Exodus 36

Ilonggo (Maayong Balita nga Biblia (2012))

← Chapter 35 Jump to: Chapter 37 →

1“Si Besalel, si Oholiab, kag ang tanan nga sampaton nga mga manug-obra nga ginhatagan sang Ginoo sing abilidad kag kaalam, kag makahibalo sa paghimo sang tanan nga mga butang nga kinahanglanon sa pagpatindog sang balaan nga Tolda, dapat maghimo sang tanan suno sa ginsugo sang Ginoo.”

2Gintawag ni Moises si Besalel, si Oholiab, kag ang tanan nga sampaton nga mga tawo nga ginhatagan sang Ginoo sing abilidad, ang tanan nga handa magbulig, kag ginsingganan sila sa pagsugod sa pag-obra.

3Ginbaton nila halin kay Moises ang tanan nga mga dulot nga gindala sang mga Israelinhon sa pagpatindog sang balaan nga Tolda. Ang mga tawo sang Israel nagpadayon sa pagdala sang ila mga dulot kada aga kay Moises.

4Dayon ang sampaton nga mga tawo nga nagaobra sang bulohaton nagkadto

5kay Moises kag nagsiling, “Ang ginadala sang mga tawo sobra na sang sa kinahanglanon para sa bulohaton nga ginsugo sang Ginoo nga himuon.”

6Gani si Moises nagsugo nga ipahibalo sa bug-os nga katawhan nga yara sa kampo, “Wala na sing isa, lalaki ukon babayi, nga magdugang sa pag-amot para sa balaan nga Tolda.” Tungod sini nag-untat ang mga tawo sa pagdala sang bisan ano.

7Ang mga naamot sobra na sa pagpahuman sang tanan nga mga bulohaton.

8Ang tanan nga labing sampaton nga mga tawo sa mga nag-ulobra naghimo sang Tolda sang presensya sang Ginoo. Nahimo ini sa napulo ka panid nga tela sang mapino kag nagakunotkunot nga lino, asol, granate, kag mapula nga delana nga nabordahan sang mga laragway sang kerubin.

9Ang kada panid may katorse ka yarda ang kalabaon kag duha ka yarda ang kasangkaron, ang tanan may pareho nga takos.

10Ang lima ka panid gintahi nila, kag nangin-isa ka tinambitambi, kag ang lima sa isa man ka tinambitambi.

11Naghimo sila sing mga sulosingsing nga tela nga asol sa punta nayon sang kurtina sa kada tinambitambi.

12Ginbutangan nila sing singkwenta ka mga sulosingsing sa nahauna nga panid sang nahauna nga tinambitambi, kag singkwenta ka mga sulosingsing sa katapusan nga panid sa ikaduha nga tinambitambi, agod magkita sila.

13Naghimo sila sing singkwenta ka mga kaw-it nga bulawan, kag paagi sini gintabid ang duha ka tinambitambi kag ini nangin-isa.

14Dayon naghimo sila sing onse ka panid nga tela nga nahimo sa bulbol sang kanding nga mangin-atop sang Tolda.

15Ang tagsa ka panid kinse ka yarda ang kalabaon kag duha ka yarda ang kasangkaron, ang tanan pareho ang takos.

16Gintahi nila ang lima ka tela kag nangin-isa ini ka tinambitambi, kag ang anom nga nabilin sa isa man ka tinambitambi.

17Ginbutangan nila sing singkwenta ka mga sulosingsing ang punta sang katapusan nga panid sang nahauna nga tinambitambi, kag singkwenta ka mga sulosingsing ang punta sang isa ka tinambitambi.

18Naghimo sila sing singkwenta ka mga kaw-it nga bronsi sa pagtabid sang duha ka mga tinambitambi, agod mahimo nga isa ka tabon.

19Naghimo sila sang duha pa ka inugtaklap para sa Tolda nga nahimo sa panit sang karnero nga lalaki nga linugom sa pula, kag sang mapino nga panit nga isampaw sa ibabaw sini.

20Naghimo sila sing mga dingding nga patindog halin sa kahoy nga akasya para sa Tolda.

21Ang kalabaon sang tagsa ka dingding nga tapi kinse ka tapak kag baynte siete ka pulgada ang kasangkaron,

22nga may duha ka mga diladila sa punta kag punta nga nagaangot sa ila. Ginhimuan nila sing mga diladila ang tanan nga mga dingding nga tapi sang Tolda.

23Naghimo sila sing baynte ka mga dingding nga tapi sa nabagatnan nga bahin,

24kag kwarenta ka mga sadsaran nga pilak sa idalom sini, duha ka mga sadsaran sa idalom sang tagsa ka dingding nga tapi, agod maangot sang duha ka mga diladila ang tagsa ka dingding nga tapi.

25Naghimo man sila sing baynte ka mga dingding nga tapi sa naaminhan nga bahin sang Tolda,

26kag kwarenta ka mga sadsaran nga pilak, duha ka mga sadsaran sa idalom sang tagsa ka dingding nga tapi.

27Sa likod sang Tolda sa nakatundan, naghimo sila sing anom ka mga dingding nga tapi,

28kag naghimo pa gid sila sing duha ka mga dingding nga tapi sa mga pamusod sa likod nayon sang Tolda.

29Ining mga dingding nga tapi sa mga pamusod naangot sa idalom tubtob sa ibabaw, sa nahauna nga sulosingsing. Sa sini nga paagi ginhimo nila ining duha ka mga dingding nga tapi sa duha man ka mga pamusod.

30Gani may walo ka mga dingding nga tapi kag desi-sais ka mga sadsaran nga pilak, duha sa idalom sang tagsa ka dingding nga tapi.

31Naghimo sila sing mga baral halin sa kahoy nga akasya, lima para sa mga dingding nga tapi sa isa ka kilid sang Tolda,

32lima para sa mga dingding nga tapi sa pihak nga kilid, kag lima para sa mga dingding nga tapi sa nakatundan nga kilid sa likod nayon.

33Ginhimuan nila sing baral sa tungatunga sang mga dingding nga tapi halin sa isa ka punta sang Tolda pakadto sa isa.

34Ginhaklapan nila sing bulawan ang mga dingding nga tapi kag gintakdan sing mga sulosingsing nga bulawan nga guloan sang mga baral, nga ginhaklapan man sing bulawan.

35Naghimo sila sing kurtina nga delana nga asol, nga granate, kag pula kag mapino nga lino nga nagakunotkunot, nga nabordahan sang mga laragway sang kerubin.

36Naghimo sila sing apat ka mga haligi halin sa akasya nga kahoy nga tabiran sang kurtina. Ginhaklapan nila ini sing bulawan, kag gintakdan sing mga kaw-it nga bulawan. Naghimo man sila sing apat ka mga sadsaran nga pilak nga natungtongan sang mga haligi.

37Para sa pwertahan sang Tolda naghimo sila sang kurtina nga delana nga asol, nga granate, nga pula, kag mapino nga lino nga nagakunotkunot, nga nabordahan.

38Naghimo man sila sing lima ka mga haligi nga natakdan sang mga kaw-it. Ginhaklapan ang ila mga uloulo kag ang ila mga sadsaran sing bulawan. Naghimo man sila sing lima ka mga sadsaran nga bronsi para sa mga haligi.

← Chapter 35 Jump to: Chapter 37 →