Deuteronomy 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1“Dayon ang Ginoo nagsiling sa akon, ‘Basbas ka sang duha ka mga lapida nga bato kaangay sang nahauna, kag himo ka sang Kaban nga kahoy nga imo butangan sini. Taklad ka sa bukid

2kag isulat ko sa sining mga lapida nga bato ang akon ginsulat sa mga lapida nga bato nga imo ginbuka. Dayon isulod mo ini sa Kaban.’

3“Gani naghimo ako sing Kaban nga nahimo sa kahoy nga akasya kag nagbasbas ako sang duha ka mga lapida nga bato kaangay sang nahauna kag gindala ko ini sa ibabaw sang bukid.

4Dayon ang Ginoo nagsulat sa sining mga lapida nga bato sang amo man nga mga pulong nga iya ginsulat sa nahauna, ang Napulo ka Sugo nga ginhatag niya sa inyo sang maghambal sia gikan sa kalayo sadtong adlaw nga nagtipon kamo sa bukid. Ang Ginoo naghatag sa akon sining mga lapida nga bato,

5kag nagbalik ako kag nagdulhog sa bukid. Dayon ginbutang ko ini sa Kaban nga akon ginhimo, suno sa sugo sang Ginoo, kag halin sadto didto ini.” (

6Ang mga Israelinhon nagpanglakaton halin sa mga bubon nga iya sang mga pumoluyo sang Jaakan kag nagkadto sila sa Mosera. Si Aaron napatay kag ginlubong didto, kag ang iya anak nga si Eleazar nagbulos sa iya subong pari.

7Halin didto nagkadto sila sa Gudgoda kag dayon sa Jotebata, ang duta nga may madamo sing tubig.

8Didto sa bukid, ang Ginoo nagpili sang mga tawo gikan sa tribo ni Levi nga magadala sang Kaban sang Kasugtanan, sa pag-alagad sa iya subong mga pari kag sa pagbendisyon sa iya ngalan. Kag ginahimo nila ini tubtob sini nga adlaw.

9Tungod sini, ang tribo ni Levi wala ginhatagi sang duta pareho sang iban nga mga tribo. Ang ila nabaton amo ang pagkapari suno sa ginsaad sa Ginoo nga inyo Dios.)

10“Nagpabilin ako sa bukid sa sulod sang kwarenta ka adlaw kag gab-i, subong sang akon ginhimo sang una. Ang Ginoo nagpamati sa akon liwat kag wala niya kamo paglaglaga.

11Dayon nagsiling sia nga ako magalakat kag mangin-inyo pangulo, agod makalakat kamo kag makapanag-iya sang duta nga iya ginsaad nga ihatag sa inyo mga katigulangan.

12“Karon, mga tawo sang Israel, magpamati kamo sang ginapangayo sa inyo sang Ginoo nga inyo Dios: magsimba kamo sa Ginoo kag tumana ninyo ang iya tanan nga ginasugo. Higugmaa man kag alagara ninyo sia sa bug-os ninyo nga tagipusoon kag kalag,

13kag tumana ang tanan niya nga mga kasugoan. Ginahatag ko ini sa inyo karon nga adlaw para sa inyo kaayuhan.

14Bisan ang pinakamataas nga mga langit iya sang Ginoo. Ang duta kag ang tanan nga yara sa sini iya man.

15Pero ang paghigugma sang Ginoo sa inyo mga katigulangan daku gid sa bagay nga ginpili niya kamo sa baylo sang iban nga mga tawo. Kamo pinili gihapon tubtob sini nga adlaw.

16Gani, sugod karon tumana ninyo ang Ginoo kag indi magpakatig-a.

17Ang Ginoo nga inyo Dios gamhanan sa tanan nga mga dios kag sa tanan nga mga gumalahom. Daku sia kag gamhanan, kag dapat sia pagakahadlukan. Wala sia sing ginapasulabi kag indi mahamhaman.

18Ginatatap niya sing nagakaigo ang mga ilo kag ang mga balo, ginahigugma niya ang mga dumoluong nga nagaestar upod sa aton mga kasimanwa kag ginahatagan niya sila sing pagkaon kag mga bayu.

19Gani, higugmaa man ninyo ang mga dumoluong, tungod kay kamo mga dumoluong man anay sa Ehipto.

20Tahura ninyo ang Ginoo nga inyo Dios kag sia lang ang simbaha. Magmatutom kamo sa iya kag magsaad kamo sa iya lamang ngalan.

21Dayawa ninyo sia, kay sia amo ang inyo Dios kag nakita sang inyo kaugalingon nga mga mata ang daku kag makatilingala nga mga butang nga iya ginhimo para sa inyo.

22Sang pagkadto sang inyo mga katigulangan sa Ehipto, setenta lamang sila. Pero karon ang Ginoo nga inyo Dios nagpadamo sa inyo subong sang mga bituon sa langit.

← Chapter 9 Jump to: Chapter 11 →