Exodus 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Ang tanan nga mga pumoluyo sang Israel naghalin sa desierto sang Sin, kag nagpadayon sa ila pagpanglakaton nga nagasaylosaylo sa mga lugar suno sa ginsugo sang Ginoo. Nagpatindog sila sang ila mga tolda sa Refidim, pero wala sing tubig didto nga sarang mainom sang mga tawo.

2Ginbasol nila si Moises kag nagsiling, “Hatagi kami sang tubig nga mainom.” Nagsabat si Moises sa ila, “Ngaa bala ginabasol ninyo ako? Ngaa bala nga ginatilawan ninyo ang Ginoo?”

3Pero nauhaw gid ang mga tawo, kag nagpadayon sila sa pagreklamo kay Moises. Nagsiling sila, “Ngaa nga gindala mo kami pagwa sa Ehipto? Agod bala magkalamatay kami, ang amon mga kabataan, kag ang amon mga kahayupan sa kauhaw?”

4Si Moises nagpangamuyo sing hugot gid sa Ginoo kag nagsiling, “Ano bala ang akon pagahimuon sa sini nga mga tawo? Daw batuhon na nila ako.”

5Ang Ginoo nagsiling kay Moises, “Dalha ang iban nga mga pangulo sang Israel kag mag-una kamo sa mga tawo. Dalha ang imo sungkod nga imo anay ginhampak sa Suba sang Nilo kag maglakat.

6Magauna ako sa imo didto kag magatindog sa ibabaw sang daku nga bato sa Bukid sang Sinai. Hampaka ang daku nga bato, kag magagwa ang tubig nga pagaimnon sang mga tawo.” Ginhimo ini ni Moises sa atubang sang mga pangulo sang Israel.

7Ang lugar ginhingalanan Masa kag Meriba, tungod kay ang mga Israelinhon nagbasol kag nagtilaw sa Ginoo sang ila pagsiling, “Yara bala ang Ginoo kaupod naton ukon wala?”

8Ang mga Amaleknon nag-abot kag nagsalakay sa mga Israelinhon sa Refidim.

9Si Moises nagsiling kay Josue, “Magpili ka sing mga tawo, kag maglakat buas sa pagpakig-away sa mga Amaleknon. Magatindog ako sa ibabaw sang bakulod kag magauyat sang sungkod nga ginpadala sang Dios sa akon.”

10Gintuman ni Josue ang ginsiling ni Moises sa iya kag naggwa sila sa pagpakig-away sa mga Amaleknon, samtang si Moises, si Aaron, kag si Hur nagtaklad sa putokputokan sang bakulod.

11Samtang ginabayaw ni Moises ang iya mga kamot, nagadaog ang mga Israelinhon, pero kon iya gani ipaidalom ang iya mga kamot nagadaog ang mga Amaleknon.

12Sang ginkapoy na ang mga kamot ni Moises, si Aaron kag si Hur nagkuha sang bato, kag ginpapungkoan kay Moises, samtang nagatindog sila sa tupad niya kag ginabayaw nila ang iya mga kamot. Ginpadayon nila ang pagbayaw sini tubtob magtunod ang adlaw.

13Sa sini nga paagi ginlutos ni Josue sing bug-os ang mga Amaleknon.

14Dayon ang Ginoo nagsiling kay Moises, “Isulat ang sugilanon sini nga pagdaog, agod nga indi malipatan, kag singgana si Josue nga papason ko gid ang mga Amaleknon.”

15Nagpatindog si Moises sing altar kag ginhingalanan niya ini, “Ang Ginoo amo ang akon Bandera.”

16Nagsiling sia, “Ibayaw sing mataas ang bandera sang Ginoo! Ang Ginoo magapadayon sa pagpakig-away batok sa mga Amaleknon sa walay katubtoban!”

← Chapter 16 Jump to: Chapter 18 →