Deuteronomy 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1“Magmatutom kamo sa pagtuman sang tanan nga mga kasugoan nga ginhatag ko sa inyo sini nga adlaw, agod nga magkabuhi kamo, magdamo, kag magapanag-iya sang duta nga ginsaad sang Ginoo sa inyo mga katigulangan.

2Dumdoma ninyo kon daw ano ang pagtuytoy sang Ginoo nga inyo Dios sa inyo malawig nga pagpanglakaton sa desierto sa sulod sang nagligad nga kwarenta ka tuig. Ginpadalhan niya kamo sing mga kabudlayan sa pagtilaw sa inyo, agod iya mahibaluan kon ano ang yara sa inyo tagipusoon kag kon inyo tumanon ang iya mga sugo.

3Ginpagutoman niya kamo, dayon ginhatagan niya kamo sing mana nga kaunon, isa ka sahi sang kalan-on nga wala pa gid ninyo matilawi kag sang inyo mga katigulangan halin sang una. Ginhimo niya ini sa pagtudlo sa inyo nga indi lamang sa pagkaon mabuhi ang tawo kundi nagakinahanglan man sia sang pulong sang Dios.

4Ang inyo mga bayu wala maggabok kag ang inyo mga tiil wala magbanog sa sulod sang kwarenta ka tuig.

5Dumdoma nga ang Ginoo nga inyo Dios nagasaway kag nagasilot sa inyo kaangay sang pagdisiplina sang isa ka amay sa iya mga kabataan.

6Gani tumana ang ginasugo sang Ginoo sa inyo: magkabuhi kamo suno sa iya mga kasugoan, kag tahura ninyo sia.

7Ang Ginoo nga inyo Dios nagadala sa inyo sa isa ka maayo nga duta—isa ka duta nga may mga suba kag mga sapa, kag mga tuboran nga nagaibwal pakadto sa kapatagan kag mga kabakuloran;

8isa ka duta nga nagapatubas sang trigo kag sebada, ubas, higos, granada, olivo kag dugos.

9Didto indi kamo paggutomon ukon mawad-an sang bisan ano. Ang iya sini mga bato may mga salsalon, kag sarang kamo makamina sing saway halin sa iya kabakuloran.

10Yara ang tanan nga luyag ninyo kaunon, kag magapasalamat kamo sa Ginoo nga inyo Dios tungod sang maayo nga duta nga iya ginhatag sa inyo.

11“Mag-andam kamo nga indi magkalimot sa Ginoo nga inyo Dios, kag tumana ninyo ang tanan niya nga mga kasugoan nga akon ginhatag sa inyo sini nga adlaw.

12Kon bugana ang inyo kalan-on, kag nakapatindog na kamo sing maayo nga mga balay nga inyo pagaestaran,

13kag kon magdamo ang inyo mga kabakahan kag mga karnero, ang inyo mga pilak kag mga bulawan, kag ang tanan ninyo nga mga pagkabutang,

14mag-andam kamo nga indi kamo magpabugal kag magkalimot sa Ginoo nga inyo Dios nga nagpagwa sa inyo halin sa Ehipto sa diin gin-ulipon kamo.

15Gintuytoyan niya kamo sa malapad kag makahaladlok nga desierto nga may dalitan nga mga man-og kag mga iwiiwi. Sa sadtong mamala kag kigas nga duta ginpailig niya para sa inyo ang tubig halin sa igang.

16Didto sa desierto ginhatagan niya kamo sing mana nga kaunon, isa ka sahi sang kalan-on nga wala gid matilawi sang inyo mga katigulangan. Nagpadala sia sing mga kabudlayan sa pagtilaw sa inyo, agod nga sa ulihi hatagan niya kamo sing maayo nga mga butang.

17Gani, indi kamo magpanghunahuna nga nagmanggaranon kamo paagi sa inyo kaugalingon nga gahom kag kusog.

18Dumdoma ninyo nga ang Ginoo nga inyo Dios amo ang naghatag sa inyo sing gahom nga magmanggaranon. Ginhimo niya ini tungod kay matutom sia gihapon sa pagtuman sang kasugtanan nga ginhimo niya sa inyo mga katigulangan, tubtob karon.

19Indi kamo magkalimot sa Ginoo nga inyo Dios kag magsimba kag mag-alagad sa iban nga mga dios. Kon himuon ninyo ini, nagapaandam ako sa inyo sini nga adlaw nga pat-od gid nga malaglag kamo.

20Kon indi kamo magtuman sa Ginoo, pagalaglagon kamo kaangay sadtong mga pungsod nga iya pagalaglagon samtang kamo nagapasulod sa duta.

← Chapter 7 Jump to: Chapter 9 →