Deuteronomy 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1“Kon may isa ka tawo nga ginpatay nga nakita sa talamnan sa duta nga ihatag sa inyo sang Ginoo nga inyo Dios, kag wala kamo makahibalo kon sin-o ang mga nagpatay sa iya,

2ang inyo mga pangulo kag mga hukom maggwa kag magtakos kon ano ang kalayuon halin sa lugar nga napatyan pakadto sa tagsa ka malapit nga mga banwa.

3Dayon ang mga pangulo sang banwa nga pinakamalapit sa lugar sa diin makita ang bangkay magpili sang tinday nga baka nga wala pa gid matakdi sang gota.

4Ila ini dalhon sa lugar nga malapit ang sapa nga wala gid mahubsi, kag ang duta wala pa gid maarado ukon matamni, kag didto lunggoon nila ang iya liog.

5Ang mga pari nga Levinhon magkadto man didto, tungod kay sila ang magahukom sang tagsa ka kaso sang sinuay kag inaway. Ang Ginoo nga inyo Dios nagpili sa ila sa pag-alagad sa iya kag sa paghatag sang mga bendisyon sa iya ngalan.

6Dayon ang tanan nga mga pangulo halin sa mga banwa nga malapit sa lugar sa diin nakit-an ang bangkay maghugas sang ila mga kamot sa ibabaw sang baka,

7kag magsiling, ‘Wala kami magpatay sang tawo kag wala man kami makahibalo kon sin-o ang naghimo sini.

8Ginoo, patawara ang imo mga tawo nga Israelinhon, nga imo ginluwas sa Ehipto. Patawara kami, kag indi kami pagpabangdi sa pagpatay sang tawo nga wala sing sala.’

9Gani, paagi sa paghimo sang matarong nga ginapangayo sang Ginoo, indi kamo manabat tungod sang pagpatay.

10“Kon ang Ginoo nga inyo Dios magpadaog sa inyo sa inaway kag may mga bihag kamo,

11ayhan ang isa sa inyo makakita sa tunga nila sang isa ka matahom nga babayi kag luyag niya pangasaw-on,

12dalha sia sa inyo balay sa diin kiskisan niya ang iya ulo, utdan ang iya mga kuko,

13kag islan niya ang bayu nga iya ginasuksok sang sia ginbihag. Magpabilin sia sa imo balay kag magalalaw sia para sa iya mga ginikanan sa sulod sang isa ka bulan. Pagkatapos sina, sarang mo sia mapangasawa.

14Sa ulihi kon indi na ikaw sa iya, sarang mo sia mapalakat sa bisan diin nga luyag niya. Indi mo sia makabig nga isa ka ulipon kag ibaligya kay ginpilit mo sia sa pagpakighirop sa imo.

15“Abi kon ang isa ka tawo may duha ka asawa kag ang tagsa sa ila may anak nga lalaki sa iya, pero ang nahauna nga anak amo ang anak sang iya asawa nga indi pinasulabi.

16Kon magpamat-od sia sa pagpamartida sang iya mga pagkabutang sa iya mga kabataan indi sia magpakita nga ginapasulabi niya ang anak nga lalaki sang iya pinalangga nga asawa paagi sa paghatag sa iya sang bahin sang nahauna nga anak nga lalaki.

17Hatagan niya sing duha ka parti sang iya mga pagkabutang ang nahauna niya nga anak nga lalaki, bisan indi sia anak sang pinalangga niya nga asawa. Ang tawo dapat magkilala sang iya nahauna nga anak nga lalaki kag hatagan niya sia sang bahin nga naigo sa iya.

18“Abi, kon ang isa ka tawo may anak nga lalaki nga matig-a sing ulo kag mabinatuon, nga indi magtuman sa iya mga ginikanan bisan nga silutan nila sia,

19ang iya mga ginikanan magdala sa iya sa atubang sang mga pangulo sang banwa sa diin sia nagaestar, kag hukman nila sia.

20Magasiling sila sa ila, ‘Ang amon anak nga lalaki matig-a sing ulo kag mabinatuon kag wala nagatuman sa amon; palahubog sia kag gastador.’

21Dayon ang mga pumoluyo sang siudad magabato sa iya tubtob mapatay, kag ini nga kalautan makuha sa Israel. Ang tagsatagsa sa Israel nga makabati sini nga hitabo magakahadlok.

22“Kon may isa ka tawo nga ginpatay tungod sang iya sala, kag ang iya bangkay nagakabit pa sa kahoy,

23indi ini pag-ibilin didto sa sulod sang isa ka gab-i. Kinahanglan ilubong ini sa amo nga adlaw, tungod kay ang bangkay nga ginbitay sa kahoy nagadala sang pagpakamalaut sang Dios sa duta. Ilubong ang bangkay agod indi madagtaan ang duta nga ginhatag sa inyo sang Ginoo nga inyo Dios.

← Chapter 20 Jump to: Chapter 22 →