Exodus 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Dayon si Moises kag si Aaron nagkadto sa hari sang Ehipto kag nagsiling, “Amo ini ang ginsiling sang Ginoo, ang Dios sang Israel, ‘Tugoti sa paglakat ang akon mga tawo, agod nga maghiwat sila sing piesta sa desierto sa pagpasidungog sa akon.’”

2Nagsabat ang hari, “Sin-o bala ang Ginoo? Ngaa bala magpamati ako sa iya, kag palakton ko ang mga Israelinhon? Wala ako makakilala sa Ginoo. Kag indi ko gid pagtugotan nga maglakat ang mga Israelinhon.”

3Nagsiling sila, “Ang Dios sang mga Hebreo nagpahayag sang iya kaugalingon sa amon. Kon mahimo tugoti kami sa paglakat sing tatlo ka adlaw sa desierto agod magdulot sing mga halad sa Ginoo nga amon Dios. Kon indi kami maghalad, pamatyon niya kami paagi sa balatian ukon sa inaway.”

4Ang hari sang Ehipto nagsiling kay Moises kag kay Aaron, “Ano ang buot ninyo silingon sa pag-awat sang mga tawo sa ila pagtrabaho? Balik kamo sa inyo mga obra, kamo nga mga ulipon!

5Ini nga mga tawo mas nagadamo nga nagadamo pa gid sang sa tumandok nga mga Ehiptohanon. Karon, inyo bala sila pauntaton sa pag-obra?”

6Sa amo man nga adlaw ang hari nagmando sa mga kabo nga Ehiptohanon kag sa mga manugdumala nga Israelinhon:

7“Indi na kamo maghatag sa mga tawo sing mga dagami nga himuon nga tisa, subong sang inyo ginhimo. Palakta sila kag sila ang pakuhaa sing dagami.

8Pero pahimuon ninyo sila sing amo man gihapon kadamo nga mga tisa nga ila sadto ginhimo. Indi ninyo pagbuhini ang kadamuon. Mga matamad sila, kag amo ina nga nagareklamo sila kag nagasiling, ‘Palakta kami agod magdulot sing mga halad sa amon Dios!’

9Paobraha pa gid ini nga mga tawo sing tudotudo, agod magadamo pa gid ang ila maobra, sa baylo nga magpamati sila sa mga hambal nga binutig.”

10Ang mga kabo kag ang Israelinhon nga mga manugdumala sang mga tawo naggwa kag nagsiling sa mga Israelinhon, “Amo ini ang ginsiling sang hari, ‘Indi na ako maghatag sa inyo sing mga dagami.

11Maglakat kamo kag kamo ang magpangita sini bisan diin, pero maghimo kamo sing amo man gihapon kadamo nga mga tisa.’”

12Gani ang mga tawo naglalapta sa bug-os nga duta sang Ehipto sa pagpanguha sing dagami.

13Ang mga kabo nag-apura sa ila nga nagasiling, “Maghimo kamo sing amo man gihapon kadamo nga mga tisa kada adlaw, subong sang inyo ginhimo anay sang ginahatagan pa kamo sing dagami.”

14Ang mga kabo sang hari nagkastigo sang mga manugdumala nga Israelinhon, nga ila ginpadumala sa pag-obra, kag nagpamangkot sa ila, “Ngaa nga wala kamo maghimo sing amo man kadamo nga mga tisa, subong sang inyo ginhimo sang una?”

15Dayon ang mga manugdumala nga Israelinhon nagkadto sa hari, kag nagreklamo nga nagasiling, “Mahal nga Hari, ngaa bala ginahimo nimo ini sa amon?

16Wala man sing ginhatag sa amon nga mga dagami, pero ginapahimo kami sang tisa! Kag karon, Mahal nga Hari, ginakastigo kami. Kasal-anan ini sang imo nga tinawo.”

17Nagsabat ang hari, “Mga matamad kamo kag indi luyag mag-obra. Amo ina nga nagasiling kamo, ‘Palakta kami sa pagdulot sang mga halad sa Ginoo.’

18Karon balik kamo sa inyo obra! Wala sing dagami nga ihatag sa inyo, pero kinahanglan nga amo man gihapon kadamo nga mga tisa ang inyo himuon.”

19Ang mga manugdumala nga Israelinhon nakatalupangod nga nabutang sila sa ital-ital nga kahimtangan sang ginsilingan sila, “Dapat kamo maghimo sing amo man gihapon kadamo nga mga tisa kada adlaw.”

20Sang paghalin nila sa hari, nasugata nila si Moises kag si Aaron, nga nagahulat sa ila,

21kag nagsiling sila kay Moises kag kay Aaron, “Kabay nga matalupangdan sang Ginoo ang inyo ginhimo kag magsilot sa inyo, kay tungod sa inyo ginadumtan kami sang hari kag sang iya mga opisyales. Kamo ang naghatag sa ila sing kabangdanan sa pagpatay sa amon.”

22Gani nagbalik liwat si Moises sa Ginoo kag nagsiling, “ Ginoo, ngaa bala ginapintasan mo ang imo mga tawo? Ngaa bala ginpadala mo ako diri?

23Sugod sang akon pagkadto sa hari sa paghambal para sa imo, ginpintasan niya ang imo mga tawo kag wala gid ikaw magbulig sa ila!”

← Chapter 4 Jump to: Chapter 6 →