Exodus 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1“Indi kamo magsugid sang indi matuod. Indi kamo mag-apin sa tawo nga nakasala paagi sa paghatag sing binutig nga panaksi.

2Indi kamo magbuylog sa madamo sa paghimo sing malaut. Sa hukmanan indi kamo magpanaksi sa pagpatiko sang katarungan agod lamang mapahamuot ninyo ang madamo.

3Indi ninyo pagpaburan ang imol sa iya asunto.

4“Kon makita ninyo ang baka ukon asno sang inyo kaaway nga nakabuhi, dakpon ninyo ini kag iuli sa iya.

5Kon ang asno sang inyo kaaway naglup-og tungod sang mabug-at nga karga, indi ninyo sia pagligaran kundi buligan ninyo sia agod ang iya asno makatindog liwat.

6“Kon ang isa sang inyo mga tawo nga imol ginaakusar, indi ninyo sia pagdumilian sang iya kinamatarong.

7Maglikaw kamo sa paghimo sang binutig nga panumbongon. Indi ninyo pag-ipapatay ang tawo nga wala sing sala, kay silutan ko ang tawo nga nagahimo sing malaut nga butang.

8Indi kamo magbaton sing hamham, kay ang hamham nagabulag sa tawo nahanungod sang matarong kag nagapatiko sang katarungan sang mga wala sing sala.

9“Indi ninyo paghimuan sing malain ang dumoluong. Nahibaluan ninyo ang iya balatyagon, tungod kay kamo anay mga dumoluong man sa Ehipto.

10“Sa sulod sang anom ka tuig tamnan ninyo ang inyo duta kag inyo tipunon ang patubas sini.

11Pero sa ikapito nga tuig papahuwayan ninyo ini, kag indi ninyo pag-anihon ang bisan ano nga magatubo sa sini. Ang mga imol nga kaupod ninyo magakaon sang nagatubo sa duta, kag ang mga hayop nga talunon makakaon sang nabilin sini. Amo man ini ang himuon ninyo sa inyo talamnan sang ubas kag sa inyo katamnan sang olivo.

12“Mag-obra kamo sa sulod sang anom ka adlaw, pero sa ikapito nga adlaw indi kamo mag-obra, agod ang inyo mga baka kag ang inyo mga asno makapahuway, kag ang inyo mga ulipon kag ang mga dumoluong nga nagaobra para sa inyo maulian sing ila kusog.

13“Pamatii ninyo ang tanan nga akon ginsiling sa inyo. Indi kamo magpangamuyo sa mga dios, ukon bisan magsambit sang ila mga ngalan.

14“Maghiwat kamo sing tatlo ka mga piesta tuigtuig sa akon kadungganan.

15Suno sa ginsugo ko sa inyo, saulogon ninyo ang Piesta sang Tinapay nga Wala sing Lebadora sa sulod sang pito ka adlaw, sa ginpat-od nga tion sa bulan sang Abib, kay sa sini nga bulan naggwa kamo sa Ehipto. Indi kamo magkaon sang tinapay nga may lebadora sa sini nga piesta. Wala sing isa nga magsimba sa akon nga wala sing halad.

16“Saulogon ninyo ang Piesta sang Tig-alani, kon mag-ani kamo sang nahauna nga bunga sang inyo uma. “Saulogon ninyo ang Piesta sang Pagtipon sang mga Patubas sa katapusan sang tuig, kon magtipon kamo sang mga bunga sang inyo mga katamnan nga ginpangabudlayan.

17Sa tagsa ka tuig sa sining tatlo ka mga piesta, ang tanan ninyo nga mga lalaki magasimba sa akon, ang Ginoo nga Gamhanan.

18“Indi kamo maghalad sang tinapay nga may lebadora kon maghalad kamo sing hayop sa akon. Ang sapay sang mga hayop nga ginhalad sa akon sa sini nga mga piesta dapat wala sang may mabilin tubtob sa aga.

19“Sa tagsa ka tuig dalhon ninyo sa balay sang Ginoo nga inyo Dios ang pinakamaayo sang nahauna nga patubas sang inyo uma. “Indi ninyo paglutoon ang tinday sang karnero ukon kanding sa gatas sang iya inang.

20“Magapadala ako sing anghel sa pag-una kag sa pagbantay sa inyo sa inyo dalanon, kag sa pagdala sa inyo sa lugar nga gin-aman ko.

21Pamati kamo sa iya, kag tumana ang iya ginasiling. Indi kamo magpamatok sa iya, kay ang ginahimo niya para sa akon. Indi niya pagpatawaron ini nga sala.

22Pero kon magpamati kamo sa iya sing maayo, kag magtuman sang tanan nga ginasiling ko, awayon ko ang inyo mga kaaway, kag sumpongon ko ang mga nagapamatok sa inyo.

23Ang akon anghel magauna sa inyo, kag magadala sa inyo sa duta sang mga Amornon, Hethanon, Peresnon, Canaanhon, Hevhanon, kag Jebusnon, kag ako magalaglag sa ila.

24Indi kamo magluhod sa ila mga dios ukon magsimba sa ila. Indi kamo magsunod sang ginahimo sini nga mga tawo. Laglagon ninyo sing bug-os ang ila mga dios, kag rumpagon ninyo ang mga haligi sang ila mga halaran nga bato.

25Magsimba kamo sa akon, ang Ginoo nga inyo Dios, kag ako magabendisyon sa inyo paagi sa paghatag sa inyo sang kalan-on kag tubig, kag kuhaon ko ang inyo mga balatian.

26Wala na sing babayi nga mahulogan ukon manginbaw-as sa inyo duta. Hatagan ko kamo sing malawig nga kabuhi.

27“Himuon ko nga magkahadlok sa akon ang mga tawo nga nagapamatok sa inyo. Himuon ko nga magsalangisag ang mga tawo nga inyo mga kaaway, kag pabalikon ko kag papalagyuhon ang inyo mga kaaway.

28Ipadala ko ang akon kakugmat sa inyo mga kaaway, kag ini magatabog sang mga Hevhanon, Canaanhon, kag sang mga Hethanon sa atubang ninyo.

29Indi ko sila pagtabugon sa sulod sang isa ka tuig, agod indi mabayaan ang duta kag ang mga hayop nga talunon indi magdamo para sa inyo.

30Sa baylo tabugon ko sila sing amat-amat tubtob nga magdamo ang inyo mga kaanakan, kag makapanag-iya sila sang duta.

31Pasangkaron ko ang mga dulonan sang inyo duta halin sa Mapula nga Dagat tubtob sa Dagat sang Mediteraneo, kag halin sa desierto, tubtob sa Suba sang Eufrates. Itugyan ko sa inyo paggahom ang mga pumoluyo sang duta, kag tabugon ninyo sila sa inyo atubang.

32Indi kamo maghimo sing kasugtanan sa ila ukon sa ila mga dios.

33Indi sila dapat mag-estar sa inyo pungsod, agod nga indi nila kamo matulod sa pagpakasala batok sa akon. Kon magsimba kamo sa ila mga dios, ini manginkabangdanan sang inyo kalaglagan.”

← Chapter 22 Jump to: Chapter 24 →