Deuteronomy 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1“Ang mga pari nga kaliwat ni Levi indi paghatagan sing bahin sang duta sa Israel. Sila magakabuhi sa mga dulot kag sa iban nga mga halad nga ginahatag sa Ginoo.

2Indi sila magpanag-iya sang duta pareho sang iban nga mga tribo. Ang ila bahin amo ang prebilihiyo sang pagkapari suno sa ginsaad sang Ginoo.

3“Ang bisan sin-o nga maghalad sing baka ukon karnero, magahatag sa mga pari sang lumo, sang sag-ang kag sang kasudlan.

4Ihatag sa mga pari ang nahauna nga patubas sang trigo, bino, lana sang olivo kag delana.

5Sa tanan nga mga tribo, ang Ginoo nagpili sang tribo ni Levi sa pag-alagad sa iya subong mga pari sa walay katapusan.

6“Ang bisan sin-o nga Levita nga nagaestar bisan diin nga banwa sang Israel makakadto sa isa ka lugar nga ginasimbahan kon luyag niya,

7kag mag-alagad didto subong isa ka pari sang Ginoo nga iya Dios, pareho sang iban nga mga Levita nga nagaalagad didto.

8Hatagan sia sing amo man kadamo nga kalan-on nga ginahatag sa iban nga mga pari, luas sa ginapadala sang iya panimalay.

9“Kon mag-abot na kamo sa duta nga ginahatag sa inyo sang Ginoo nga inyo Dios, indi kamo magsunod sa makangilil-ad nga mga ginahimo sang mga kapungsoran nga yadto didto.

10Indi pag-ihalad ang inyo mga kabataan sa kalayo sa inyo mga altar, indi pagtugoti ang imo mga tawo sa paghimo sang madyik, sa pagpamakot, ukon sa pagpangbabaylan,

11ukon pagpangsalamangkero ukon sa pagpamangkot sa mga espiritu sang patay.

12Ang Ginoo nga inyo Dios nagadumot sa mga tawo nga nagahimo sining makangilil-ad nga mga butang, gani ginatabog niya ini nga mga kapungsoran pa gwa sa duta samtang nagapasulod kamo.

13Magmatutom gid kamo sa Ginoo.”

14Dayon si Moises nagsiling, “Sa duta nga madali na lang ninyo mapanag-iyahan, ang mga tawo nagasunod sa mga laygay sang mga madyikero, ukon manugpakot, pero ang Ginoo nga inyo Dios indi magtugot sa inyo nga maghimo sini.

15Sa baylo, magapadala sia sa inyo sang isa ka propeta kaangay sa akon gikan sa inyo kaugalingon nga mga tawo, kag tumanon ninyo sia.

16“Sang adlaw nga nagtipon kamo sa Bukid sang Sinai, nagpakitluoy kamo nga indi na makabati liwat sa tingog sang Ginoo, ukon makakita sang iya nagadabdab nga presensya, tungod kay kon mahanabo ini mapatay kamo.

17Gani ang Ginoo nagsiling sa akon, ‘Maayo ang ila pangabay.

18Padalhan ko sila sing isa ka propeta pareho sa imo halin sa ila kaugalingon nga mga tawo. Singganon ko sia kon ano ang iya ihambal, kag sugiran niya ang mga tawo sang tanan nga akon ginasugo.

19Kon ang isa ka propeta maghambal sa akon ngalan, silutan ko ang bisan sin-o nga indi magtuman sa iya.

20Pero ang bisan sin-o nga propeta nga magpangahas sa paghambal sang mensahe sa akon ngalan nga wala ko ginsugo, dapat sia mapatay, kay amo man ini ang dapat himuon sa bisan sin-o nga propeta nga nagahambal sa ngalan sang iban nga mga dios.’

21“Ayhan mamangkot kamo kon paano ang inyo pagkahibalo nga ang ginahambal sang propeta wala naghalin sa Ginoo.

22Kon ang propeta maghambal sa ngalan sang Ginoo kag kon ang ginasiling niya wala nagakatuman, ini nga mensahe indi iya sang Ginoo. Ang ginahambal sina nga propeta iya lang kaugalingon kag indi kamo magkahadlok sa iya.

← Chapter 17 Jump to: Chapter 19 →