Exodus 37

Ilonggo (Maayong Balita nga Biblia (2012))

← Chapter 36 Jump to: Chapter 38 →

1Si Besalel naghimo sang Kaban sang Kasugtanan halin sa kahoy nga akasya, kwarentay singko ka pulgada ang kalabaon, baynte siete ka pulgada ang kasangkaron, kag baynte siete ka pulgada ang kataason.

2Ginhaklapan niya ini sing puraw nga bulawan sa sulod kag sa gwa, kag ginhimuan niya sing molde nga bulawan ang palibot sini.

3Ginhimuan niya ini sing apat ka dalagku nga mga sulosingsing nga bulawan kag gin-angot niya ini sa iya apat ka mga tiil, duha ka dalagku nga mga sulosingsing sa kada kilid.

4Naghimo sia sing mga yayungan halin sa kahoy nga akasya kag ginhaklapan niya ini sing bulawan.

5Gingulo niya ini sa mga sulosingsing sa kada kilid sang Kaban sang Kasugtanan sa pagdala sini.

6Naghimo sia sing takop halin sa puraw nga bulawan, kwarentay singko ka pulgada ang kalabaon, kag baynte siete ka pulgada ang kasangkaron.

7Sa duha ka punta sang takop, naghimo sia sing duha ka kerubin halin sa sinalsal nga bulawan,

8isa ka kerubin sa kada punta. Ginhimo niya ini nga unay sa takop.

9Ang mga kerubin nagahumlad sang ila mga pakpak sa ibabaw, agod nga ila matabunan ang takop. Nagaatubangay sila, kag ang kada-isa sa ila nagatamod sa takop.

10Naghimo sia sing lamisa halin sa kahoy nga akasya, trayntay sais ka pulgada ang kalabaon, desi-otso ka pulgada ang kasangkaron, kag baynte siete ka pulgada ang kataason.

11Ginhaklapan niya ini sing puraw nga bulawan kag ginhimuan sing molde nga bulawan ang palibot sini.

12Ginhimuan niya ini sing sanipa nga apat ka pulgada ang kalaparon palibot, kag ginhimuan niya sing molde nga bulawan ang sanipa.

13Naghimo sia sing apat ka dalagku nga mga sulosingsing nga bulawan para sa sini, kag gintakod niya sa apat ka mga pamusod sa iya sini mga tiil.

14Ang dalagku nga mga sulosingsing nga ginaguloan sang mga yayungan sa pagdala sang lamisa gintakod malapit sa sanipa.

15Naghimo sia sing mga yayungan halin sa kahoy nga akasya, kag ginhaklapan niya ini sing bulawan.

16Naghimo sia sing mga kasangkapan nga puraw nga bulawan para sa lamisa: mga pinggan, mga tasa, mga tibod, kag mga yahong nga gamiton para sa halad nga ilimnon.

17Naghimo sia sang kandelirohan nga puraw nga bulawan. Ginhimo niya ang tiil kag ang lawas sini halin sa sinalsal nga bulawan. Unay ang iya adorno nga mga bulak lakip ang iya mga bukol kag ang mga nagabuskad na.

18May anom ka mga sanga nga nagagaway sa magtimbang nga kilid, tagtatlo kada kilid.

19Ang kada-isa sang anom ka mga sanga may tatlo ka adorno nga mga bulak nga ang iya korte kaangay sang mga bulak sang almendro, nga ang iban bukol pa kag ang iban buskad na.

20Ang lawas sang kandelirohan may apat ka adorno nga mga bulak nga ang korte kaangay sang mga bulak sang almendro nga ang iban bukol pa, kag ang iban buskad na.

21May isa ka bukol sa idalom sang tagsa ka pares sang tatlo ka pares nga mga sanga.

22Ang mga bukol kag ang mga sanga unay sa kandelirohan. Nahimo ini sa puraw kag sinalsal nga bulawan.

23Naghimo sia sang pito ka mga suga para sa kandelirohan, kag naghimo sia sing mga inugpalong kag sang iya mga inugsalod halin sa puraw nga bulawan.

24Naggamit sia sing setentay singko ka libras nga puraw nga bulawan sa paghimo sang kandelirohan kag sang tanan niya nga mga gamit.

25Naghimo sia sing altar halin sa kahoy nga akasya para sunogan sang insyenso. Kwadrado ini, desi-otso ka pulgada ang kalabaon, desi-otso ka pulgada ang kasangkaron, kag tatlo ka tapak ang kataason. Ang iya mga sungaysungay sa apat ka mga pamusod unay sa sini.

26Ginhaklapan niya sing puraw nga bulawan ang ibabaw sini, ang apat ka mga kilid, kag ang iya mga sungaysungay kag ginhimuan niya sing molde nga bulawan ang palibot sini.

27Ginhimuan niya ini sing duha ka dalagku nga mga sulosingsing nga bulawan, kag gintakod ini sa idalom sang molde sa duha ka kilid, agod nga guloan sang yayungan sa pagdala sini.

28Naghimo sia sing mga yayungan halin sa kahoy nga akasya kag ginhaklapan ini sing bulawan.

29Naghimo man sia sing balaan nga lana nga inughaplas kag puraw nga insyenso nga mahamot, nga ginmiskla subong sang paghimo sang agwa.

← Chapter 36 Jump to: Chapter 38 →