Deuteronomy 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1“Abi, kon may duha ka Israelinhon nga mag-asuntohanay sa hukmanan kag ang isa nahukman nga wala sing sala kag ang isa may sala,

2kon ang may sala pagahukman nga pagahanuton, pahapaon sia sang hukom kag ipahanot. Ang kadamuon sang hanot nga iya pagabatunon depende sa sala nga iya nahimo.

3Sarang sia mahanot sing kwarenta ka mga lapdos, pero indi na pagpasobrahan kay ini magapakahuya sa iya sa atubang sang mga tawo.

4“Indi pagbusali ang baka kon ginagamit ini sa paglinas sang trigo.

5“Kon ang duha ka mag-utod nga lalaki nagaestar sa isa ka balay kag ang isa sa ila mapatay nga wala sing anak nga lalaki, dayon ang nabalo indi magpamana sang iban luas sa pamilya sang napatay. Katungdanan ini sang utod nga lalaki sang napatay sa pagpangasawa sa iya.

6Ang panganay nga lalaki nga iya nabata pagakabigon nga iya bata sang napatay nga utod nga lalaki, agod ang iya panimalay magapadayon sa Israel.

7Pero kon ang utod nga lalaki sang napatay wala luyag magpangasawa sa iya, ang balo sang iya utod magakadto sa mga pangulo sang banwa kag magasiling, ‘Ang utod nga lalaki sang akon bana indi magtuman sang iya katungdanan. Indi sia magpadayon sang linahi sang iya utod sa Israel.’

8Dayon ang mga pangulo sang banwa magapatawag sa iya kag magapakighambal sa iya. Kon indi pa gid sia magpangasawa sa iya,

9ang balo sang iya utod nga lalaki magapalapit sa iya sa atubang sang mga pangulo sang banwa, ubahon sang balo ang isa sang mga sandalyas sang iya bayaw, duplaan sia sa guya kag magsiling, ‘Amo ini ang pagahimuon sa tawo nga indi magpadayon sang linahi sang iya utod.’

10Sa Israel ang iya panimalay pagatawgon ‘nga panimalay sang tawo nga gin-ubahan sing sandalyas.’

11“Kon ang duha ka tawo nagaaway kag ang asawa sang isa magbulig sa iya bana paagi sa pagbutong sang kinatawo sang kaaway sang iya bana,

12utda ang kamot sining babayi nga wala sing luoyluoy.

13“Indi kamo magdaya kon kamo maggamit sang mga timbangan ukon sang mga sulokban.

15Gamita ang husto kag nagakaigo nga timbangan kag sulokban, agod magkabuhi kamo sing malawig sa duta nga ginahatag sa inyo sang Ginoo nga inyo Dios.

16Ang Ginoo nagakaakig sa mga tawo nga nagadaya.

17“Dumdoma kon ano ang ginhimo sang mga Amaleknon sa inyo sang paggwa ninyo sa Ehipto.

18Wala sila nagkahadlok sa Dios, gani ginlipot nila kamo sang nakapoy kamo kag nalapyo, kag ginpamatay nila ang mga naulihi.

19Gani, kon ang Ginoo nga inyo Dios maghatag sa inyo sang duta kag wala na kamo sing katalagman sa tanan ninyo nga kaaway nga nagaestar sa palibot ninyo, indi gid kamo magkalipat sa pagpamatay sa mga Amaleknon, agod wala na sing may makadumdom sa ila. Indi ini pagkalimti!

← Chapter 24 Jump to: Chapter 26 →