Deuteronomy 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1“Kon makita ninyo ang baka ukon karnero nga nakabuhi nga iya sang inyo kapareho nga Israelinhon, indi pagpabay-i ini, kundi dalha ini pabalik sa iya.

2Pero kon malayo ang ginaestaran sang tag-iya sini ukon wala kamo makahibalo kon sin-o ang tag-iya, dalha ini pauli sa inyo. Kon pangitaon ini sang tag-iya, iuli ini sa iya.

3Amo man ang inyo himuon kon makakita kamo sing asno, bayu, ukon bisan ano nga butang nga nadula sang inyo kapareho nga Israelinhon.

4“Kon ang asno ukon baka sang inyo kapareho nga Israelinhon naglup-og sa dalan, indi ini pagpabay-i, kundi buligi sia nga nagatinguha sa pagpatindog sini liwat.

5“Ang mga babayi indi magbayu sang bayu sang mga lalaki, kag ang mga lalaki indi magbayu sang bayu sang mga babayi, kay ang Ginoo nga inyo Dios nagakaakig sa mga tawo nga nagahimo sini nga mga butang.

6“Kon makita ninyo ang isa ka pugad sa kahoy ukon sa duta nga ang inang nagaluob sa mga itlog ukon sa mga buto sini, indi ninyo pagdakpon ang inang.

7Sarang ninyo makuha ang iya mga buto, pero kinahanglan buy-an ninyo ang inang, agod magkabuhi kamo sing malawig kag mainuswagon.

8“Kon magpatindog kamo sing balay, indi kamo magkalipat sa pagbutang sing barandilya sa atop sini. Dayon wala kamo sing salabton kon may mahulog kag mapatay gikan sa atop sang inyo balay.

9“Indi kamo magtanom sang iban nga tanom sa inyo talamnan sang ubas. Kon himuon ninyo ini, madula ang inyo kinamatarong sa pagpulos sang ubas ukon sang patubas sang tanom nga upod sa ubas.

10“Indi ninyo pag-ipares ang baka kag asno sa pag-arado.

11“Indi kamo magsuksok sang bayu nga nahabol sa delana kag lino nga manipis.

12“Butangan ninyo sing lasulaso ang apat ka mga pamusod sang inyo mga bayu nga inyo ginasuksok.

13“Abi, kon may isa ka tawo nga magpangasawa sing isa ka dalaga, kag sa tapos sia makipaghirop sa iya, linas-ayan sia sa iya,

14gani ginabutangbutangan niya sia nga indi na sia birhen sang pagpangasawa niya sa iya.

15“Kon ini matabo, ang mga ginikanan sang babayi magakuha sing hapin nga namansahan sa higdaan sang gab-i sang ila kasal kag dalhon ini sa korte kag ipakita sa mga pangulo sang banwa sa pagpamatuod nga ang babayi birhen.

16Ang amay sang babayi magasiling sa ila, ‘Ginpaasawa ko ang akon bata nga babayi sa sini nga tawo kag karon wala na sia sing luyag sa iya.

17Ginbutangbutangan niya sia nga nagasiling nga sia indi na birhen sang pagpangasawa niya sa iya. Pero yari ang pagpamatuod nga ang akon anak nga babayi isa ka birhen. Tan-awa ang hapin nga namansahan sang dugo sa higdaan sang gab-i nga ginkasal sila!’

18Dayon ang mga pangulo sang banwa magadakop sang bana kag hanuton nila sia.

19Multahan man nila sia sing 100 ka bilog nga pilak kag ihatag ang kwarta sa amay sang babayi tungod kay iya ginpakahuy-an ang isa ka Israelinhon nga babayi. Kag magapadayon ang ila pag-asawahay kag indi sia makabulag sa babayi samtang nagakabuhi sia.

20“Pero kon ang panumbongon matuod, kag indi mapamatud-an nga ang babayi birhen,

21dayon dalhon nila sia sa atubangan sang balay sang iya amay, sa diin ang iya mga kasimanwa nga lalaki magabato sa iya tubtob mapatay. Naghimo sia sang isa ka makahuloya nga butang sa aton mga pumoluyo paagi sa pagpakighilawas samtang wala pa sia makasal sang yara pa sia sa balay sang iya amay. Sa sini nga paagi makuha ninyo ini nga kalautan.

22“Kon may isa ka tawo nga madakpan nga nagapakighilawas sa isa ka babayi nga may bana, sila nga duha pagapatyon. Sa sini nga paagi makuha ini nga kalautan.

23“Abi, kon ang isa ka tawo madakpan sa banwa nga nagapakighilawas sa isa ka babayi nga kalasalon,

24sila nga duha dalhon sa gwa sang banwa kag batuhon tubtob mapatay. Ang babayi pagapatyon tungod kay wala sia magsinggit sa pagpangayo sang tabang, bisan yara sia sa banwa sa diin may makabati sa iya. Kag ang lalaki pagapatyon tungod kay nagpakighilawas sia sa babayi nga kalasalon sa iya kapareho nga Israelinhon. Sa sini nga paagi makuha ini nga kalautan.

25“Abi, kon ang isa ka tawo makasugata sa uma sang isa ka babayi nga kalasalon kag ginlugos niya sia, dayon ang lalaki lang ang pagapatyon,

26kag indi pagsilutan ang babayi tungod kay wala sia makahimo sang sala nga takos sang kamatayon. Ini nga kaso pareho sang isa ka tawo nga nagbangga sang tawo kag ginpatay niya sia.

27Ang tawo naglugos sa babayi nga kalasalon didto sa uma, kag bisan nagsinggit sia sa pagpangayo sing tabang, wala sing may nagbulig sa iya.

28“Abi, kon ang isa ka tawo madakpan nga nagalugos sa isa ka babayi nga wala sing nobyo,

29dapat sia magbayad sa amay sang babayi sang singkwenta ka bilog nga pilak kag ang babayi mangin-iya asawa, tungod kay ginpilit niya sia sa pagpakighilawas sa iya. Indi niya sia mabulagan tubtob buhi sia.

30“Wala sing tawo nga magpakahuya sa iya amay paagi sa pagpakighilawas sa bisan sin-o nga asawa sang iya amay.

← Chapter 21 Jump to: Chapter 23 →