Deuteronomy 28 — Ilonggo (Maayong Balita nga Biblia (2012))

1“Kon tumanon ninyo ang Ginoo nga inyo Dios kag himuon sing matutom ang tanan niya nga mga sugo nga akon ginahatag sa inyo sini nga adlaw, himuon niya kamo nga mas gamhanan sang sa iban nga pungsod sa duta.

7“Ang Ginoo magalutos sang inyo mga kaaway kon sila magasalakay sa inyo. Magatingob sila sa pagsalakay sa inyo, pero magapalagyo sila nga nagalinapta.

8“Ang Ginoo nga inyo Dios magapauswag sang inyo palangitan-an kag magapuno sang inyo bodega sang trigo. Bendisyunan niya kamo sa duta nga iya ginahatag sa inyo.

9“Kon tumanon ninyo ang Ginoo nga inyo Dios kag maghimo sang tanan nga iya ginasugo, himuon niya kamo nga iya kaugalingon nga mga tawo suno sa iya ginsaad.

10Dayon ang tanan nga mga katawhan sa duta makahibalo nga ang Ginoo nagpili sa inyo nga mangin-iya kaugalingon nga katawhan, kag magakahadlok sila sa inyo.

11Ang Ginoo magahatag sa inyo sing madamo nga mga kabataan, madamo nga mga baka, kag bugana nga mga patubas sa duta nga ginsaad niya sa inyo mga katigulangan nga ihatag niya sa inyo.

12Magapadala sia sing ulan sa nagakaigo nga tion gikan sa talaguan sang iya madamo nga mga manggad sa langit kag pauswagon ang tanan ninyo nga hilikuton, agod magapahulam kamo sa madamo nga mga kapungsoran pero indi kamo magpanghulam sa ila.

13Ang Ginoo nga inyo Dios magahimo sa inyo nga pangulo sa tunga sang mga kapungsoran kag indi nga sumolunod lang. Magauswag kamo sa gihapon kag indi kamo mapaslawan kon tumanon ninyo sing matutom ang tanan niya nga mga sugo nga ginahatag ko sa inyo sini nga adlaw.

14Pero indi gid ninyo paglapason ini, ukon magsimba kag mag-alagad sa iban nga mga dios.

15“Pero kon indi kamo magtuman sa Ginoo nga inyo Dios kag indi kamo maghimo sing matutom sang tanan niya nga mga sugo kag mga kasugoan nga akon ginahatag sa inyo sini nga adlaw, ini tanan nga mga kalainan mahanabo sa inyo:

16“Ang Ginoo magapakamalaut sang inyo mga kabanwahanan kag mga kaumhan.

17“Ang Ginoo magapakamalaut sang inyo mga patubas nga trigo kag sang mga kalan-on nga ginaaman ninyo gikan sa sini.

18“Ang Ginoo magapakamalaut sa inyo paagi sa paghatag sa inyo sang pila lamang ka bilog nga mga kabataan, pigaw nga patubas, kag pila lamang ka bilog nga mga baka kag mga karnero.

19“Ang Ginoo magapakamalaut sang tanan ninyo nga ginahimo.

20“Kon maghimo kamo sing malaut kag magsikway sa Ginoo, sia magapadala sa inyo sang kalaglagan, pagkalisang, kag kagamo sa tanan nga inyo ginahimo, tubtob malaglag kamo sing bug-os sa gilayon.

21Magapadala sia sa inyo sang nagadinasundason nga balatian tubtob nga wala sing isa nga mabilin sa inyo sa duta nga madali na lang ninyo panag-iyahan.

22Ang Ginoo magapadala sa inyo sang makalalaton nga mga balatian, palanghubag kag hilanat. Magapadala sia sang malawig nga tingadlaw, kag mainit nga dapya sang hangin sa pagpierde sang inyo mga tanom. Ini nga mga halit magaabot sa inyo tubtob magkalamatay kamo.

23Wala sing ulan nga magatupa, kag ang inyo duta magatig-a subong sang salsalon.

24Sa baylo sang ulan, ang Ginoo magapadala sa inyo sang bagyo nga yab-ok kag balas tubtob malaglag kamo.

25“Ipalutos kamo sang Ginoo sa inyo mga kaaway. Magatingob kamo sa pagsalakay sa ila pero magapalagyo kamo nga nagalinapta, kag ang tanan nga mga katawhan sang duta pagakugmaton kon makita nila ang nagakahanabo sa inyo.

26Kon magkalamatay kamo, ang mga pispis kag mga sapat nga talunon magaabot sa pagkaon sang inyo mga bangkay kag wala sing bisan isa nga magapahadlok sa ila.

27Ang Ginoo magapadala sing mga hubag sa inyo subong sang iya ginhimo sa mga Ehiptohanon. Patuboan niya sing mga hubag ang inyo bug-os nga lawas. Magaarikison kamo kag magapangalot pero wala sing bulong sini.

28Ang Ginoo magapabuang sa inyo, magabulag kag magapalisang sa inyo.

29Magapangapkap kamo bisan masanag ang adlaw subong sang bulag, kag indi kamo makatultol sang inyo alagyan. Indi kamo magmadinalag-on sa inyo pagahimuon. Pagapiguson kamo kag pagakawatan pirme, kag wala sing isa nga magabulig sa inyo.

30“May inugpakasal kamo nga nobya pero iban ang nagapakasal sa iya. Magapatindog kamo sing balay pero indi kamo makaestar sini. Magatanom kamo sing mga ubas pero indi kamo makakaon sang bunga sini.

31Ang imo baka pagaihawon sa inyo atubang pero indi kamo makatilaw sang karne sini. Ang inyo mga asno pagaguyoron palayo samtang nagatan-aw kamo kag indi ini pag-ibalik sa inyo. Ang inyo mga karnero ihatag sa inyo mga kaaway pero wala sang bisan isa nga magabulig sa inyo.

32Ang inyo mga anak nga lalaki kag babayi ihatag subong mga ulipon sa mga dumoluong samtang nagatan-aw kamo. Adlaw-adlaw ang inyo mga mata kapuyon sa paglantaw sang pagbalik sang inyo mga kabataan pero wala kamo sing may mahimo.

33Ang isa ka dumoluong nga pungsod magakuha sang tanan nga mga patubas nga inyo ginpangabudlayan sing tudo, samtang wala kamo sing batunon kundi ang padayon nga pagpigos kag pagpintas.

34Magabuang kamo tungod sang inyo mga pag-antos.

35Ang Ginoo magapatubo sang mga katol nga indi mag-ayo sa inyo mga batiis, kag mga hubag halin sa inyo ulo tubtob sa tiil.

36“Ang Ginoo magadala sa inyo kag sa inyo hari didto sa iban nga pungsod, sa diin wala gid ikaw kag ang inyo mga katigulangan makaestar. Didto magaalagad kamo sa mga diosdios nga nahimo sa kahoy kag bato.

37Sa mga pungsod sa diin ang Ginoo magapaaplaag sa inyo, ang mga tawo magakatingala sa matabo sa inyo. Magayaguta kag magahikay sila sa inyo.

38“Magasab-og kamo sang madamo nga mga binhi, pero diutay lang ang inyo anihon tungod kay ang mga apan magakaon sang inyo tanom.

39Magatanom kamo sing mga ubas kag magaatipan sini, pero indi kamo makapamupo sang iya bunga ukon makainom sang bino gikan sini tungod kay ang mga ulod magakaon sing balagon sang ubas.

40Ang mga kahoy nga olivo magatubo bisan diin lang sa inyo duta, pero wala kamo sing lana nga makuha tungod kay ang iya mga bunga magakapulak.

41Magapamata kamo sing mga anak nga lalaki kag babayi, pero pagakuhaon sila sa inyo, tungod kay sila pagabihagon sa inaway.

42Ang tanan ninyo nga mga kahoy kag mga tanom pagakaunon sang mga apan.

43“Ang mga dumoluong nga nagaestar sa inyo duta magaamat-amat gamhanan, samtang kamo nagaamat-amat paubos.

44Sila may kwarta nga ipahulam sa inyo, pero wala kamo sang ipahulam sa ila. Sa ulihi, sila magagahom sa inyo.

45“Ini tanan nga mga kalainan magaabot sa inyo. Magapabilin ini sa inyo tubtob nga malaglag kamo tungod kay wala ninyo pagtumana ang Ginoo nga inyo Dios kag wala ninyo paghimua ang tanan nga mga kasugoan nga ginhatag niya sa inyo.

46Ini mangintanda sang silot sang Dios sa inyo kag sa inyo mga kaliwatan sa wala sing katapusan.

47Ang Ginoo nagpauswag sa inyo sa tanan nga butang, pero indi kamo mag-alagad sa iya nga may kalipay kag kasadya sa tagipusoon.

48Gani, magaalagad kamo sa mga kaaway nga ipadala sang Ginoo batok sa inyo. Pagagutomon kamo kag pagauhawon. Magaubauba kamo kag mawad-an sang inyo mga kinahanglanon. Ang Ginoo magapigos sa inyo sing tama tubtob malaglag kamo.

49Ang Ginoo magapadala batok sa inyo sang isa ka pungsod halin sa malayo, isa ka pungsod nga ang ila hambal indi ninyo mahangpan. Magasalakay sila sa inyo kaangay sang isa ka agila nga nagasurip.

50Magapamintas sila kag indi magkaluoy sa kay bisan sin-o, pamatan-on ukon tigulang.

51Pagakaunon nila ang inyo mga baka kag ang inyo mga patubas, kag mapatay kamo sa gutom. Indi kamo nila pagbilinan sing trigo, bino, lana sang olivo, mga baka ukon mga karnero kag mapatay kamo.

52Salakayon nila ang tagsa ka banwa sa duta nga ginahatag sa inyo sang Ginoo nga inyo Dios, kag ang mataas, mabakod nga mga pader nga inyo ginasaligan magakalatumba.

53“Kon ang inyo mga kaaway magakibon sa inyo mga banwa, magasalasala kamo sa pagpangita sang pagkaon sa bagay nga pagakaunon ninyo bisan ang inyo mga kabataan nga ginhatag sa inyo sang Ginoo nga inyo Dios.

54Bisan ang may tinun-an kag dungganon nga tawo magasalasala kon ang kaaway magkibon sang iya banwa, sa bagay nga iya pagakaunon ang isa sang iya mga kabataan tungod kay wala sia sing pagakaunon. Indi sia magpanghatag sa iya utod ukon sa asawa nga iya ginahigugma, ukon bisan sa isa sang iya mga kabataan nga nabilin.

56Bisan ang may tinun-an kag dungganon nga babayi nga tama ka manggaranon nga indi na sia kinahanglan maglakat bisan diin, magahimo sing amo man. Kon ang kaaway magkibon sang iya banwa, magasalasala sia sa pagpangita sang pagkaon sa bagay nga iya pagakaunon sing tago ang iya bata nga bag-o lang niya ginbun-ag, kag ang mga inunlan sini. Indi sia magpanghatag sa iya pinalangga nga bana ukon sa bisan isa sang iya mga kabataan.

58“Kon indi ninyo pagtumanon sing maayo ang tanan nga nasulat sa sini nga libro nga ginatudlo sang Dios, kag kon indi ninyo pagpasidunggan ang mahimayaon kag makahaladlok nga ngalan sang Ginoo nga inyo Dios,

59magapadala sia sa inyo kag sa inyo mga kaliwat sing mga masakit nga indi mag-ayo, kag makahaladlok nga mga pamalatian nga indi mag-untat.

60Magapadala sia sa inyo sa liwat sing makahaladlok nga mga balatian nga inyo natilawan sa Ehipto, kag indi kamo mag-ayo.

61Magapadala man sia sang tanan nga sahi sang mga masakit kag mga pamalatian nga wala masambit sa sini nga libro sang mga kasugoan kag mga pagsulondan sang Dios, tubtob nga malaglag kamo.

62Bisan nga nagdamo kamo subong sang mga kabituonan sa langit, pila lamang ang mabilin sa inyo nga buhi, tungod kay wala kamo magtuman sa Ginoo nga inyo Dios.

63Subong nga ang Ginoo nagkalipay sa pagpauswag kag pagpadamo sa inyo, magakalipay man sia sa pagpapas kag sa paglaglag sa inyo. Pahalinon kamo sa duta nga inyo madali na lang pagapanag-iyahan.

64“Ang Ginoo magapaaplaag sa inyo sa tanan nga mga kapungsoran sa bug-os nga kalibutan, kag didto magaalagad kamo sa mga dios nga nahimo sa kahoy kag bato, mga dios nga wala ninyo ginsimba kag sang inyo mga katigulangan.

65Indi kamo makaagom sing kalinong bisan diin kag wala sing lugar nga matawag ninyo nga inyo kaugalingon. Ang Ginoo magatublag sang inyo hunahuna, madulaan kamo sing paglaom, magaagom kamo sing tuman nga kalisdanan.

66Ang inyo kabuhi manginyara pirme sa katalagman. Sa adlaw kag gab-i mapun-an kamo sing kakugmat, kag pirme lang kamo ginakulbaan nga mapatay.

67Magakubakuba ang inyo nga mga dughan sa kahadlok sa tanan nga butang nga inyo makita. Sa tagsa ka aga magahandom kamo nga maggab-i na. Sa tagsa ka gab-i magahandom kamo nga mag-aga na.

68Ang Ginoo magapabalik sa inyo sa Ehipto sakay sa mga sakayan nga nakargahan sang mga ulipon, bisan nagsaad sia nga indi na gid kamo magbalik didto liwat. Didto ibaligya ninyo ang inyo kaugalingon sa inyo mga kaaway subong mga ulipon, pero wala sing isa nga maluyag magbakal sa inyo.”