Exodus 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Si Jetro nga pari sang Midian, nga ugangan nga lalaki ni Moises, nakabati sang tanan nga ginhimo sang Dios tungod kay Moises kag sa mga Israelinhon nga iya mga tawo, kag kon paano ang pagpagwa sang Ginoo sa ila sa Ehipto.

2Gani gindala niya si Sipora, ang asawa ni Moises, nga ginpapauli anay ni Moises.

3Gindala man ni Jetro si Gersom kag si Eliezer, ang duha ka mga anak nga lalaki ni Sipora. Si Moises nagsiling, “Nangindumoluong ako sa iban nga duta,” gani ginhingalanan niya ang isa niya ka anak kay Gersom.

4Nagsiling man sia, “Ang Dios sang akon amay amo ang akon kabulig kag nagluwas sa akon sa espada sang hari sang Ehipto,” gani ginhingalanan niya ang isa niya ka anak kay Eliezer.

5Nagkadto si Jetro sa desierto upod sa asawa ni Moises kag sang duha niya ka mga anak, diin si Moises nagpatindog sing tolda malapit sa balaan nga bukid.

6Ginpatundaan niya si Moises nga nagasiling, “Ako, ang imo ugangan nga si Jetro, nagapakadto dira upod sa imo asawa kag sang iya duha ka mga anak nga lalaki.”

7Naggwa si Moises sa pagsugata sa iya, nagluhod sa atubang niya, kag naghalok sa iya. Nagpamangkutanay sila sang ila kahimtangan kag nagsulod sa tolda ni Moises.

8Ginsugiran ni Moises si Jetro sang tanan nga ginhimo sang Ginoo sa hari kag sa mga Ehiptohanon agod sa pagluwas sang mga Israelinhon. Ginsugiran man niya sia sang mga kabudlayan sa ila dalanon, kag kon paano ang pagluwas sang Ginoo sa ila.

9Nalipay gid si Jetro tungod sang tanan nga kaayo nga ginhimo sang Ginoo sa mga Israelinhon kag tungod sini ginluwas niya sila sa mga Ehiptohanon.

10Nagsiling sia, “Dalayawon ang Ginoo nga nagluwas sa inyo sa mga Ehiptohanon kag sa hari! Dalayawon ang Ginoo nga nagluwas sang iya mga tawo gikan sa pag-ulipon sang mga Ehiptohanon!

11Karon akon nahibaluan nga ang Ginoo mas gamhanan pa sang sa tanan nga mga dios, tungod kay ginhimo niya ini sa mga Ehiptohanon sang ila indi makatarungan nga buhat sa mga Israelinhon.”

12Dayon nagdala si Jetro sang mga halad sa Dios kag sang dulot nga pagasunogon. Si Aaron kag ang tanan nga mga pangulo sang Israel nag-abot sa pagkaon sing balaan nga kalan-on upod sa ugangan ni Moises sa atubang sang Dios.

13Sa madason nga adlaw, si Moises nagpungko sa paghusay sang mga kinagamo sang mga tawo, kag wala nagakahubas ang mga tawo sa iya atubang halin sa aga tubtob sa gab-i.

14Sang makita ni Jetro nga ugangan ni Moises ang iya tanan nga ginahimo nagpamangkot sia, “Ano bala ining imo ginahimo sa mga tawo? Ngaa ikaw lang ang nagahukom, samtang ang mga tawo wala nagakahubas sa atubang mo halin sa aga tubtob sa gab-i?”

15Nagsabat si Moises, “Kinahanglan nga himuon ko ini, tungod kay ang mga tawo nagapalapit sa akon sa paghibalo sang kabubot-on sang Dios.

16Kon may duha ka tawo nga nagabangig, nagakadto sila sa akon, kag ako ang nagapamat-od kon sin-o ang matarong sa ila, kag ginasugiran ko sila sang mga sugo kag kasugoan sang Dios.”

17Dayon si Jetro nagsiling sa iya, “Indi husto ang imo ginahimo.

18Makakalapoy ini para sa imo kag subong man sa mga tawo. Tama ini ka budlay para sa imo kag indi mo ini mahimo nga ikaw lang.

19Karon pamatii ako, yari ang maayo nga himuon mo, kag ang Dios magaupod sa imo. Ikaw ang magatiglawas sa mga tawo sa atubang sang Dios, kag ikaw ang magadala sang ila mga kasuayon sa iya.

20Ikaw ang dapat magtudlo sa ila sang mga sugo sang Dios kag magsaysay kon paano sila magkabuhi kag kon ano ang ila dapat himuon.

21Pero dugang pa sini, dapat magpili ka sing pila ka mga tawo nga makasarang, kag himua sila subong mga pangulo sang mga tawo: mga pangulo sang tag-1,000, tag-100, tag-singkwenta, kag tag-napulo. Kinahanglan mga tawo sila nga mahinadlukon sa Dios kag masaligan, kag indi mahamhaman.

22Dapat sila mag-alagad subong permanente nga mga hukom para sa mga tawo. Sarang nila madala ang tagsa ka dalagku nga mga kaso sa imo, pero ang magamay nga mga kaso sila na lang ang maghusay. Ini manginmahapos para sa imo, samtang nagabulig sila sa imo.

23Kon himuon mo ini subong sang ginasugo sang Dios sa imo, indi ka pagkapuyon, kag ini nga mga tawo makapauli nga nahusayan ang ila mga kinagamo.”

24Nagpamati si Moises kay Jetro kag gintuman ang iya ginsiling.

25Nagpili sia sing mga tawo nga makasarang gikan sa mga Israelinhon, kag ginhimo sila nga mga pangulo sa mga tawo: mga pangulo sang tag-1,000, tag-100, tag-singkwenta kag tag-napulo.

26Nag-alagad sila subong permanente nga mga hukom para sa mga tawo. Ang mga mabudlay nga mga kaso ginadala nila kay Moises, pero ang mga magamay nga mga kaso sila na lang ang nagahusay.

27Dayon nagpaalam si Moises kay Jetro, kag nagpauli si Jetro sa iya kaugalingon nga duta.

← Chapter 17 Jump to: Chapter 19 →