Exodus 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Dayon ang Ginoo nagsiling kay Moises, “Hatagan ko sing isa na lang ka silot ang hari sang Ehipto kag ang iya katawhan. Tapos sina, palakton na niya kamo. Sa pagkamatuod, pagatabugon niya kamo tanan pa gwa.

2Karon hambala ang mga Israelinhon, kag singgana ang tagsa ka lalaki kag babayi sa pagpangayo sa iya kasilingan sing alahas nga pilak kag bulawan.”

3Ginhimo sang Ginoo nga ang mga Ehiptohanon magtahod sa mga Israelinhon. Matuod gid nga ang mga opisyales kag ang mga tawo nagkilala kay Moises nga isa ka gamhanan nga tawo.

4Dayon si Moises nagsiling sa hari, “Amo ini ang ginasiling sang Ginoo, ‘Sa mga tungang gab-i kadtuan ko ang mga Ehiptohanon,

5kag ang tanan nga mga panganay nga lalaki sa Ehipto mapatay, halin sa panganay nga lalaki sang hari nga amo ang manunubli sang trono, tubtob sa panganay nga lalaki sang ulipon nga babayi nga nagagaling sing mais. Ang tanan nga mga panganay sang kahayupan mapatay man.

6May tudo nga paghinibi sa bug-os nga duta sang Ehipto nga wala pa gid matabo halin sang una, ukon mahanabo pa liwat.

7Pero sa mga Israelinhon bisan pa ang ido indi magtaghol sa ila ukon sa ila mga kahayupan, agod imo mahibaluan nga ako, ang Ginoo nagbutang sing kinatuhay sa mga Ehiptohanon kag sa mga Israelinhon.’”

8Sa hingapusan naghambal si Moises, “Ang tanan mo nga mga opisyales magapalapit sa akon kag magaluhod sa akon atubang nga nagasiling, ‘Lakat ka, ikaw kag ang tanan mo nga mga tawo!’ Sa tapos sina, malakat ako.” Dayon si Moises sa sobra nga kaakig iya ginbayaan ang hari.

9Ang Ginoo nagsiling kay Moises, “Indi magpamati ang hari sa imo, agod makahimo ako sing madamo pa nga mga milagro sa duta sang Ehipto.”

10Ginhimo ni Moises kag ni Aaron ini tanan nga mga milagro sa atubang sang hari, pero ang Ginoo nagpatig-a sang tagipusoon sang hari, kag wala niya pagtugoti ang mga Israelinhon sa paghalin sa iya pungsod.

← Chapter 10 Jump to: Chapter 12 →