Exodus 31

Ilonggo (Maayong Balita nga Biblia (2012))

← Chapter 30 Jump to: Chapter 32 →

1Ang Ginoo nagsiling kay Moises,

2“Ginpili ko si Besalel, nga anak nga lalaki ni Uri, kag apo ni Hur, halin sa tribo ni Juda.

3Ginpuno ko sia sang akon gahom, agod nga manginsampaton sia, may abilidad, kag makahibalo sang tanan nga sari sang bulohaton:

4sa pagplano sing matahom nga mga desinyo nga pagahimuon sa bulawan, pilak kag bronsi;

5sa paglagari sang malahalon nga mga bato nga inugtampok; sa paggutib sang kahoy; kag sang tanan nga sari sang matahom nga bulohaton.

6Ginpili ko man si Oholiab ang anak ni Ahisamak, halin sa tribo ni Dan sa pag-obra upod sa iya. Ginhatagan ko man sing abilidad ang tanan nga sampaton nga mga panday, agod nga ila mahimo ang tanan nga ginsugo ko sa imo nga himuon:

7ang Tolda sang akon presensya, ang Kaban sang Kasugtanan, ang tabon nga yara sa ibabaw sini, ang tanan nga mga gamit sang Tolda,

8ang lamisa kag ang tanan nga mga kasangkapan sini, ang kandelirohan nga puraw nga bulawan kag ang tanan nga mga kasangkapan sini, ang altar nga ginasunogan sang insyenso,

9ang altar nga ginahalaran sang mga halad nga sinunog kag ang tanan nga mga kasangkapan sini, ang batya kag ang iya tulongtungan,

10ang malahalon kag balaan nga mga bayu ni Aaron kag sang iya mga anak nga lalaki nga pagagamiton sa ila pag-alagad subong mga pari,

11ang lana nga inughaplas, kag ang insyenso nga mahamot para sa Balaan nga Duog. Sa paghimo sini tanan, pagahimuon nila ini suno gid sa akon ginsugo sa imo.”

12Ang Ginoo nagsiling kay Moises,

13“Singgana ang mga tawo sang Israel, ‘Magpahuway kamo sa akon Adlaw nga Inugpahuway, tungod kay ini tanda sa tunga ko kag sa inyo, kag sa inyo mga kaliwat, sa pagpakita nga ako, ang Ginoo, naghimo sa inyo nga akon kaugalingon nga mga tawo.

14Dapat magpahuway kamo sa Adlaw nga Inugpahuway, tungod kay ini ginpakabalaan para sa inyo. Ang bisan sin-o nga wala nagapakabalaan sini nga adlaw, pagapatyon. Ang bisan sin-o nga nagaobra sa Adlaw nga Inugpahuway pagaseparahon sa iya mga pariente.

15Mag-obra kamo sa sulod sang anom ka adlaw, pero sa ikapito amo ang adlaw nga ang tanan nga mga tawo dapat gid magpahuway, kay ini balaan para sa akon. Ang bisan sin-o nga mag-obra sa sina nga adlaw pagapatyon.

16Gani ang mga tawo sang Israel dapat magpahuway sa Adlaw nga Inugpahuway. Ang tanan nga mga kaliwatan sa ulihi, dapat magtuman sini, subong isa ka tanda sang nagapadayon nga kasugtanan.

17Mangintanda ini nga wala sing katapusan sa tunga nakon kag sang mga tawo sang Israel, tungod kay ako, ang Ginoo, nagtuga sang langit kag duta sa sulod sang anom ka adlaw, kag sa ikapito nga adlaw nag-untat ako sa pag-obra kag nagpahuway.’”

18Sa tapos makahambal ang Dios kay Moises sa Bukid sang Sinai, ginhatag niya kay Moises ang duha ka mga lapida nga bato sang kasugtanan, nga ginsulatan sang Dios mismo.

← Chapter 30 Jump to: Chapter 32 →