Exodus 12 — Ilonggo (Maayong Balita nga Biblia (2012))

1Amo ini ang ginhambal sang Ginoo kay Moises kag kay Aaron sa duta sang Ehipto:

2“Ini nga bulan amo ang manginnahauna nga bulan sang tuig para sa inyo.

3Ipahibalo ninyo sa bug-os nga katilingban sang Israel nga sa ika-10 nga adlaw sini nga bulan, ang tagsa ka tawo dapat magpili sang isa ka kordero ukon tinday nga kanding para sa iya panimalay.

4Kon ang isa ka panimalay tama ka diutay nga indi makaurot sang isa ka bilog, sia kag ang iya kaingod suno sa ila kadamuon, magtingob kag magkuha sang isa ka kordero ukon tinday nga kanding. Pat-uron ninyo kon pila ka tawo ang makakaon sang isa ka bilog, suno sa pagbanabana ninyo nga makaon sang isa ka tawo.

5Magpili kamo sang karnero ukon sang kanding kag kinahanglan nga wala ini sing bisan ano nga depekto. Dapat nga ini isa ka lalaki nga isa pa lang ka tuig.

6Bukoton ninyo ini tubtob sa ika-14 nga adlaw sang bulan kag sa sini nga adlaw ang bug-os nga Israel mag-ihaw sini sa kahapunanon.

7Dayon magakuha sila sing dugo kag ila ipalhit ini sa mga bakalan sang mga pwerta kag sa ulohan sang mga pwertahan sang mga balay sa diin pagakaunon nila ang kordero ukon kanding.

8Sa sina nga gab-i litsunon nila ini, kag kaunon nila upod sa tinapay nga wala sing lebadora, kag sa mapait nga mga tanom.

9Indi ninyo pagkaunon ini nga hilaw ukon linaga, kundi litsunon ini nga bilog upod ang iya ulo, mga tiil kag mga kasudlan.

10Dapat uroton ninyo ini sing kaon kag kon may mabilin gid man sa aga, dapat sunogon ninyo ini.

11Sa inyo pagkaon sini magwagkos kamo sang inyo mga hawak, kag magsuksok sang inyo mga sandalyas, kag mag-uyat kamo sang inyo mga sungkod, kag kauna ninyo ini sing dalidali. Amo ini ang Piesta sang Pascua sa pagpasidungog sa akon, ang Ginoo.

12“Sa sina gid nga gab-i magaagi ako sa duta sang Ehipto, kag pamatyon ko ang tagsa ka lalaki nga panganay sa duta, ang mga tawo kag ang mga kahayupan. Silutan ko ang tanan nga mga dios sang Ehipto. Ako amo ang Ginoo.

13Ang dugo sa mga bakalan amo ang tanda sa mga balay nga inyo ginaestaran. Kon makita ko ang dugo sa inyo mga balay magaligad lang ako sa inyo, kag indi maglaglag sa inyo kon ako magsilot sa mga Ehiptohanon.

14Ini nga adlaw inyo gid pagadumdomon. Dapat ninyo ini saulogon subong isa ka piesta para sa akon, ang Ginoo. Dapat ninyo ini saulogon tuigtuig subong piesta sa tanan nga mga kaliwatan nga palaabuton.”

15Ang Ginoo nagsiling, “Sa sulod sang pito ka adlaw dapat kamo magkaon sing tinapay nga wala sing lebadora. Sa nahauna nga adlaw kuhaa ninyo tanan ang mga lebadora sa inyo mga balay, kay ang bisan sin-o nga magkaon sang tinapay nga may lebadora sa bisan ano nga adlaw sa sulod sang pito ka adlaw, indi sia pagkabigon nga katapo sang Israel.

16Sa nahauna nga adlaw, kag sa ikapito nga adlaw, dapat kamo magtilipon sa pagsimba. Wala sing may mag-obra sa sina nga mga adlaw, pero sarang kamo makaaman sing pagkaon.

17Saulogon ninyo ining piesta sang tinapay nga wala sing lebadora, tungod kay sa sini nga adlaw ginpagwa ko ang inyo mga tribo halin sa duta sang Ehipto. Saulogon ninyo ini nga adlaw subong piesta tuigtuig sa tanan nga mga kaliwatan.

18Halin sa kahapunanon sang ika-14 nga adlaw tubtob sa kahapunanon sang ika-21 nga adlaw sang nahauna nga bulan, dapat kamo magkaon sang tinapay nga wala sing lebadora.

19Kay sa sulod sang pito ka adlaw wala sing lebadora nga makita sa inyo mga balay, kay ang bisan sin-o nga magkaon sang tinapay nga may lebadora, tumandok man sia ukon dumoluong, indi sia pagkabigon nga katapo sang katilingban sang Israel.

20Indi kamo dapat magkaon sang tinapay nga may lebadora, kundi magkaon kamo sang tinapay nga wala sing lebadora sa inyo mga balay.”

21Ginpatawag ni Moises ang tanan nga mga pangulo sang Israel kag ginsingganan sila, “Ang tagsa sa inyo dapat magpili sang kordero ukon tinday nga kanding para sa inyo mga panimalay, kag ihawon ini para sa Pascua.

22Magkuha kamo sang sanga sang isopo, itum-oy sa dugo nga yara sa labador, kag ipalhit ang dugo sa mga bakalan sang pwerta kag sa ulohan sang pwertahan. Wala sing may maggwa sa inyo balay tubtob sa aga.

23Kon mag-agi ang Ginoo sa bug-os nga Ehipto sa pagpamatay sang mga Ehiptohanon, makita niya ang dugo nga napalhit sa ulohan kag sa mga bakalan sang pwertahan, kag indi niya pagtugotan ang Anghel sang Kamatayon nga magsulod sa inyo mga balay sa pagpatay sa inyo.

24Tumana ninyo ini nga mga pagsulondan tuigtuig subong tulomanon ninyo kag sang inyo mga kaanakan.

25Kag sa inyo pagsulod sa duta nga ginsaad sang Ginoo nga ihatag sa inyo, dapat ninyo tumanon ini nga seremonya.

26Kon ang inyo mga kabataan mamangkot sa inyo, ‘Ano ang kahulogan sini nga pagsulondan?’

27Magsabat kamo, ‘Ini amo ang halad sang Pascua sa pagpasidungog sa Ginoo, tungod kay ginligaran niya ang mga balay sang mga Israelinhon sa Ehipto sang pagpamatay niya sang mga Ehiptohanon kag wala niya kami pag-anha.’” Ang mga Israelinhon nagluhod kag nagsimba.

28Dayon naglakat sila kag gintuman nila ang ginsugo sang Ginoo kay Moises kag kay Aaron.

29Sang tungang gab-i ang Ginoo nagpamatay sang tanan nga mga panganay nga lalaki sa Ehipto, halin sa panganay nga lalaki sang hari nga amo ang manunubli sang iya trono, tubtob sa panganay nga mga anak nga lalaki sang mga binilanggo didto sa bilangguan nga madulom, kag ang tanan nga mga panganay sang mga kahayupan ginpamatay man.

30Sa sina nga gab-i ang hari, ang tanan niya nga mga opisyales, kag ang tanan nga mga Ehiptohanon nagbulogtaw. May tudo nga paghinibi sa bug-os nga Ehipto, tungod kay wala gid sing balay nga wala mapatyi sang anak nga lalaki.

31Sa amo gid nga gab-i, ginpatawag sang hari si Moises kag si Aaron kag ginsingganan, “Kamo kag ang mga Israelinhon magdalidali gwa kag maghalin diri! Bayai ninyo ang akon pungsod, kag maglakat sa pagsimba sa Ginoo suno sa ginpangayo ninyo.

32Dalha ang inyo mga karnero, mga kanding, kag mga baka suno sa inyo ginpangayo kag maglakat kamo. Magpangamuyo man kamo nga bendisyunan ako.”

33Ang mga Ehiptohanon nag-apura sa mga tawo nga maglakat kag maghalin sa pungsod. Nagsiling sila, “Magakalamatay kami tanan kon indi kamo maghalin.”

34Gani ang mga tawo naghimos sang ila linamas nga wala sing lebadora nga yara pa sa mga lamasan kag gin-uribay nila ini nga naputos sa ila mga bayu.

35Gintuman sang mga Israelinhon ang ginsiling ni Moises, kag nagpangayo sila sing mga alahas nga pilak kag bulawan kag mga bayu sa mga Ehiptohanon.

36Ginhimo sang Ginoo nga ang mga Ehiptohanon magtahod sa mga Israelinhon, kag ginhatag sa ila ang ila ginapangayo. Sa sini nga paagi ginsigputan sang mga Israelinhon ang mga Ehiptohanon sang ila mga pagkabutang.

37Ang mga Israelinhon naglakat halin sa Rameses pakadto sa Sucot. Ang kadamuon sang mga lalaki nga naglakat mga 600,000 wala labot ang mga babayi kag mga kabataan.

38May madamo pa nga iban nga mga tawo ang nag-upod sa ila kag gindala man nila ang madamo nga mga karnero, mga kanding, kag mga kabakahan.

39Naghimo sila sing tinapay nga wala sing lebadora gikan sa linamas nga ila gindala halin sa Ehipto. Wala ini sing lebadora, kay gintabog sila sing hinali halin sa Ehipto, kag wala sila sing tion sa pag-aman sang ila kaugalingon nga mga kalan-on.

40Ang mga Israelinhon nag-estar sing 430 ka tuig sa Ehipto.

41Sa amo gid nga adlaw, sa katapusan sang 430 ka tuig, ang tanan nga mga tribo sang Ginoo naggwa sa Ehipto.

42Amo ini ang gab-i nga ang Ginoo nagbantay sa ila agod makagwa sila sa Ehipto. Amo man ini ang gab-i nga ginpain para sa Ginoo, sa tanan nga mga kaliwatan sang mga Israelinhon nga ila dapat saulogon.

43Ang Ginoo nagsiling kay Moises kag kay Aaron, “Amo ini ang mga pagsulondan sa Pascua: Wala sing dumoluong nga magkaon sang panihapon sang Pascua,

44pero ang tagsa ka ulipon nga inyo ginbakal, makakaon sini, sa tapos sia matuli.

45Wala sing dumoluong ukon sinuholan nga obrero nga makakaon sini.

46Dapat ini kaunon sa balay sa diin ini ginhanda, indi ninyo ini pagdal-on sa gwa sang balay kag indi ninyo pagbalion ang bisan ano nga tul-an sang sapat nga kalan-on.

47Ang bug-os nga katilingban sang Israel dapat magsaulog sini nga piesta.

48Kon may dumoluong nga nagaestar upod sa inyo kag luyag magsaulog sini nga Pascua sang Ginoo, inyo anay tulion ang tanan nga mga lalaki sa iya panimalay. Dayon makabuylog sia sa inyo sa piesta. Dapat sia kabigon subong tumandok nga Israelinhon. Pero wala sing di-tinuli nga makakaon sini.

49Amo man ini ang mga pagsulondan sa tumandok nga mga Israelinhon kag sa mga dumoluong nga nagaestar upod sa inyo.”

50Gintuman ini sang tanan nga mga Israelinhon, kag ginhimo nila ang ginsugo sang Ginoo kay Moises kag kay Aaron.

51Sa amo gid nga adlaw ginpagwa sang Ginoo ang mga Israelinhon sa Ehipto, nga pasunod suno sa ila mga tribo.