Exodus 40

Ilonggo (Maayong Balita nga Biblia (2012))

← Chapter 39 Jump to:

1Ang Ginoo nagsiling kay Moises,

2“Sa nahauna nga adlaw sang nahauna nga bulan, patindugon mo ang Tolda sang presensya sang Ginoo.

3Ibutang mo sa sini ang Kaban sang Kasugtanan nga nasudlan sang Napulo ka Sugo, kag butangan mo sang kurtina ang atubang sini.

4Dalhon mo ang lamisa sa sulod kag ibutang mo ang mga kasangkapan sa sini. Ipasulod mo man ang kandelirohan kag pasigahon ini.

5Ibutang mo ang altar nga bulawan nga pagasunogan sang insyenso sa atubangan sang Kaban sang Kasugtanan kag itakod ang kurtina sa pwertahan sang Tolda.

6Ibutang mo ang altar nga pagasunogan sang mga halad sa atubangan sang Tolda.

7Ibutang mo ang batya sa ulot sang Tolda kag sang altar, kag butangan mo ini sing tubig.

8Patindugon mo ang bungbong palibot kag itakod ang kurtina sa pwertahan sini.

9“Dayon kuha ka sing lana nga inughaplas kag haplasan ang Tolda kag ang tanan nga yara dira. Sa sini nga paagi ihalad mo ini kag ang tanan sini nga kasangkapan kag ini manginbalaan.

10Dayon haplasan mo ang altar nga ginasunogan sang mga halad kag ang tanan sini nga mga kasangkapan. Ihalad mo ini sa sini nga paagi kag manginbalaan gid ini.

11Haplasan mo man ang batya kag ang iya sini tulongtungan, kag ihalad mo ini sa sini nga paagi.

12“Dalhon mo si Aaron kag ang iya mga anak sa pwertahan sang Tolda kag papaligoa sila sa tubig.

13Ipasuksok mo ang balaan nga mga bayu kay Aaron, haplasan mo sia, kag sa sini nga paagi imo sia ginahalad agod makaalagad sia sa akon subong nga pari.

14Dalhon mo ang iya mga anak kag pasuksokan mo sila sang ila mga bayu.

15Dayon haplasan mo sila, subong sang paghaplas mo sa ila amay, agod makaalagad sila sa akon subong mga pari. Sa tapos mo sila mahaplasan manginpari sila sa walay katubtoban.”

16Ginhimo ni Moises ang tanan suno sa ginsugo sang Ginoo sa iya.

17Gani sa nahauna nga adlaw sang nahauna nga bulan sang ikaduha nga tuig, sa tapos sila makagwa sa Ehipto ang Tolda sang presensya sang Ginoo ginpatindog.

18Ginpahamtang ni Moises ang mga sadsaran sini, ginbutang ang mga dingding nga tapi, gin-angot ang mga baral, kag ginpatindog ang mga haligi sini.

19Ginhumlad niya ang tabon sa ibabaw sang Tolda, kag gintaklap niya ang sa gwa nga bahin sang tabon sa ibabaw sini suno sa ginsugo sang Ginoo sa iya.

20Dayon ginkuha niya ang duha ka mga lapida nga bato kag ginsulod ini sa Kaban sang Kasugtanan. Gingulo niya ang mga yayungan sa mga dalagku nga mga sulosingsing sang Kaban kag ginbutang ang takop sa ibabaw sini.

21Dayon ginbutang niya ang Kaban sa sulod sang Tolda, kag gintakod niya ang kurtina. Sa sini nga paagi ginlipnan niya ang Kaban sang Kasugtanan suno sa ginsugo sang Ginoo sa iya.

22Ginbutang niya ang lamisa sa sulod sang Tolda, sa naaminhan nga bahin sa gwa sang kurtina,

23kag ginbutangan niya ini sang tinapay nga nahalad sa Ginoo, suno sa ginsugo sang Ginoo sa iya.

24Ginbutang niya ang kandelirohan sa sulod sang Tolda sa atubangan sang lamisa, sa nabagatnan nga bahin sang Tolda.

25Ginpasiga niya ang mga suga sa presensya sang Ginoo, suno sa ginsugo sang Ginoo sa iya.

26Ginbutang niya ang bulawan nga altar sa sulod sang Tolda, sa atubangan sang kurtina.

27Sa ibabaw sini ginsunog niya ang insyenso nga mahamot, suno sa ginsugo sang Ginoo sa iya.

28Gintakod niya ang kurtina sa pwertahan sang Tolda.

29Ginbutang niya ang altar nga ginasunogan sang mga halad sa pwertahan sang Tolda. Sa ibabaw sini nagdulot sia sing halad nga sinunog kag ang halad nga kalan-on suno sa ginsugo sang Ginoo sa iya.

30Ginbutang niya ang batya sa ulot sang Tolda kag sang altar, kag ginpuno niya ini sang tubig nga hilinawan.

31Sanday Moises, Aaron, kag ang iya mga anak nagpanghinaw sang ila mga kamot kag sang ila mga tiil didto.

32Kon magsulod sila sa Tolda ukon magkadto sa altar, nagapanghinaw sila, suno sa ginsugo sang Ginoo kay Moises.

33Gintakod niya ang bungbong palibot sa Tolda kag sa altar, kag gintakod niya ang kurtina sa pwertahan sang bungbong. Gani natapos ni Moises ang tanan nga mga bulohaton.

34Ang panganod nagtabon sang Tolda kag ang makasililaw nga kapawa sang presensya sang Ginoo nagpuno sini.

35Tungod sini, si Moises indi makasulod sa Tolda.

36Kon magsaylo ang mga Israelinhon halin sa isa ka lugar pakadto sa isa, nagahalin lamang sila kon ang panganod maghayaw sa ibabaw sang Tolda.

37Kon indi maghayaw ang panganod, wala sila nagahalin sang ila kampo, kundi naghulat sila tubtob sa adlaw nga ang panganod maghayaw.

38Ang panganod nga nagapakita sang presensya sang Ginoo nagapabilin sa ibabaw sang Tolda kon adlaw, kag kon gab-i may kalayo nga nagadabdab nga makita sang mga tawo sang Israel sa tanan nga tion sang ila pagsaylusaylo.

← Chapter 39 Jump to: