kay malaut sila.

5Indi tungod kay maayo kamo kag nagahimo sing matarong nga ang Ginoo naghatag sa inyo sang ila duta. Tabugon niya sila tungod kay malaut sila, kag tungod kay luyag niya tumanon ang iya ginsaad sa inyo mga katigulangan nga amo sanday Abraham, Isaac kag Jacob.

6Dumdoma ninyo nga ang Ginoo wala nagahatag sa inyo sining mapatubason nga duta tungod kay takos kamo. Ang matuod nga batinggilan gid kamo nga mga tawo.

7“Indi ninyo pagkalimti kon daw ano ang pagpaakig ninyo sa Ginoo nga inyo Dios didto sa desierto. Halin sa adlaw nga naggwa kamo sa Ehipto tubtob sang inyo pag-abot diri, nagsupak kamo sa iya.

8Bisan didto sa Bukid sang Sinai ginpaakig ninyo ang Ginoo, sa bagay nga handa sia sa paglaglag sa inyo.

9Nagtaklad ako sa bukid sa pagbaton sang mga lapida nga bato nga nasulatan sang kasugtanan nga ginhimo sang Ginoo sa inyo. Nagpabilin ako didto sing kwarenta ka adlaw kag gab-i, kag wala ako magkaon kag mag-inom sang bisan ano.

10Dayon ang Ginoo naghatag sa akon sing duha ka mga lapida nga bato. Sa sini ginsulat niya paagi sa iya kaugalingon nga kamot ang iya ginhambal sa inyo gikan sa kalayo sadtong adlaw nga nagtipon kamo didto sa bukid.

11Sa tapos sadtong kwarenta ka adlaw kag gab-i ang Ginoo naghatag sa akon sang duha ka mga lapida nga bato nga iya nasulatan sang kasugtanan.

12“Dayon ang Ginoo nagsiling sa akon, ‘Dulhog ka gilayon halin diri tungod kay ang imo mga tawo nga gindala pa gwa sa Ehipto naghimo sing mga kalautan. Kadali sa ila magbiya sa ginsugo ko nga ila himuon kag naghimo sila sing diosdios para sa ila kaugalingon.’

13“Ang Ginoo nagsiling man sa akon, ‘Nahibaluan ko kon daw ano ang pagkabatinggilan sini nga mga tawo.

14Pabay-i lang ako. Laglagon ko sila agod wala na sing magadumdom sa ila. Dayon himuon ko ikaw nga amay sang isa ka pungsod nga mas daku kag mas gamhanan pa sang sa ila.’

15“Gani nagbalik ako kag nagdulhog sa bukid nga nagadala sang duha ka mga lapida nga bato nga nasulatan sang kasugtanan. Ang bukid nagadabadaba sa kalayo.

16Nakita ko nga kadali sa inyo maglapas sang sugo nga ginhatag sa inyo sang Ginoo nga inyo Dios, kag nagpakasala kamo batok sa iya paagi sa paghimo para sa inyo kaugalingon sang diosdios sa dagway sang torite nga baka.

17Gani, didto sa atubang ninyo ginpusdak ko ang mga lapida nga bato kag nagkalabuka ini.

18Gani sa liwat naghapa ako sa atubang sang Ginoo kag wala ako magkaon kag mag-inom sa sulod sang kwarenta ka adlaw kag gab-i. Ginhimo ko ini tungod kay nagpakasala kamo batok sa Ginoo kag nagpaakig sa iya.

19Hinadlukan ako sa nagabalingaso nga kaakig sang Ginoo tungod kay naakig sia nga handa sa paglaglag sa inyo, pero sa liwat ang Ginoo nagpamati sa akon.

20Ang Ginoo naakig man kay Aaron nga daw patyon niya sia, kag sa sadto nga tion nagpangamuyo man ako para kay Aaron.

21Ginkuha ko yadtong malaut nga butang nga inyo ginhimo—ang baka nga bulawan—kag ginhaboy ko ini sa kalayo. Dayon gindugmok ko ini, ginbukbok kaangay sang yab-ok, kag ginsabwag ko ini sa sapa nga nagailig halin sa bukid.

22“Ginpaakig man ninyo ang Ginoo nga inyo Dios sang didto kamo sa Tabera, Masa, kag Kibrot-hataava.

23Sang ginpadala kamo niya halin sa Kades Barnea nga may mando sa pagtaklad kag sa pagpanag-iya sang duta nga iya ginahatag sa inyo, nagsupak kamo sa iya. Wala kamo magsalig ukon magtuman sa iya.

24Halin sang makilala ko kamo nagsupak kamo sa Ginoo.

25“Gani naghapa ako sa atubang sang Ginoo sa sulod sang kwarenta ka adlaw kag gab-i tungod kay nagpamat-od sia sa paglaglag sa inyo.

26Kag nagpangamuyo ako, ‘ Ginoo nga Gamhanan, kon mahimo indi paglaglaga ang imo kaugalingon nga mga tawo, ang mga tawo nga imo ginluwas kag ginpagwa sa Ehipto paagi sa imo daku nga kusog kag gahom.

27Dumdoma ang imo mga alagad nga amo sanday Abraham, Isaac, kag Jacob kag indi pagsapaka ang pagkabatinggilan, ang pagkamalaut, kag ang sala sini nga mga tawo,

28kay basi ang mga Ehiptohanon magsiling nga indi ikaw makasarang sa pagdala sang imo mga tawo sa duta nga imo ginsaad sa ila. Ang mga Ehiptohanon magasiling nga gindala mo ang imo mga tawo sa desierto agod pamatyon sila tungod kay gindumtan mo sila.

29Kon sa bagay, ini nga mga tawo imo ginpili nga mangin-imo kaugalingon, kag ginpagwa mo sa Ehipto paagi sa imo daku nga gahom kag kusog.’

← Chapter 8 Jump to: Chapter 10 →