Exodus 27

Ilonggo (Maayong Balita nga Biblia (2012))

← Chapter 26 Jump to: Chapter 28 →

1“Maghimo ka sing altar nga kahoy nga akasya. Kinahanglan kwadrado ini, pito kag tunga ka tapak ang kalabaon, pito kag tunga ka tapak ang kalaparon, kag apat kag tunga ka tapak ang kataason.

2Himuan mo sing mga sungaysungay sa iya apat ka mga pamusod. Kinahanglan iunay ini sa altar kag haklapan sing bronsi.

3Himuan mo man ang altar sing bulotangan sang abo nga nabulit sang tambok. Himuan mo man sing mga pala, mga labador, mga kaw-it, kag mga bulotangan sang baga. Himuon mo sa bronsi ang tanan nga mga gamit para sa altar.

4Himuan mo man sing parilya nga bronsi ang altar. Butangan mo sang mga singsing nga bronsi ang apat ka mga pamusod sang parilya,

5kag ibutang mo ini sa idalom sang sanipa sang altar, agod makalambot ini tubtob sa tungatunga sang altar.

6Himuan mo ang altar sing mga yayungan nga kahoy nga akasya, kag haklapan mo ini sing bronsi.

7Igulo mo ini sa mga singsing sa kada kilid sang altar kon ginadala ini.

8Himuon mo ang altar nga guab sa sulod nga nahimo sa tapi. Himuon mo ini suno sa plano nga ginpakita ko sa imo sa bukid.

9“Maghimo ka sing bungbong sa palibot sang Tolda sang akon presensya. Sa nabagatnan nga bahin itakod ang mga kurtina nga mapino nga nagakunotkunot nga lino, singkwenta ka yarda ang kalabaon sa isa ka kilid,

10nga ginatukod sang baynte ka mga haligi nga bronsi, kag ini may baynte man ka mga sadsaran nga bronsi, kag ang mga haligi may mga kaw-it kag kalaw-itan nga pilak.

11Subong man, sa naaminhan nga bahin, ang kurtina may singkwenta ka yarda ang kalabaon, nga ginatukoran sang baynte ka mga haligi nga bronsi, kag ini may baynte man ka mga sadsaran nga bronsi. Ang mga haligi may mga kaw-it kag kalaw-itan nga pilak.

12Ang kasangkaron sang kurtina sa nakatundan nga bahin manginbaynte singko ka yarda nga may napulo ka mga haligi kag napulo ka mga sadsaran.

13Sa nasidlangan nga bahin sa diin yara ang pwertahan, ang kasangkaron sang bungbong manginbaynte-singko ka yarda.

14Ang kurtina sang isa ka kilid sang pwertahan manginpito kag tunga ka yarda, nga may tatlo ka mga haligi kag tatlo ka mga sadsaran,

15kag sa pihak man nga kilid sang pwertahan ang kurtina manginpito kag tunga ka yarda, nga may tatlo ka mga haligi kag tatlo ka mga sadsaran.

16Sa may pwertahan ang kurtina napulo ka yarda ang kalabaon nga nahimo sa asol, granate, pula nga delana, kag mapino nga nagakunotkunot nga lino nga nabordahan. Ginatukod ini sang apat ka mga haligi nga may apat ka mga sadsaran.

17Ang tanan nga mga haligi sa palibot sang mga bungbong may mga kalaw-itan nga pilak, kag ang ila mga kaw-it pilak, kag ang ila nga sadsaran bronsi.

18Ang bungbong dapat manginsingkwenta ka yarda ang kalabaon, baynte singko ka yarda ang kasangkaron, kag duha kag tunga ka yarda ang kataason. Ang mga kurtina pagahimuon sa mapino kag nagakunotkunot nga lino, kag ang mga sadsaran bronsi.

19Ang tanan nga galamiton sa Tolda bisan ano ang ginagamitan, kag ang tanan nga mga palpal sang Tolda kag ang mga galamiton sa bungbong, pagahimuon sa bronsi.

20“Sugoon mo ang mga Israelinhon nga dalhan nila ikaw sang pinakapuraw nga lana nga olivo para sa suga, agod nga ang suga mapasiga kada gab-i.

21Si Aaron kag ang iya mga kaanakan nga lalaki amo ang magabutang sini nga suga sa Tolda sang akon presensya sa gwa sang kurtina sa atubangan sang Kaban sang Kasugtanan. Magapadayon ini sa pagsiga halin sa kasisidmon tubtob sa aga didto sa akon presensya. Ini nga sugo pagatumanon sing dayon sang mga Israelinhon kag sang ila mga kaliwat.

← Chapter 26 Jump to: Chapter 28 →