Exodus 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1Ang Ginoo nagsiling kay Moises:

2“Singgana ang mga Israelinhon nga maghalad sila sa akon. Batunon mo para sa akon ang mga dulot nga ginahatag sing kinabubot-on sang tagsa ka tawo.

3Amo ini ang mga dulot nga imo batunon: bulawan, pilak kag bronsi;

4delana nga asol, granate, kag pula; lino nga manipis, panapton nga nahimo sa bulbol sang kanding;

5panit sang karnero nga lalaki nga nalugom sa pula; mapino nga panit; kahoy nga akasya;

6lana para sa mga suga; mga pahumot para sa lana nga inughaplas, kag para sa mahumot nga insyenso;

7kornalina kag iban nga malahalon nga mga bato, nga inugtampok sa bestidora, kag sa hapin sa dughan sang Pinakamataas nga Pari.

8Himuan nila ako sing balaan nga Tolda agod ako mag-estar upod sa ila.

9Himuon mo ini kag ang tanan sini nga mga kasangkapan suno sa plano nga ipakita ko sa imo.

10“Maghimo sila sing Kaban nga kahoy sang akasya, kwarentay singko ka pulgada ang kalabaon, baynte siete ka pulgada ang kasangkaron, kag baynte siete ka pulgada ang kataason.

11Haklapan mo ini sing puraw nga bulawan sa sulod kag sa gwa. Himuan mo ini sing molde nga bulawan sa palibot.

12Himuan mo sing apat ka dalagku nga mga singsing nga bulawan, kag itakod mo ini sa iya apat ka mga tiil, duha ka bilog sa tagsa ka kilid.

13Maghimo ka sing mga yayungan halin sa akasya nga kahoy kag haklapan mo ini sing bulawan.

14Igulo mo ang mga yayungan sa mga singsing sa tagsa ka kilid sang Kaban sa pagdala sini.

15Ibilin ang mga yayungan sa mga singsing, kag indi paghusluon.

16Dayon isulod mo sa Kaban ang duha ka mga lapida nga bato nga nasulatan sang mga kasugoan nga ihatag ko sa imo.

17“Magahimo ka sing takop nga puraw nga bulawan, kwarentay singko ka pulgada ang kalabaon kag baynte siete ka pulgada ang kasangkaron.

18Sa duha ka punta sining takop maghimo ka sing duha ka mga kerubin nga sinalsal nga bulawan,

19isa sa tagsa ka punta. Himua ninyo sila nga unay sa takop.

20Himuon ninyo nga ang mga pakpak sang kerubin magahumlad sa ibabaw sang takop, agod nga malandungan nila ini. Nagaatubangay sila nga ang tagsatagsa nagatamod sa takop.

21Itungtong mo ang takop sa ibabaw sang Kaban, kag sa sulod sang Kaban ibutang mo ang duha ka mga lapida nga bato nga nasulatan sang mga kasugoan nga ihatag ko sa imo.

22Magapakigkita ako sa imo didto. Halin sa ibabaw sang takop kag sa tunga sang duha ka mga kerubin nga yara sa ibabaw sang Kaban, ihatag ko sa imo ang tanan nga mga sugo para sa mga tawo sang Israel.

23“Maghimo ka sing lamisa halin sa akasya nga kahoy, trayntay sais ka pulgada ang kalabaon, desi-otso ka pulgada ang kalaparon, kag baynte siete ka pulgada ang kataason.

24Haklapan mo ini sang puraw nga bulawan kag himuan mo sing molde nga bulawan sa palibot.

25Himuan mo sing sanipa nga tatlo ka pulgada ang kalaparon sa palibot kag himuan mo sing molde nga bulawan ang palibot sang sanipa.

26Himuan mo sing apat ka dalagku nga mga singsing nga bulawan kag itakod mo ini sa apat ka mga pamusod sa diin yara ang mga tiil.

27Itakod mo ang mga singsing nga guloan sang mga yayungan sang lamisa malapit sa sanipa.

28Himuon mo ining mga yayungan halin sa kahoy nga akasya, kag haklapan mo ini sing bulawan.

29Maghimo ka sing mga pinggan, mga tasa, mga tibod, kag mga yahong nga gamiton para sa mga halad nga ilimnon. Ini tanan himuon mo halin sa puraw nga bulawan.

30Ang lamisa igabutang sa atubangan sang Kaban sang Kasugtanan, kag sa ibabaw sang lamisa may yara pirme nga balaan nga tinapay nga nahalad sa akon.

31“Maghimo ka sing kandelirohan nga puraw nga bulawan. Himuon mo ang iya tiil kag ang iya lawas sa sinalsal nga bulawan. Magaunay sa sini ang iya adorno nga mga bulak lakip ang mga bukol kag ang mga nagabuskad na.

32Anom ka mga sanga ang magagaway sa magtimbang nga kilid, tagtatlo kada kilid.

33Ang tagsa ka anom ka mga sanga may tatlo ka adorno nga mga bulak nga ang iya korte kaangay sang mga bulak sang almendro, ang iban bukol pa kag ang iban buskad na.

34Ang lawas sang kandelirohan may apat ka adorno nga mga bulak nga ang iya korte kaangay sang mga bulak sang almendro, ang iban bukol pa, kag ang iban buskad na.

35May isa ka bukol sa idalom sang tagsa ka pares sang tatlo ka pares nga mga sanga.

36Ang mga bukol, ang mga sanga, kag ang kandelirohan unay sa nahimo nga puraw kag sinalsal nga bulawan.

37Maghimo ka sing pito ka mga suga para sa kandelirohan kag ibutang mo ini sa mataas agod nga makasilak sa atubangan.

38Himua ang iya inugpalong kag inugsalod nga puraw nga bulawan.

39Gamiton mo ang setentay singko ka libra nga puraw nga bulawan sa paghimo sang kandelirohan kag sang tanan nga mga gamit sini.

40Halungan mo nga himuon ini suno gid sa plano nga ginpakita ko sa imo sa bukid.

← Chapter 24 Jump to: Chapter 26 →