Deuteronomy 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1“Indi kamo maghalad sa Ginoo nga inyo Dios sang isa ka baka ukon karnero nga may depekto, kay ini ginakangil-aran sang Ginoo.

2“Kon sa inyo mga banwa nga ginhatag sa inyo sang Ginoo nga inyo Dios, may isa ka lalaki ukon babayi nga nakasala batok sa Ginoo kag nakalapas sang iya kasugtanan

3paagi sa pagsimba kag pag-alagad sa iban nga mga dios, ukon sa adlaw, sa bulan, ukon sa mga bituon nga batok sa sugo sang Ginoo,

4kag kon makabati ka sini, usisaa gid sing maayo. Kon matuod nga ining malaut nga butang natabo sa Israel,

5dayon dalha ini nga tawo sa gwa sang banwa kag batuha sia tubtob mapatay.

6Ang isa ka tawo sarang lamang mapamatbatan sang kamatayon sa panaksihon sang duha ukon tatlo ka mga saksi, pero indi sia mapamatbatan sang kamatayon sa panaksihon sang isa ka tawo lamang.

7Ang mga saksi amo ang nahauna nga dapat maghaboy sing mga bato, kag dayon ang iban nga mga tawo magbato man sa amo nga tawo. Sa amo nga paagi makuha ini nga kalautan.

8“Kon may mga kaso nga mabudlay gid hukman subong sa pagpatay sing hungod ukon indi hungod, ukon pag-agaway sang mga pagkabutang, ukon pagsakit sang isa ka tawo, magkadto kamo sa lugar nga ginasimbahan nga ginpili sang Ginoo nga inyo Dios

9kag itugyan ang inyo kaso sa mga pari nga mga Levita kag sa hukom sina nga tion kag pahukmi sa ila ini nga kaso.

10Magahatag sila sang ila pamatbat, kag himuon ninyo ang suno gid sa ginasiling nila.

11Batuna ang ila pamatbat kag tumana ang tanan nila nga mga ginasiling.

12Ang bisan sin-o nga indi magtuman sa hukom ukon sa pari sa sina nga tion pagapatyon, kag sa sini nga paagi makuha sa pumoluyo sang Israel ini nga kalautan.

13Dayon ang tagsatagsa nga makabati sini magakahadlok, kag wala sing bisan isa nga magapangahas sa paghimo sang amo nga paagi.

14“Sa tapos ninyo mapanag-iyahan ang duta nga ginahatag sang Ginoo nga inyo Dios sa inyo kag makaestar na kamo didto, dayon magasiling kamo, ‘Dali magabutang man kita sang hari subong sang mga kapungsoran sa palibot naton.’

15Pat-uron gid ninyo nga ang tawo nga ginpili ninyo nga manginhari amo ang ginpili sang Ginoo. Kinahanglan isa sia sang inyo mga kasimanwa. Indi paghimua ang isa ka dumoluong nga mangin-inyo hari.

16Ang hari indi dapat magpanag-iya sang madamo nga mga kabayo para sa iya hangaway, kag indi sia magpasugo sing mga tawo sa Ehipto sa pagbakal sing mga kabayo, tungod kay ang Ginoo nagsiling nga ang iya mga tawo indi na gid magbalik didto.

17Ang hari indi dapat mag-angkon sing madamo nga mga asawa, tungod kay ini sila magapahilayo sa iya sa Ginoo, kag indi sia dapat mag-angkon sing madamo nga mga pilak kag bulawan.

18Kon maghari sia, kinahanglan may libro sia sang mga kasugoan sang Dios kag mga pagtulon-an nga ginkopya halin sa nahauna nga libro nga gintago sang mga pari nga Levita.

19Kinahanglan tipigan niya ini kag basahon sa bug-os niya nga kabuhi, agod magtuon sia sa pagtahod sa Ginoo kag sa pagtuman sing maayo sang tanan nga ginasugo sa sini.

20Sa sini nga paagi indi sia magpabugal sa iya kasimanwa nga mga Israelinhon kag indi sia maglapas sang bisan ano nga mga sugo sang Ginoo. Dayon sia kag ang iya mga kaliwat magagahom sa Israel sa madamo nga mga kaliwatan.

← Chapter 16 Jump to: Chapter 18 →