Exodus 30

Ilonggo (Maayong Balita nga Biblia (2012))

← Chapter 29 Jump to: Chapter 31 →

1“Maghimo ka sing altar nga sunogan sang insyenso. Himuon mo ini halin sa kahoy nga akasya.

2Kinahanglan kwadrado ini, desi-otso ka pulgada ang kalabaon, kag desi-otso ka pulgada ang kasangkaron, kag tatlo ka tapak ang kataason. Kinahanglan ang iya mga sungaysungay sa apat ka mga pamusod unay sa sini.

3Haklapan mo sing puraw nga bulawan ang ibabaw, ang iya apat ka kilid, kag ang iya mga sungaysungay, kag himuan mo sing molde nga bulawan sa palibot sini.

4Himuan mo sing duha ka mga sulosingsing nga bulawan kag itakod mo sa idalom sang molde sa duha sini ka kilid, agod nga pagaguloan sang mga yayungan kon ini pagadal-on.

5Himuon mo ini nga mga yayungan halin sa kahoy nga akasya kag haklapan mo ini sing bulawan.

6Ibutang mo ini nga altar sa gwa sang kurtina nga nagakabit sa atubangan sang Kaban sang Kasugtanan. Amo ini ang lugar sa diin magapakigkita ako sa imo.

7Si Aaron magasunog sang insyenso nga mahumot sa ibabaw sini kada aga, kon nagaaman sia sang mga suga.

8Amo man ini ang dapat niya himuon kon magsindi sia sang mga suga sa kahapunanon. Ini nga paghalad sang insyenso dapat magpadayon nga wala sing untat sa tanan ninyo nga mga kaliwatan.

9Indi ka maghalad sa sini nga altar sang insyenso nga ginadilian, ukon bisan ano nga sapat nga halad nga sinunog, ukon bisan ano nga halad nga kalan-on, kag indi ka magbubo sa sini sang bisan ano nga halad nga ilimnon.

10Makaisa sa isa ka tuig si Aaron magahiwat sang seremonya sa pagtinlo sing altar paagi sa pagbutang sang dugo sang sapat nga ginhalad para sa sala sa apat ka mga sungaysungay. Dapat pagahimuon ini sa tagsa ka tuig sang tanan nga mga kaliwatan nga magasunod. Kinahanglan manginbalaan gid ini nga altar nga nahalad sa akon, ang Ginoo.”

11Ang Ginoo nagsiling kay Moises,

12“Kon magpang-isip ka sang mga tawo sang Israel, ang tagsa ka tawo kinahanglan magbayad sa akon sang bili para sa iya kabuhi, agod nga wala sing halit nga magaabot sa ila samtang ginahimo ang pagpang-isip.

13Ang tagsatagsa nga nalakip sa pagpang-isip, dapat magbayad sang balayran nga ginapangayo suno sa opisyal nga talaksan. Ang tagsatagsa dapat magbayad sini subong nga dulot sa akon.

14Ang tagsatagsa nga naisip sa pagpang-isip, nga nagaedad sang baynte ka tuig pa ibabaw, magabayad sini nga kantidad sa akon.

15Ang manggaranon indi magbayad sang sobra, ukon ang imol sing kulang, kon magbayad sila sini nga kantidad para sa ila kabuhi.

16Tipunon mo ini nga kwarta halin sa mga tawo sang Israel kag gamiton ini sa pag-atipan sang Tolda sang akon presensya. Ini nga buhis amo ang kabayaran para sa ila mga kabuhi, kag magadumdom ako sa pag-apin sa ila.”

17Ang Ginoo nagsiling kay Moises,

18“Maghimo ka sing batya nga bronsi, nga may tulongtungan nga bronsi. Ibutang mo ini sa ulot sang Tolda kag sang altar, kag sudlan mo ini sing tubig.

19Sa sini si Aaron kag ang iya mga anak nga lalaki magapanghinaw sang ila mga kamot kag sang ila mga tiil

20sa wala pa sila magsulod sa Tolda kag magpalapit sa altar sa pagdulot sang halad nga kalan-on. Dayon indi sila magkalamatay.

21Dapat sila magpanghinaw sang ila mga kamot kag sang ila mga tiil, agod indi sila magkalamatay. Amo ini ang pagsulondan nga ila dapat tumanon sa walay katapusan kag sang ila mga kaliwatan.”

22Ang Ginoo nagsiling kay Moises,

23“Magkuha ka sing pinakamaayo nga mga pahamot: dose ka libra nga mira nga agwa, anom ka libra nga mahamot nga kanela, anom ka libra nga mahamot nga kalamo,

24dose ka libra nga kasiya—ang tanan natimbang suno sa opisyal nga talaksan—kag isa ka galon nga lana sang olivo.

25Gikan sini maghimo ka sing balaan nga lana nga inughaplas, subong sang pagmiskla sang manughimo sing agwa. Kinahanglan manginbalaan ini nga lana nga inughaplas.

26Haplasan mo sini ang Tolda sang akon presensya, ang Kaban sang Kasugtanan,

27ang lamisa kag ang tanan sini nga mga gamit, ang kandelirohan kag ang mga gamit sini, ang altar nga ginasunogan sang insyenso,

28ang altar para sa mga halad nga pagasunogon kag ang tanan nga mga gamit sini, kag ang batya lakip ang iya tulongtungan.

29Sa sini nga paagi ihalad mo ini nga mga butang, kag kinahanglan manginbalaan gid ini tanan. Ang bisan sin-o kag ang bisan ano nga makatandog sini mahalitan tungod sang gahom sang pagkabalaan sini.

30Dayon haplasan mo si Aaron kag ang iya mga anak nga lalaki, kag ordenahan mo sila nga magaalagad sa akon subong mga pari.

31Singganon mo ang mga tawo sang Israel, ‘Ining balaan nga lana nga inughaplas kinahanglan pagagamiton sa akon pag-alagdan sa bug-os ninyo nga mga kaliwatan.

32Indi mo dapat ini pag-ibubo sa ordinaryo nga mga tawo, kag indi kamo maghimo sing kaangay sini nga pagmiskla. Balaan ini, kag dapat ninyo kilalahon nga ini balaan.

33Ang bisan sin-o nga maghimo sing bisan ano nga kaangay sini, ukon maggamit sini sa bisan kay sin-o nga indi pari indi ko na pagkabigon nga isa sang akon mga katawhan.’”

34Ang Ginoo nagsiling kay Moises, “Magkuha ka sing pareho nga kadamuon sa sining masunod nga mga pahamot: estakte, onika, galbano, kag puraw nga insyenso.

35Gikan sa sini maghimo ka sing insyenso, subong sang paghimo sang manughimo sing agwa. Kinahanglan asinan ini agod manginpuraw kag balaan.

36Bukbokon mo sing mapino ang bahin sini, kag ibutang mo ang bahin sini sa Tolda sang akon presensya kag iwas-ag ini sa atubangan sang Kaban sang Kasugtanan. Kabigon mo ini nga insyenso nga labi ka balaan.

37Indi ka maghimo sang bisan ano nga insyenso kaangay sini nga pagmiskla nga imo gamiton. Kinahanglan kabigon mo ini nga isa ka balaan nga butang nga nahalad sa akon.

38Ang bisan sin-o nga maghimo kaangay sini nga pahumot para sa iya kaugalingon, indi ko na pagkabigon nga isa sang akon mga katawhan.”

← Chapter 29 Jump to: Chapter 31 →