Exodus 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Ang tanan nga mga pumoluyo sang Israel naghalin sa Elim, kag sa ika-15 nga adlaw sang ikaduha nga bulan sa tapos makagwa sila sa duta sang Ehipto nag-abot sila sa desierto sang Sin nga yara sa gintung-an sang Elim kag sang Sinai.

2Nagreklamo sila tanan kay Moises kag kay Aaron didto sa desierto

3kag nagsiling sa ila, “Maayo pa kuntani nga ginpamatay kami sang Ginoo didto sa Ehipto. Didto makapungko kami sa tupad sang mga kaldero nga puno sang linuto nga mga karne kag makapagusto pa gani kami sing kaon. Pero inyo kami gindala sa sini nga desierto agod pagutoman tubtob magkalamatay kami tanan.”

4Ang Ginoo nagsiling kay Moises, “Karon paulanon ko sa inyo ang pagkaon halin sa langit. Ang mga tawo magagwa kag magapanguha kada adlaw sing pagkaon nga ila kinahanglanon para sa sina nga adlaw. Sa sini nga paagi akon sila nga tilawan kon ila tumanon ang akon mga sugo.

5Sa ikaanom nga adlaw, magpanguha sila sing pagkaon para sa duha ka adlaw kag amanon ini.”

6Gani si Moises kag si Aaron nagsiling sa tanan nga mga Israelinhon, “Sa sini nga kahapunanon makilala ninyo nga ang Ginoo amo ang nagpagwa sa inyo halin sa Ehipto,

7kag pagkaaga makita ninyo ang nagabanaag nga kapawa sang presensya sang Ginoo. Nabatian niya ang tanan ninyo nga mga reklamo batok sa iya. Kay sin-o bala kami nga magreklamo kamo sa amon?”

8Dayon si Moises nagsiling, “Ang Ginoo amo ang magahatag sa inyo sing karne nga inyo kaunon sa kahapunanon, kag tinapay pagkaaga nga makapagusto kamo sing kaon, tungod kay nabatian niya ang inyo madamo nga mga reklamo batok sa iya. Sin-o gid man kami? Ang inyo mga reklamo indi batok sa amon, kundi batok sa Ginoo.”

9Si Moises nagsiling kay Aaron, “Singgana ang tanan nga mga pumoluyo nga magpalapit sila kag magtindog sa presensya sang Ginoo, tungod kay nabatian niya ang ila mga reklamo.”

10Sang paghambal ni Aaron sa tanan nga mga pumoluyo, nagliso sila kag naglantaw sa desierto kag sa gilayon nagpakita ang nagabanaag nga kapawa sang Ginoo sa isa ka panganod.

11Ang Ginoo nagsiling kay Moises,

12“Nabatian ko ang mga reklamo sang mga Israelinhon. Amo ini ang isiling mo sa ila, ‘Sa kahapunanon may karne kamo nga kaunon, kag pagkaaga makapagusto kamo sing pagkaon sang tinapay. Dayon makilal-an ninyo nga Ako, ang Ginoo, amo ang inyo Dios.’”

13Sa kahapunanon nag-abot ang mga pitaw kag nagpuno sang kampo, kag sang pagkaaga may madamol nga tun-og sa palibot sini.

14Sang magmala na ang tun-og, may nakita sa desierto nga manipis kag malapadlapad nga butang, nga pareho ka pino sang ginaling nga yelo.

15Sang makita ini sang mga Israelinhon wala sila makahibalo kon ano yadto kag nagpinamangkutay sila, “Ano bala ini?” Nagsabat si Moises sa ila, “Ini amo ang pagkaon nga ginhatag sang Ginoo nga manginkalan-on ninyo.

16Ang Ginoo nagsugo nga ang tagsatagsa sa inyo magkuha suno sa iya kinahanglanon, duha ka litro sa tagsa ka tawo nga yara sa iya panimalay.”

17Gintuman ini sang mga Israelinhon—ang iban nagkuha sing madamo, ang iban diutay.

18Sang ginsukob nila ini, ang nagkuha sing madamo wala man sing sobra, kag ang nagkuha sing diutay wala man sing kulang. Ang tagsatagsa nagkuha suno sa iya kinahanglanon.

19Si Moises nagsiling sa ila, “Wala sing isa nga magtigana sini tubtob buas.”

20Pero ang iban sa ila wala magpati kay Moises, kag nagtigana sang bahin sini para sa masunod nga adlaw. Sang pagkaaga napuno ini sing ulod kag napan-os gani naakig si Moises sa ila.

21Nagapanguha sila sini agaaga, ang tagsatagsa sa ila suno sa ila kinahanglanon, pero kon mag-init na ang adlaw nagakatunaw sa duta ang nagakalabilin.

22Sa ikan-om nga adlaw nagpanguha sila sing tinapay para sa duha ka adlaw, apat ka litro para sa isa ka tawo. Ang tanan nga mga pangulo sang pumoluyo nagkadto kag nagsugid kay Moises nahanungod sini,

23kag nagsiling si Moises sa ila, “Amo ini ang ginsugo sang Ginoo, ‘Buas amo ang Adlaw nga Inugpahuway, isa ka balaan nga adlaw nga nahalad sa Ginoo. Lutoa ninyo subong nga adlaw ang tinapay nga inyo lulutuon, kag lagaa man ninyo ang karne nga inyo lalagaon. Ang nabilin inyo itigana para sa masunod nga adlaw.’”

24Suno sa ginsugo ni Moises, gintigana nila ang nabilin sa masunod nga adlaw kag wala ini mapan-os ukon maulori.

25Nagsiling si Moises, “Kauna ninyo ini karon nga adlaw, tungod kay karon nga adlaw amo ang Adlaw nga Inugpahuway nga nahalad sa Ginoo, kag indi kamo makakita sing pagkaon sa latagon.

26Magpanguha kamo sini sa sulod sang anom ka adlaw, pero sa ikapito nga adlaw, nga amo ang Adlaw nga Inugpahuway, wala kamo sing makuha.”

27Sa ikapito nga adlaw, ang iban nga mga tawo naggwa sa pagpanguha sang pagkaon, pero wala sila sing may nakita.

28Dayon ang Ginoo nagsiling kay Moises, “Tubtob pa bala san-o ang inyo di-pagtuman sang akon mga sugo kag mga kasugoan?

29Dumdoma ninyo nga ako, ang Ginoo, naghatag sa inyo sang Adlaw nga Inugpahuway. Gani, sa ikan-om nga adlaw pagahatagan ko kamo pirme sang nagakaigo nga pagkaon para sa duha ka adlaw. Sa ikapito nga adlaw, ang tagsatagsa magpabilin sa lugar sa diin sia. Wala sing isa nga maghalin sa iya balay.”

30Gani ang mga tawo wala mag-obra sa ikapito nga adlaw.

31Ang mga Israelinhon naghingalan sini nga kalan-on nga mana. Kaangay ini sang magamay kag maputi nga liso. Matam-is ini subong sang manipis nga tinapay nga may dugos.

32Nagsiling si Moises, “Amo ini ang ginsugo sang Ginoo, ‘Pun-a ninyo sini ang isa ka sulodlan, nga inyo taguon para sa inyo mga kaliwat, agod ila makita ang kalan-on nga akon ginhatag sa inyo sa desierto sang pagpagwa ko sa inyo sa Ehipto.’”

33Si Moises nagsiling kay Aaron, “Kuha ka sing tibod, sudlan mo sing duha ka litro nga mana, kag ibutang mo ini sa atubang sang Ginoo agod taguon para sa aton mga kaliwat.”

34Suno sa ginsugo sang Ginoo kay Moises ginbutang ini ni Aaron sa atubangan sang Kaban sang Kasugtanan, agod matago ini.

35Ang mga Israelinhon nagkaon sing mana sa sulod sang kwarenta ka tuig tubtob nakaabot sila sa pungsod nga may mga pumoluyo. Nagkaon sila sing mana tubtob nakaabot sila sa dulonan sang duta sang Canaan. (

36Ang ginagamit nga kinaandan nga sulokban may katumbas nga baynte ka litro.)

← Chapter 15 Jump to: Chapter 17 →