Exodus 35

Ilonggo (Maayong Balita nga Biblia (2012))

← Chapter 34 Jump to: Chapter 36 →

1Ginpatawag ni Moises ang bug-os nga katilingban sang mga tawo sang Israel, kag nagsiling sa ila, “Amo ini ang ginsugo sang Ginoo nga inyo himuon:

2Mag-obra kamo sa sulod sang anom ka adlaw, pero ang ikapito nga adlaw manginbalaan, isa ka adlaw sang bug-os nga pagpahuway nga nahalad sa akon, ang Ginoo. Ang bisan sin-o nga mag-obra sa amo nga adlaw pagapatyon.

3Indi kamo magdabok sang kalayo sa inyo mga balay sa Adlaw nga Inugpahuway.”

4Si Moises nagsiling sa bug-os nga katilingban sang mga tawo sang Israel, “Amo ini ang ginsugo sang Ginoo:

5Maghalad kamo sing dulot sa Ginoo. Ang tagsatagsa nga luyag maghalad magdala sing dulot nga amo ang masunod: bulawan, pilak kag bronsi;

6asol, granate, kag pula nga delana; mapino nga nagakunotkunot nga lino; tela nga nahimo sa bulbol sang kanding;

7panit sang karnero nga lalaki nga nalugom sa pula; maayo nga panit; kahoy nga akasya;

8lana para sa mga suga; mga pahumot para sa lana nga inughaplas kag para sa insyenso nga mahamot;

9mga malahalon nga bato nga kornalina kag malahalon nga mga bato nga inugtampok sa bestidora kag sa hapin sa dughan sang Pinakamataas nga Pari.

10“Ang tanan sa inyo nga maayo nga manug-obra magpalapit kag maghimo sang tanan nga ginsugo sang Ginoo:

11ang Tolda kag ang iya tabon, ang iya mga kaw-it kag ang iya mga dingding nga mga tapi, ang iya mga baral, ang iya mga haligi kag ang mga sadsaran;

12ang Kaban sang Kasugtanan, ang iya mga yayungan, ang tabon sang kaban, kag ang kurtina nga nagalipon sini;

13ang lamisa, ang iya sini mga yayungan kag ang tanan nga iya sini kasangkapan, kag ang tinapay nga nahalad sa Dios;

14ang kandelirohan para sa suga kag sang iya mga kasangkapan, ang iya mga suga, kag ang lana para sa suga;

15ang altar nga ginasunogan sang insyenso kag ang iya mga yayungan; ang lana nga inughaplas; ang insyenso nga mahamot; kag ang kurtina para sa pwertahan sang Tolda;

16ang altar para sa mga halad nga ginasunog, lakip ang iya parilyahan nga bronsi nga naangot, ang iya mga yayungan kag ang tanan nga mga kasangkapan sini; ang batya kag ang iya tulongtungan;

17ang mga kurtina nga ginalipon, kag ang iya mga haligi kag mga sadsaran; ang kurtina para sa pwertahan sang bungbong;

18ang mga palpal kag mga banting sang Tolda kag sang bungbong;

19ang malahalon nga mga bayu para kay Aaron nga pari kag para sa iya mga anak nga lalaki sa ila pag-alagad subong mga pari sa Balaan nga Duog.”

20Ang bug-os nga katawhan sang Israel naghalin sa atubang ni Moises.

21Ang tagsatagsa nga may luyag maghatag nagdala sang ila dulot sa Ginoo, para sa paghimo sang Tolda sang presensya sang Ginoo. Nagdala sila sang tanan nga mga butang nga kinahanglanon agod gamiton sa pag-alagad sa Tolda kag para sa paghimo sang balaan nga mga bayu sang mga pari.

22Nag-abot ang tanan nga mga lalaki kag mga babayi nga nagdala sang ila luyag ihalad: mga sibit, mga aritos, mga singsing, mga kulintas, kag ang tanan nga sahi sing alahas nga bulawan. Ini tanan ila ginhalad sa Ginoo.

23Ang tagsatagsa nagdala sang mga masunod: asol, granate, ukon pula nga delana; mapino nga lino; tela nga nahimo sa bulbol sang kanding; sa panit sang karnero nga lalaki nga nalugom sa pula; ukon maayo nga panit.

24Ang tanan nga makasarang maghatag sing pilak ukon bronsi nagdala sini subong ila halad para sa Ginoo, kag ang tanan nga may kahoy nga akasya nga magamit sa bisan ano nga hilikuton nagdala sini.

25Ang tanan nga mga babayi nga sampaton sa paghimo sang hilo nga asol, nga granate, kag delana nga pula, kag mapino nga nagakunotkunot nga lino, naghimo sini kag ila ini gindala.

26Naghimo man sila sing hilo halin sa bulbol sang kanding.

27Ang mga pangulo nagdala sang malahalon nga mga bato nga kornalina, kag malahalon nga mga bato nga inugtampok sa bestidora kag sa hapin sa dughan,

28mga pahamot kag lana para sa mga suga, para sa lana nga inughaplas, kag para sa mahamot nga insyenso.

29Ang tanan nga mga lalaki kag mga babayi sang mga tawo sang Israel nga luyag maghatag sa tanan nga mga bulohaton nga ginsugo sang Ginoo nga himuon paagi kay Moises, nagdala sang ila mga halad sa Ginoo.

30Si Moises nagsiling sa mga Israelinhon, “Ang Ginoo nagpili kay Besalel nga anak nga lalaki ni Uri kag apo ni Hur halin sa tribo ni Juda.

31Ginpuno sia sang Dios sang iya gahom, agod nga manginsampaton sia, may abilidad, kag makahibalo sang tanan nga sari sang bulohaton,

32sa pagplano sing matahom nga mga desinyo nga himo sa bulawan, pilak, kag bronsi;

33sa paglagari sang malahalon nga mga bato nga inugtampok; sa paggutib sang kahoy; kag sang tanan nga sari sang matahom nga bulohaton.

34Ang Ginoo naghatag kay Besalel kag kay Oholiab nga anak nga lalaki ni Ahisamak halin sa tribo ni Dan, sang abilidad sa pagtudlo sa iban sang ila mga nahibaluan.

35Ang Ginoo naghatag sa ila sing pagkasampaton sa paghimo sang tanan nga bulohaton sang mga manugsinsil, mga manugborda, mga manughabol sang delana nga asol, granate, kag pula; kag sang mapino nga nagakunotkunot nga lino; kag sang iban nga mga tela. Makasarang sila sa paghimo sang tanan nga mga bulohaton kag sampaton sila nga mga manugborda.

← Chapter 34 Jump to: Chapter 36 →