Deuteronomy 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1“Abi, kon ang isa ka lalaki makapangasawa, pero sang ulihi wala niya maluyagi ang babayi tungod kay may nasapwan sia nga makahuloya nga butang sa iya, hatagan niya sia sing papeles sang pagbulagay, kag sa tapos sini pahalinon sia sa iya balay.

2Kon abi sa tapos sia makahalin sa balay sang sini nga lalaki kag mangin-asawa sia sang isa pa gid ka lalaki,

3kag ang ikaduha nga bana maglas-ay sa iya kag maghatag man sing papeles sa pagbulagay kag pahalinon sia sa iya balay, ukon mapatay man sia sa tapos mapangasawa niya sia,

4dayon ang iya nahauna nga bana nga nagbulag sa iya, indi makapangasawa sa iya liwat sa tapos nga mangindi-matinlo sia para sa iya. Kangil-aran ini para sa Ginoo, indi ka magdala sing sala sa duta nga ginahatag sang Ginoo nga imo Dios subong imo palanublion.

5“Kon ang isa ka tawo bag-o lang makasal, indi sia pagpaentrahon sa pagkasoldado ukon sa bisan ano nga palangakuan sa pangulohan. Indi sia pagpaalagaron sa sulod sang isa ka tuig, agod nga makapabilin sia sa iya balay sa paglipay sang iya asawa.

6“Kon magpahulam kamo sa isa ka tawo sing bisan ano, indi ninyo pagkuhaon ang iya galingan subong nga prenda, kay makuhaan ninyo sia sing pangabuhian.

7“Ang bisan sin-o nga magkidnap sang iya kapareho nga Israelinhon kag maghimo sa iya nga ulipon, ukon magbaligya sa iya subong nga ulipon, pagapatyon sia. Sa sini nga paagi makuha ninyo ini nga kalautan sa tunga ninyo.

8“Kon magaantos kamo sa makalalaton nga balatian sa panit, tumana gid ang ginasiling sang mga pari nga Levinhon. Sunda ang mga pagsulondan nga akon ginhatag sa ila.

9Dumdoma ang ginhimo sang Ginoo nga inyo Dios kay Miriam sang kita nagapagwa sa Ehipto.

10“Kon nagapahulam ka sa isa ka tawo sing bisan ano, indi ka magsulod sa iya balay sa pagkuha sang iya bayu nga iya ginprenda sa imo.

11Pabilin ka sa gwa, kag sia ang magadala sini sa imo.

12Kon sia isa ka imol nga tawo, indi ini pagtagoa tubtob sa gab-i.

13Iuli ini sa iya sa tagsa ka pagtunod sang adlaw, agod masuksok niya ini sa iya pagtulog. Dayon magapasalamat sia, kag ang Ginoo nga imo Dios malipay sa imo.

14“Indi pagdayai ang imol kag ang makaluluoy nga ulipon, Israelinhon man sia ukon dumoluong nga nagaestar sa isa sang inyo mga banwa.

15Sa tagsa ka adlaw sa wala pa magtunod ang adlaw, bayari sia sang iya inubrahan, kay nagakinahanglan sia sang kwarta kag ginapaabot niya nga mabaton ini. Kon indi mo sia pagsuholan, magasumbong sia sa Ginoo batok sa imo kag pagakondenahon ka.

16“Ang mga ginikanan indi pagpatyon tungod sang sala sang ila mga kabataan, kag ang mga kabataan indi pagpatyon tungod sang sala sang ila mga ginikanan. Ang tawo pagapatyon lang tungod sang sala nga iya ginhimo.

17“Indi pagdaugdaoga ang mga dumoluong kag mga ilo, kag indi pagkuhaa ang bayu sang isa ka balo subong prenda.

18Dumdoma nga mga ulipon kamo anay sa Ehipto kag ginhilway kamo sang Ginoo nga inyo Dios. Gani ginahatag ko sa inyo ini nga sugo.

19“Kon magtipon kamo sang inyo mga patubas kag malipatan ninyo ang pagdala sang iban nga inupong, indi kamo magbalik sa pagkuha sini. Ibilin ini para sa mga dumoluong, mga ilo, kag mga balo, agod ang Ginoo nga imo Dios magabendisyon sa imo sa tanan mo nga ginahimo.

20Sa tapos kamo makapang-ipo sang inyo mga olivo sing makaisa, indi kamo magbalik sa pagsigpot sing nabilin. Ini para sa mga dumoluong, mga ilo, kag mga balo.

21Sa tapos kamo makapang-ipo sing makaisa sang inyo mga ubas, indi kamo magbalik sa pagpang-ipo sang nabilin. Ini para sa mga dumoluong, mga ilo, kag mga balo.

22Indi gid kamo magkalipat nga kamo anay mga ulipon sa Ehipto. Gani ginahatag ko sa inyo ini nga sugo.

← Chapter 23 Jump to: Chapter 25 →