Exodus 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1“Amo ini ang dapat mo himuon kay Aaron kag sa iya mga anak nga lalaki sa paghalad sa ila sa pag-alagad sa akon subong mga pari. Magkuha ka sing isa ka torite nga baka kag duha ka mga karnero nga lalaki nga wala sing bisan ano nga depekto.

2Magkuha ka man sing tinapay nga wala sing lebadora, kag mga tinapay nga wala sing lebadora nga nasamuan sing lana nga olivo, kag pinanid nga tinapay nga wala sing lebadora nga nahibuan sing lana. Himuon mo ini halin sa mapino nga harina sang trigo.

3Isulod mo ini sa basket kag idulot mo ini sa akon kon ikaw maghalad sing torite nga baka kag duha ka mga karnero nga lalaki.

4“Dalhon mo si Aaron kag ang iya mga anak nga lalaki sa pwertahan sang Tolda sang akon presensya, kag papaligoa sila.

5Dayon kuhaon mo ang mga panapton nga iya sang pari kag ipasuksok kay Aaron ang bayu kag ang sutana nga nagalabaw sa bestidora, ang bestidora, ang hapin sa dughan, kag ang wagkos.

6Ibutang mo ang turban sa iya ulo, kag ihigot mo ang balaan nga tanda sang paghalad sa turban nga nasinsilan, ‘Nahalad sa Ginoo.’

7Dayon magkuha ka sing lana nga inughaplas kag ibubo mo sa ulo ni Aaron kag haplason mo sia.

8“Dalhon mo man ang iya mga anak nga lalaki, kag pabayuan mo sila.

9Butangan mo sing mga wagkos ang ila mga hawak, kag ihigot mo ang mga gora sa ila mga ulo. Manginpari sila sa walay katapusan suno sa akon sugo. Amo ini ang pag-orden mo kay Aaron kag sa iya mga anak nga lalaki.

10“Dalha ang torite nga baka sa atubangan sang Tolda sang akon presensya. Si Aaron kag ang iya mga anak nga lalaki magatungtong sang ila mga kamot sa ulo sini.

11Ihawa ang torite nga baka didto sa akon balaan nga presensya sa pwertahan sang Tolda.

12Kuha ka sang dugo sang torite nga baka kag ihamlit mo ini sang imo tudlo sa mga sungaysungay sang altar. Dayon ang nabilin nga dugo iula mo sa sadsaran sang altar.

13Dayon, kuhaon mo ang tanan nga mga sapay nga nagaputos sang kasudlan, kag ang labing maayo nga bahin sang atay, kag ang duha ka mga batubato nga may sapay. Sunogon mo ini sa altar subong halad sa akon.

14Pero ang unod sang torite nga baka, ang panit sini, kag ang mga kasudlan sini sunogon mo sa gwa sang kampo. Isa ini ka halad sa pagkuha sang mga sala sang mga pari.

15“Kuhaa ang isa sang mga karnero nga lalaki. Si Aaron kag ang iya mga anak nga lalaki magatungtong sang ila mga kamot sa ulo sini.

16Ihawon mo ini, kuhaon mo ang dugo, kag ibasya mo ini sa apat ka mga kilid sang altar.

17Lasaon mo ang karnero, hugasan ang mga kasudlan kag ang mga tiil sini, kag sampawon mo ang mga ini sa ibabaw sang ulo.

18Sunogon mo ang bug-os nga karnero subong nga halad sa altar. Isa ini ka halad nga sinunog nga ang iya kahamot akon nahamut-an.

19“Kuhaa ang isa pa gid ka karnero nga lalaki para sa paghalad. Si Aaron kag ang iya mga anak nga lalaki magatungtong sang ila mga kamot sa ulo sini.

20Ihawa ini, kag kuha ka sang dugo sini, kag ihamlit mo sa mga labitlabit sang tuo nga dulonggan ni Aaron kag sang iya mga anak nga lalaki, kag sa mga kumalagko sang ila tuo nga mga kamot, kag sa mga kumalagko sang ila tuo nga mga tiil. Ibasya ang nabilin nga dugo sa tanan nga kilid sang altar.

21Kuha ka sing dugo nga yara sa altar kag sing lana nga inughaplas, kag iwisik mo ini kay Aaron kag sa iya mga bayu, kag sa iya mga anak nga lalaki kag sa ila man mga bayu. Sia, ang iya mga anak nga lalaki, kag ang ila mga bayu pagaihalad sa akon.

22“Kuhaa ang sapay halin sa karnero, ang tambok sa ikog, ang sapay nga nagaputos sa kasudlan, ang labing maayo nga bahin sang atay, ang duha ka mga batubato kag ang sapay nga yara sa ila, ang tuo nga paa, kay ini isa ka karnero nga lalaki nga ginagamit sa paghalad.

23Halin sa basket sang tinapay nga wala sing lebadora nga nahalad sa akon, magkuha ka sing nagakalainlain nga tinapay: isa ka bilog nga tinapay nga nasamuan sing lana nga olivo, isa ka tinapay nga wala masamuan sini, kag sang isa ka manipis nga tinapay.

24Ibutang mo ini tanan nga pagkaon sa mga kamot ni Aaron kag sa mga kamot sang iya mga anak nga lalaki kag ihalad nila ini paagi sa pagbayaw sang ila mga kamot subong halad sa akon.

25Dayon kuhaa ang pagkaon sa ila, kag sunoga ini sa altar sa ibabaw sang halad nga sinunog. Ang kahamot sini nga halad akon nahamut-an. Isa ini ka halad sa akon paagi sa kalayo.

26“Kuha ka sing pitso sang karnero nga lalaki nga gingamit sa pag-orden kay Aaron, kag ihalad mo ini paagi sa pagbayaw sini sa imo kamot subong isa ka halad sa akon. Ini nga bahin sang karnero mangin-imo.

27“Halin sa karnero nga lalaki nga ginagamit sa pag-orden ihalad mo sa akon ang pitso paagi sa pagbayaw sini sa imo kamot subong isa ka halad, subong man ang paa nga gintigana para sa mga pari.

28Suno sa akon walay katapusan nga sugo, ini nga mga bahin mangin-iya ni Aaron kag sang iya mga anak nga lalaki subong mga dulot nga kinahanglan ihatag sang mga tawo sang Israel halin sa ila mga halad sa paghiambit. Ini ila dulot sa akon, ang Ginoo.

29“Ang mga bayu ni Aaron subong pari pagaihatag sa iya mga anak nga lalaki kon sia mapatay, agod nga isuksok nila ini sa paghaplas kag sa pag-orden sa ila.

30Ang anak ni Aaron nga magabulos sa iya subong pari magasuksok sini sa sulod sang pito ka adlaw kon magsulod sia sa Tolda sang akon presensya sa pag-alagad sa Balaan nga Duog.

31“Kuha ka sang unod sang karnero nga lalaki nga gingamit sa ordinasyon ni Aaron kag sang iya mga anak nga lalaki, kag lagaa ini sa isa ka balaan nga duog.

32Didto sa pwertahan sang Tolda sang akon presensya pagakaunon ni Aaron kag sang iya mga anak nga lalaki ang unod sang karnero kag ang nabilin nga tinapay sa basket.

33Pagakaunon nila ang mga butang nga ginhalad para sa kapatawaran sang sala sang tion sa pag-orden sa ila. Ang mga pari lamang amo ang magkaon sini nga pagkaon tungod kay ini balaan.

34Kon may karne ukon tinapay nga mabilin tubtob sa aga, pagasunogon ini. Indi ini dapat kaunon kay ini balaan.

35“Dapat mo himuon kay Aaron kag sa iya mga anak nga lalaki ang akon gid ginsugo sa imo. Himuon mo ang pag-orden sa ila sa sulod sing pito ka adlaw.

36Sa tagsa ka adlaw dapat maghalad ka sing torite nga baka subong isa ka halad para sa kapatawaran sang sala. Paagi sini, ginakuha mo ang sala sa altar. Dayon haplason mo ini sang lana sang olivo agod manginbalaan.

37Sa sulod sang pito ka adlaw maghimo ka sing mga halad para sa pagtinlo kag paghalad sang altar. Gani ang altar manginbalaan gid, kag ang bisan sin-o ukon bisan ano nga makatandog sa sini mahalitan tungod sang gahom sang pagkabalaan sini.

38“Amo ini ang ihalad mo sa ibabaw sang altar: adlaw-adlaw, sa tanan nga panahon, maghalad ka sing duha ka mga kordero nga isa ka tuig ang edad.

39Ihalad mo ang isa ka kordero sa aga, kag ang isa sa hapon.

40Upod sa nahauna nga kordero ihalad mo ang duha ka libra sang pinili nga harina nga nasamuan sang isa ka litro sang puraw nga lana sang olivo. Magbutang man sang isa ka litro nga bino subong nga halad nga ilimnon.

41Ihalad mo ang ikaduha nga kordero sa kahapunanon kag ihalad mo upod sa sini, subong sang sa aga, ang amo man nga kadamuon sang harina, lana sang olivo kag ilimnon. Ang kahamot sini nga kalan-on nga ginahalad nagapahamuot sa akon, ang Ginoo.

42Ining halad nga sinunog dapat ihalad sa tanan nga panahon sa akon presensya sa pwertahan sang Tolda. Didto ako magapakigkita sa akon mga katawhan kag magapakighambal sa imo.

43Didto magapakigkita ako sa mga tawo sang Israel, kag ang lugar pakabalaanon sang makasililaw nga kapawa sang akon presensya.

44Pakabalaanon ko ang Tolda, kag amo man ang altar, kag pagapainon ko si Aaron kag ang iya mga anak nga lalaki, sa pag-alagad sa akon subong mga pari.

45Magaestar ako upod sa mga tawo sang Israel, kag ako mangin-ila Dios.

46Magakilala sila nga ako amo ang Ginoo nga ila Dios nga nagpagwa sa ila sa Ehipto agod mag-estar upod sa ila. Ako amo ang Ginoo nga ila Dios.

← Chapter 28 Jump to: Chapter 30 →